Utshovঅধ্যায় 26
26.1
বৈশংপায়ন উবাচ
দ্বৈপায়নবচঃ শ্রুত্বা কুপিতে চ ধনংজয়ে
ব্যাসমামন্ত্র্য কৌন্তেয়ঃ প্রত্যুবাচ যুধিষ্ঠিরঃ
26.2
ন পার্থিবমিদং রাজ্যং ন চ ভোগাঃ পৃথগ্বিধাঃ
প্রীণয়ন্তি মনো মেঽদ্য শোকো মাং নর্দয়ত্যয়ম্
26.3
শ্রুত্বা চ বীরহীনানামপুত্রাণাং চ যোষিতাম্
পরিদেবয়মানানাং শান্তিং নোপলভে মুনে
26.4
ইত্যুক্তঃ প্রত্যুবাচেদং ব্যাসো যোগবিদাং বরঃ
যুধিষ্ঠিরং মহাপ্রাজ্ঞং ধর্মজ্ঞো বেদপারগঃ
26.5
ন কর্মণা লভ্যতে চিন্তয়া বা; নাপ্যস্য দাতা পুরুষস্য কশ্চিৎ
পর্যায়য়োগাদ্বিহিতং বিধাত্রা; কালেন সর্বং লভতে মনুষ্যঃ
26.6
ন বুদ্ধিশাস্ত্রাধ্যয়নেন শক্যং; প্রাপ্তুং বিশেষৈর্মনুজৈরকালে
মূর্খোঽপি প্রাপ্নোতি কদাচিদর্থা;ন্কালো হি কার্যং প্রতি নির্বিশেষঃ
26.7
নাভূতিকালে চ ফলং দদাতি; শিল্পং ন মন্ত্রাশ্চ তথৌষধানি
তান্যেব কালেন সমাহিতানি; সিধ্যন্তি চেধ্যন্তি চ ভূতিকালে
26.8
কালেন শীঘ্রাঃ প্রবিবান্তি বাতাঃ; কালেন বৃষ্টির্জলদানুপৈতি
কালেন পদ্মোত্পলবজ্জলং চ; কালেন পুষ্যন্তি নগা বনেষু
26.9
কালেন কৃষ্ণাশ্চ সিতাশ্চ রাত্র্যঃ; কালেন চন্দ্রঃ পরিপূর্ণবিম্বঃ
নাকালতঃ পুষ্পফলং নগানাং; নাকালবেগাঃ সরিতো বহন্তি
26.10
নাকালমত্তাঃ খগপন্নগাশ্চ; মৃগদ্বিপাঃ শৈলমহাগ্রহাশ্চ
নাকালতঃ স্ত্রীষু ভবন্তি গর্ভা; নায়ান্ত্যকালে শিশিরোষ্ণবর্ষাঃ
26.11
নাকালতো ম্রিয়তে জায়তে বা; নাকালতো ব্যাহরতে চ বালঃ
নাকালতো যৌবনমভ্যুপৈতি; নাকালতো রোহতি বীজমুপ্তম্
26.12
নাকালতো ভানুরুপৈতি যোগং; নাকালতোঽস্তং গিরিমভ্যুপৈতি
নাকালতো বর্ধতে হীয়তে চ; চন্দ্রঃ সমুদ্রশ্চ মহোর্মিমালী
26.13
অত্রাপ্যুদাহরন্তীমমিতিহাসং পুরাতনম্
গীতং রাজ্ঞা সেনজিতা দুঃখার্তেন যুধিষ্ঠির
26.14
সর্বানেবৈষ পর্যায়ো মর্ত্যান্স্পৃশতি দুস্তরঃ
কালেন পরিপক্বা হি ম্রিয়ন্তে সর্বমানবাঃ
26.15
ঘ্নন্তি চান্যান্নরা রাজংস্তানপ্যন্যে নরাস্তথা
সংজ্ঞৈষা লৌকিকী রাজন্ন হিনস্তি ন হন্যতে
26.16
হন্তীতি মন্যতে কশ্চিন্ন হন্তীত্যপি চাপরে
স্বভাবতস্তু নিয়তৌ ভূতানাং প্রভবাপ্যয়ৌ
26.17
নষ্টে ধনে বা দারে বা পুত্রে পিতরি বা মৃতে
অহো কষ্টমিতি ধ্যায়ঞ্শোকস্যাপচিতিং চরেৎ
26.18
স কিং শোচসি মূঢঃ সঞ্শোচ্যঃ কিমনুশোচসি
