অধ্যায় 23

23.1

বৈশংপায়ন উবাচ
এবমুক্তস্তু কৌন্তেয়ো গুডাকেশেন ভারত
নোবাচ কিংচিত্কৌরব্যস্ততো দ্বৈপায়নোঽব্রবীৎ

বীভত্সোর্বচনং সম্যক্সত্যমেতদ্যুধিষ্ঠির
শাস্ত্রদৃষ্টঃ পরো ধর্মঃ স্মৃতো গার্হস্থ্য আশ্রমঃ

স্বধর্মং চর ধর্মজ্ঞ যথাশাস্ত্রং যথাবিধি
ন হি গার্হস্থ্যমুত্সৃজ্য তবারণ্যং বিধীয়তে

গৃহস্থং হি সদা দেবাঃ পিতর ঋষয়স্তথা
ভৃত্যাশ্চৈবোপজীবন্তি তান্ভজস্ব মহীপতে

বয়াংসি পশবশ্চৈব ভূতানি চ মহীপতে
গৃহস্থৈরেব ধার্যন্তে তস্মাজ্জ্যেষ্ঠাশ্রমো গৃহী

সোঽয়ং চতুর্ণামেতেষামাশ্রমাণাং দুরাচরঃ
তং চরাবিমনাঃ পার্থ দুশ্চরং দুর্বলেন্দ্রিয়ৈঃ

বেদজ্ঞানং চ তে কৃত্স্নং তপশ্চ চরিতং মহৎ
পিতৃপৈতামহে রাজ্যে ধুরমুদ্বোঢুমর্হসি

তপো যজ্ঞস্তথা বিদ্যা ভৈক্ষমিন্দ্রিয়নিগ্রহঃ
ধ্যানমেকান্তশীলত্বং তুষ্টির্দানং চ শক্তিতঃ

ব্রাহ্মণানাং মহারাজ চেষ্টাঃ সংসিদ্ধিকারিকাঃ
ক্ষত্রিয়াণাং চ বক্ষ্যামি তবাপি বিদিতং পুনঃ

যজ্ঞো বিদ্যা সমুত্থানমসংতোষঃ শ্রিয়ং প্রতি
দণ্ডধারণমত্যুগ্রং প্রজানাং পরিপালনম্

বেদজ্ঞানং তথা কৃত্স্নং তপঃ সুচরিতং তথা
দ্রবিণোপার্জনং ভূরি পাত্রেষু প্রতিপাদনম্

এতানি রাজ্ঞাং কর্মাণি সুকৃতানি বিশাং পতে
ইমং লোকমমুং লোকং সাধয়ন্তীতি নঃ শ্রুতম্

তেষাং জ্যায়স্তু কৌন্তেয় দণ্ডধারণমুচ্যতে
বলং হি ক্ষত্রিয়ে নিত্যং বলে দণ্ডঃ সমাহিতঃ

এতাশ্চেষ্টাঃ ক্ষত্রিয়াণাং রাজন্সংসিদ্ধিকারিকাঃ
অপি গাথামিমাং চাপি বৃহস্পতিরভাষত

ভূমিরেতৌ নিগিরতি সর্পো বিলশয়ানিব
রাজানং চাবিরোদ্ধারং ব্রাহ্মণং চাপ্রবাসিনম্

সুদ্যুম্নশ্চাপি রাজর্ষিঃ শ্রূয়তে দণ্ডধারণাৎ
প্রাপ্তবান্পরমাং সিদ্ধিং দক্ষঃ প্রাচেতসো যথা