Utshovঅধ্যায় 24
24.1
যুধিষ্ঠির উবাচ
ভগবন্কর্মণা কেন সুদ্যুম্নো বসুধাধিপঃ
সংসিদ্ধিং পরমাং প্রাপ্তঃ শ্রোতুমিচ্ছামি তং নৃপম্
24.2
ব্যাস উবাচ
অত্রাপ্যুদাহরন্তীমমিতিহাসং পুরাতনম্
শঙ্খশ্চ লিখিতশ্চাস্তাং ভ্রাতরৌ সংয়তব্রতৌ
24.3
তয়োরাবসথাবাস্তাং রমণীয়ৌ পৃথক্পৃথক্
নিত্যপুষ্পফলৈর্বৃক্ষৈরুপেতৌ বাহুদামনু
24.4
ততঃ কদাচিল্লিখিতঃ শঙ্খস্যাশ্রমমাগমৎ
যদৃচ্ছয়াপি শঙ্খোঽথ নিষ্ক্রান্তোঽভবদাশ্রমাৎ
24.5
সোঽভিগম্যাশ্রমং ভ্রাতুঃ শঙ্খস্য লিখিতস্তদা
ফলানি শাতয়ামাস সম্যক্পরিণতান্যুত
24.6
তান্যুপাদায় বিস্রব্ধো ভক্ষয়ামাস স দ্বিজঃ
তস্মিংশ্চ ভক্ষয়ত্যেব শঙ্খোঽপ্যাশ্রমমাগমৎ
24.7
ভক্ষয়ন্তং তু তং দৃষ্ট্বা শঙ্খো ভ্রাতরমব্রবীৎ
কুতঃ ফলান্যবাপ্তানি হেতুনা কেন খাদসি
24.8
সোঽব্রবীদ্ভ্রাতরং জ্যেষ্ঠমুপস্পৃশ্যাভিবাদ্য চ
ইত এব গৃহীতানি ময়েতি প্রহসন্নিব
24.9
তমব্রবীত্তদা শঙ্খস্তীব্রকোপসমন্বিতঃ
স্তেয়ং ত্বয়া কৃতমিদং ফলান্যাদদতা স্বয়ম্
গচ্ছ রাজানমাসাদ্য স্বকর্ম প্রথয়স্ব বৈ
24.10
অদত্তাদানমেবেদং কৃতং পার্থিবসত্তম
স্তেনং মাং ত্বং বিদিত্বা চ স্বধর্মমনুপালয়
শীঘ্রং ধারয় চৌরস্য মম দণ্ডং নরাধিপ
24.11
ইত্যুক্তস্তস্য বচনাত্সুদ্যুম্নং বসুধাধিপম্
অভ্যগচ্ছন্মহাবাহো লিখিতঃ সংশিতব্রতঃ
24.12
সুদ্যুম্নস্ত্বন্তপালেভ্যঃ শ্রুত্বা লিখিতমাগতম্
অভ্যগচ্ছত্সহামাত্যঃ পদ্ভ্যামেব নরেশ্বরঃ
24.13
তমব্রবীত্সমাগত্য স রাজা ব্রহ্মবিত্তমম্
কিমাগমনমাচক্ষ্ব ভগবন্কৃতমেব তৎ
24.14
এবমুক্তঃ স বিপ্রর্ষিঃ সুদ্যুম্নমিদমব্রবীৎ
প্রতিশ্রৌষি করিষ্যেতি শ্রুত্বা তত্কর্তুমর্হসি
24.15
অনিসৃষ্টানি গুরুণা ফলানি পুরুষর্ষভ
ভক্ষিতানি ময়া রাজংস্তত্র মাং শাধি মাচিরম্
24.16
সুদ্যুম্ন উবাচ
প্রমাণং চেন্মতো রাজা ভবতো দণ্ডধারণে
অনুজ্ঞায়ামপি তথা হেতুঃ স্যাদ্ব্রাহ্মণর্ষভ
24.17
স ভবানভ্যনুজ্ঞাতঃ শুচিকর্মা মহাব্রতঃ
ব্রূহি কামানতোঽন্যাংস্ত্বং করিষ্যামি হি তে বচঃ
24.18
ব্যাস উবাচ
ছন্দ্যমানোঽপি ব্রহ্মর্ষিঃ পার্থিবেন মহাত্মনা
নান্যং বৈ বরয়ামাস তস্মাদ্দণ্ডাদৃতে বরম্
24.19
ততঃ স পৃথিবীপালো লিখিতস্য মহাত্মনঃ
করৌ প্রচ্ছেদয়ামাস ধৃতদণ্ডো জগাম সঃ
24.20
স গত্বা ভ্রাতরং শঙ্খমার্তরূপোঽব্রবীদিদম্
ধৃতদণ্ডস্য দুর্ভুদ্ধের্ভগবন্ক্ষন্তুমর্হসি
24.21
শঙ্খ উবাচ
ন কুপ্যে তব ধর্মজ্ঞ ন চ দূষয়সে মম
ধর্মস্তু তে ব্যতিক্রান্তস্ততস্তে নিষ্কৃতিঃ কৃতা
24.22
স গত্বা বাহুদাং শীঘ্রং তর্পয়স্ব যথাবিধি
দেবান্পিতৄনৃষীংশ্চৈব মা চাধর্মে মনঃ কৃথাঃ
24.23
ব্যাস উবাচ
তস্য তদ্বচনং শ্রুত্বা শঙ্খস্য লিখিতস্তদা
অবগাহ্যাপগাং পুণ্যামুদকার্থং প্রচক্রমে
24.24
প্রাদুরাস্তাং ততস্তস্য করৌ জলজসংনিভৌ
ততঃ স বিস্মিতো ভ্রাতুর্দর্শয়ামাস তৌ করৌ
24.25
ততস্তমব্রবীচ্ছঙ্খস্তপসেদং কৃতং ময়া
মা চ তেঽত্র বিশঙ্কা ভূদ্দৈবমেব বিধীয়তে
24.26
লিখিত উবাচ
কিং নু নাহং ত্বয়া পূতঃ পূর্বমেব মহাদ্যুতে
যস্য তে তপসো বীর্যমীদৃশং দ্বিজসত্তম
24.27
শঙ্খ উবাচ
এবমেতন্ময়া কার্যং নাহং দণ্ডধরস্তব
স চ পূতো নরপতিস্ত্বং চাপি পিতৃভিঃ সহ
24.28
ব্যাস উবাচ
স রাজা পাণ্ডবশ্রেষ্ঠ শ্রেষ্ঠো বৈ তেন কর্মণা
প্রাপ্তবান্পরমাং সিদ্ধিং দক্ষঃ প্রাচেতসো যথা
24.29
এষ ধর্মঃ ক্ষত্রিয়াণাং প্রজানাং পরিপালনম্
উত্পথেঽস্মিন্মহারাজ মা চ শোকে মনঃ কৃথাঃ
24.30
ভ্রাতুরস্য হিতং বাক্যং শৃণু ধর্মজ্ঞসত্তম
দণ্ড এব হি রাজেন্দ্র ক্ষত্রধর্মো ন মুণ্ডনম্