পশ্য দুঃখেষু দুঃখানি ভয়েষু চ ভয়ান্যপি
26.19
আত্মাপি চায়ং ন মম সর্বাপি পৃথিবী মম
যথা মম তথান্যেষামিতি পশ্যন্ন মুহ্যতি
26.20
শোকস্থানসহস্রাণি হর্ষস্থানশতানি চ
দিবসে দিবসে মূঢমাবিশন্তি ন পণ্ডিতম্
26.21
এবমেতানি কালেন প্রিয়দ্বেষ্যাণি ভাগশঃ
জীবেষু পরিবর্তন্তে দুঃখানি চ সুখানি চ
26.22
দুঃখমেবাস্তি ন সুখং তস্মাত্তদুপলভ্যতে
তৃষ্ণার্তিপ্রভবং দুঃখং দুঃখার্তিপ্রভবং সুখম্
26.23
সুখস্যানন্তরং দুঃখং দুঃখস্যানন্তরং সুখম্
ন নিত্যং লভতে দুঃখং ন নিত্যং লভতে সুখম্
26.24
সুখমন্তে হি দুঃখানাং দুঃখমন্তে সুখস্য চ
তস্মাদেতদ্দ্বয়ং জহ্যাদ্য ইচ্ছেচ্ছাশ্বতং সুখম্
26.25
যন্নিমিত্তং ভবেচ্ছোকস্তাপো বা দুঃখমূর্ছিতঃ
আয়াসো বাপি যন্মূলস্তদেকাঙ্গমপি ত্যজেৎ
26.26
সুখং বা যদি বা দুঃখং প্রিয়ং বা যদি বাপ্রিয়ম্
প্রাপ্তং প্রাপ্তমুপাসীত হৃদয়েনাপরাজিতঃ
26.27
ঈষদপ্যঙ্গ দারাণাং পুত্রাণাং বা চরাপ্রিয়ম্
ততো জ্ঞাস্যসি কঃ কস্য কেন বা কথমেব বা
26.28
যে চ মূঢতমা লোকে যে চ বুদ্ধেঃ পরং গতাঃ
ত এব সুখমেধন্তে মধ্যঃ ক্লেশেন যুজ্যতে
26.29
ইত্যব্রবীন্মহাপ্রাজ্ঞো যুধিষ্ঠির স সেনজিৎ
পরাবরজ্ঞো লোকস্য ধর্মবিত্সুখদুঃখবিৎ
26.30
সুখী পরস্য যো দুঃখে ন জাতু স সুখী ভবেৎ
দুঃখানাং হি ক্ষয়ো নাস্তি জায়তে হ্যপরাত্পরম্
26.31
সুখং চ দুঃখং চ ভবাভবৌ চ; লাভালাভৌ মরণং জীবিতং চ
পর্যায়শঃ সর্বমিহ স্পৃশন্তি; তস্মাদ্ধীরো নৈব হৃষ্যেন্ন কুপ্যেৎ
26.32
দীক্ষাং যজ্ঞে পালনং যুদ্ধমাহু;র্যোগং রাষ্ট্রে দণ্ডনীত্যা চ সম্যক্
বিত্তত্যাগং দক্ষিণানাং চ যজ্ঞে; সম্যগ্জ্ঞানং পাবনানীতি বিদ্যাৎ
26.33
রক্ষন্রাষ্ট্রং বুদ্ধিপূর্বং নয়েন; সংত্যক্তাত্মা যজ্ঞশীলো মহাত্মা
সর্বাঁল্লোকান্ধর্মমূর্ত্যা চরংশ্চা;প্যূর্ধ্বং দেহান্মোদতে দেবলোকে
26.34
জিত্বা সংগ্রামান্পালয়িত্বা চ রাষ্ট্রং; সোমং পীত্বা বর্ধয়িত্বা প্রজাশ্চ
যুক্ত্যা দণ্ডং ধারয়িত্বা প্রজানাং; যুদ্ধে ক্ষীণো মোদতে দেবলোকে
26.35
সম্যগ্বেদান্প্রাপ্য শাস্ত্রাণ্যধীত্য; সম্যগ্রাষ্ট্রং পালয়িত্বা চ রাজা
চাতুর্বর্ণ্যং স্থাপয়িত্বা স্বধর্মে; পূতাত্মা বৈ মোদতে দেবলোকে
26.36
যস্য বৃত্তং নমস্যন্তি স্বর্গস্থস্যাপি মানবাঃ
পৌরজানপদামাত্যাঃ স রাজা রাজসত্তমঃ