Utshovঅধ্যায় 25
25.1
বৈশংপায়ন উবাচ
পুনরেব মহর্ষিস্তং কৃষ্ণদ্বৈপায়নোঽব্রবীৎ
অজাতশত্রুং কৌন্তেয়মিদং বচনমর্থবৎ
25.2
অরণ্যে বসতাং তাত ভ্রাতৄণাং তে তপস্বিনাম্
মনোরথা মহারাজ যে তত্রাসন্যুধিষ্ঠির
25.3
তানিমে ভরতশ্রেষ্ঠ প্রাপ্নুবন্তু মহারথাঃ
প্রশাধি পৃথিবীং পার্থ যয়াতিরিব নাহুষঃ
25.4
অরণ্যে দুঃখবসতিরনুভূতা তপস্বিভিঃ
দুঃখস্যান্তে নরব্যাঘ্রাঃ সুখং ত্বনুভবন্ত্বিমে
25.5
ধর্মমর্থং চ কামং চ ভ্রাতৃভিঃ সহ ভারত
অনুভূয় ততঃ পশ্চাত্প্রস্থাতাসি বিশাং পতে
25.6
অতিথীনাং চ পিতৄণাং দেবতানাং চ ভারত
আনৃণ্যং গচ্ছ কৌন্তেয় ততঃ স্বর্গং গমিষ্যসি
25.7
সর্বমেধাশ্বমেধাভ্যাং যজস্ব কুরুনন্দন
ততঃ পশ্চান্মহারাজ গমিষ্যসি পরাং গতিম্
25.8
ভ্রাতৄংশ্চ সর্বান্ক্রতুভিঃ সংয়োজ্য বহুদক্ষিণৈঃ
সংপ্রাপ্তঃ কীর্তিমতুলাং পাণ্ডবেয় ভবিষ্যসি
25.9
বিদ্ম তে পুরুষব্যাঘ্র বচনং কুরুনন্দন
শৃণু মচ্চ যথা কুর্বন্ধর্মান্ন চ্যবতে নৃপঃ
25.10
আদদানস্য চ ধনং নিগ্রহং চ যুধিষ্ঠির
সমানং ধর্মকুশলাঃ স্থাপয়ন্তি নরেশ্বর
25.11
দেশকালপ্রতীক্ষে যো দস্যোর্দর্শয়তে নৃপঃ
শাস্ত্রজাং বুদ্ধিমাস্থায় নৈনসা স হি যুজ্যতে
25.12
আদায় বলিষড্ভাগং যো রাষ্ট্রং নাভিরক্ষতি
প্রতিগৃহ্ণাতি তত্পাপং চতুর্থাংশেন পার্থিবঃ
25.13
নিবোধ চ যথাতিষ্ঠন্ধর্মান্ন চ্যবতে নৃপঃ
নিগ্রহাদ্ধর্মশাস্ত্রাণামনুরুধ্যন্নপেতভীঃ
কামক্রোধাবনাদৃত্য পিতেব সমদর্শনঃ
25.14
দৈবেনোপহতে রাজা কর্মকালে মহাদ্যুতে
প্রমাদয়তি তত্কর্ম ন তত্রাহুরতিক্রমম্
25.15
তরসা বুদ্ধিপূর্বং বা নিগ্রাহ্যা এব শত্রবঃ
পাপৈঃ সহ ন সংদধ্যাদ্রাষ্ট্রং পণ্যং ন কারয়েৎ
25.16
শূরাশ্চার্যাশ্চ সত্কার্যা বিদ্বাংসশ্চ যুধিষ্ঠির
গোমতো ধনিনশ্চৈব পরিপাল্যা বিশেষতঃ
25.17
ব্যবহারেষু ধর্ম্যেষু নিয়োজ্যাশ্চ বহুশ্রুতাঃ
গুণয়ুক্তেঽপি নৈকস্মিন্বিশ্বস্যাচ্চ বিচক্ষণঃ
25.18
অরক্ষিতা দুর্বিনীতো মানী স্তব্ধোঽভ্যসূয়কঃ
এনসা যুজ্যতে রাজা দুর্দান্ত ইতি চোচ্যতে
25.19
যেঽরক্ষ্যমাণা হীয়ন্তে দৈবেনোপহতে নৃপে
তস্করৈশ্চাপি হন্যন্তে সর্বং তদ্রাজকিল্বিষম্
