অধ্যায় 22

22.1

বৈশংপায়ন উবাচ
তস্মিন্বাক্যান্তরে বাক্যং পুনরেবার্জুনোঽব্রবীৎ
বিষণ্ণমনসং জ্যেষ্ঠমিদং ভ্রাতরমীশ্বরম্

ক্ষত্রধর্মেণ ধর্মজ্ঞ প্রাপ্য রাজ্যমনুত্তমম্
জিত্বা চারীন্নরশ্রেষ্ঠ তপ্যতে কিং ভবান্ভৃশম্

ক্ষত্রিয়াণাং মহারাজ সংগ্রামে নিধনং স্মৃতম্
বিশিষ্টং বহুভির্যজ্ঞৈঃ ক্ষত্রধর্মমনুস্মর

ব্রাহ্মণানাং তপস্ত্যাগঃ প্রেত্যধর্মবিধিঃ স্মৃতঃ
ক্ষত্রিয়াণাং চ বিহিতং সংগ্রামে নিধনং বিভো

ক্ষত্রধর্মো মহারৌদ্রঃ শস্ত্রনিত্য ইতি স্মৃতঃ
বধশ্চ ভরতশ্রেষ্ঠ কালে শস্ত্রেণ সংয়ুগে

ব্রাহ্মণস্যাপি চেদ্রাজন্ক্ষত্রধর্মেণ তিষ্ঠতঃ
প্রশস্তং জীবিতং লোকে ক্ষত্রং হি ব্রহ্মসংস্থিতম্

ন ত্যাগো ন পুনর্যাচ্ঞা ন তপো মনুজেশ্বর
ক্ষত্রিয়স্য বিধীয়ন্তে ন পরস্বোপজীবনম্

স ভবান্সর্বধর্মজ্ঞঃ সর্বাত্মা ভরতর্ষভ
রাজা মনীষী নিপুণো লোকে দৃষ্টপরাবরঃ

ত্যক্ত্বা সংতাপজং শোকং দংশিতো ভব কর্মণি
ক্ষত্রিয়স্য বিশেষেণ হৃদয়ং বজ্রসংহতম্

জিত্বারীন্ক্ষত্রধর্মেণ প্রাপ্য রাজ্যমকণ্টকম্
বিজিতাত্মা মনুষ্যেন্দ্র যজ্ঞদানপরো ভব

ইন্দ্রো বৈ ব্রহ্মণঃ পুত্রঃ কর্মণা ক্ষত্রিয়োঽভবৎ
জ্ঞাতীনাং পাপবৃত্তীনাং জঘান নবতীর্নব

তচ্চাস্য কর্ম পূজ্যং হি প্রশস্যং চ বিশাং পতে
তেন চেন্দ্রত্বমাপেদে দেবানামিতি নঃ শ্রুতম্

স ত্বং যজ্ঞৈর্মহারাজ যজস্ব বহুদক্ষিণৈঃ
যথৈবেন্দ্রো মনুষ্যেন্দ্র চিরায় বিগতজ্বরঃ

মা ত্বমেবংগতে কিংচিত্ক্ষত্রিয়র্ষভ শোচিথাঃ
গতাস্তে ক্ষত্রধর্মেণ শস্ত্রপূতাঃ পরাং গতিম্

ভবিতব্যং তথা তচ্চ যদ্বৃত্তং ভরতর্ষভ
দিষ্টং হি রাজশার্দূল ন শক্যমতিবর্তিতুম্