25.20
সুমন্ত্রিতে সুনীতে চ বিধিবচ্চোপপাদিতে
পৌরুষে কর্মণি কৃতে নাস্ত্যধর্মো যুধিষ্ঠির
25.21
বিপদ্যন্তে সমারম্ভাঃ সিধ্যন্ত্যপি চ দৈবতঃ
কৃতে পুরুষকারে তু নৈনঃ স্পৃশতি পার্থিবম্
25.22
অত্র তে রাজশার্দূল বর্তয়িষ্যে কথামিমাম্
যদ্বৃত্তং পূর্বরাজর্ষের্হয়গ্রীবস্য পার্থিব
25.23
শত্রূন্হত্বা হতস্যাজৌ শূরস্যাক্লিষ্টকর্মণঃ
অসহায়স্য ধীরস্য নির্জিতস্য যুধিষ্ঠির
25.24
যত্কর্ম বৈ নিগ্রহে শাত্রবাণাং; যোগশ্চাগ্র্যঃ পালনে মানবানাম্
কৃত্বা কর্ম প্রাপ্য কীর্তিং সুয়ুদ্ধে; বাজিগ্রীবো মোদতে দেবলোকে
25.25
সংত্যক্তাত্মা সমরেষ্বাততায়ী; শস্ত্রৈশ্ছিন্নো দস্যুভিরর্দ্যমানঃ
অশ্বগ্রীবঃ কর্মশীলো মহাত্মা; সংসিদ্ধাত্মা মোদতে দেবলোকে
25.26
ধনুর্যূপো রশনা জ্যা শরঃ স্রু;ক্স্রুবঃ খড্গো রুধিরং যত্র চাজ্যম্
রথো বেদী কামগো যুদ্ধমগ্নি;শ্চাতুর্হোত্রং চতুরো বাজিমুখ্যাঃ
25.27
হুত্বা তস্মিন্যজ্ঞবহ্নাবথারী;ন্পাপান্মুক্তো রাজসিংহস্তরস্বী
প্রাণান্হুত্বা চাবভৃথে রণে স; বাজিগ্রীবো মোদতে দেবলোকে
25.28
রাষ্ট্রং রক্ষন্বুদ্ধিপূর্বং নয়েন; সংত্যক্তাত্মা যজ্ঞশীলো মহাত্মা
সর্বাঁল্লোকান্ব্যাপ্য কীর্ত্যা মনস্বী; বাজিগ্রীবো মোদতে দেবলোকে
25.29
দৈবীং সিদ্ধিং মানুষীং দণ্ডনীতিং; যোগন্যায়ৈঃ পালয়িত্বা মহীং চ
তস্মাদ্রাজা ধর্মশীলো মহাত্মা; হয়গ্রীবো মোদতে স্বর্গলোকে
25.30
বিদ্বাংস্ত্যাগী শ্রদ্দধানঃ কৃতজ্ঞ;স্ত্যক্ত্বা লোকং মানুষং কর্ম কৃত্বা
মেধাবিনাং বিদুষাং সংমতানাং; তনুত্যজাং লোকমাক্রম্য রাজা
25.31
সম্যগ্বেদান্প্রাপ্য শাস্ত্রাণ্যধীত্য; সম্যগ্রাষ্ট্রং পালয়িত্বা মহাত্মা
চাতুর্বর্ণ্যং স্থাপয়িত্বা স্বধর্মে; বাজিগ্রীবো মোদতে দেবলোকে
25.32
জিত্বা সংগ্রামান্পালয়িত্বা প্রজাশ্চ; সোমং পীত্বা তর্পয়িত্বা দ্বিজাগ্র্যান্
যুক্ত্যা দণ্ডং ধারয়িত্বা প্রজানাং; যুদ্ধে ক্ষীণো মোদতে দেবলোকে
25.33
বৃত্তং যস্য শ্লাঘনীয়ং মনুষ্যাঃ; সন্তো বিদ্বাংসশ্চার্হয়ন্ত্যর্হণীয়াঃ
স্বর্গং জিত্বা বীরলোকাংশ্চ গত্বা; সিদ্ধিং প্রাপ্তঃ পুণ্যকীর্তির্মহাত্মা