অধ্যায় 21

21.1

দেবস্থান উবাচ
অত্রৈবোদাহরন্তীমমিতিহাসং পুরাতনম্
ইন্দ্রেণ সময়ে পৃষ্টো যদুবাচ বৃহস্পতিঃ

সংতোষো বৈ স্বর্গতমঃ সংতোষঃ পরমং সুখম্
তুষ্টের্ন কিংচিত্পরতঃ সুসম্যক্পরিতিষ্ঠতি

যদা সংহরতে কামান্কূর্মোঽঙ্গানীব সর্বশঃ
তদাত্মজ্যোতিরাত্মৈব স্বাত্মনৈব প্রসীদতি

ন বিভেতি যদা চায়ং যদা চাস্মান্ন বিভ্যতি
কামদ্বেষৌ চ জয়তি তদাত্মানং প্রপশ্যতি

যদাসৌ সর্বভূতানাং ন ক্রুধ্যতি ন দুষ্যতি
কর্মণা মনসা বাচা ব্রহ্ম সংপদ্যতে তদা

এবং কৌন্তেয় ভূতানি তং তং ধর্মং তথা তথা
তদা তদা প্রপশ্যন্তি তস্মাদ্বুধ্যস্ব ভারত

অন্যে শমং প্রশংসন্তি ব্যায়ামমপরে তথা
নৈকং ন চাপরং কেচিদুভয়ং চ তথাপরে

যজ্ঞমেকে প্রশংসন্তি সংন্যাসমপরে জনাঃ
দানমেকে প্রশংসন্তি কেচিদেব প্রতিগ্রহম্
কেচিত্সর্বং পরিত্যজ্য তূষ্ণীং ধ্যায়ন্ত আসতে

রাজ্যমেকে প্রশংসন্তি সর্বেষাং পরিপালনম্
হত্বা ভিত্ত্বা চ ছিত্ত্বা চ কেচিদেকান্তশীলিনঃ

এতত্সর্বং সমালোক্য বুধানামেষ নিশ্চয়ঃ
অদ্রোহেণৈব ভূতানাং যো ধর্মঃ স সতাং মতঃ

অদ্রোহঃ সত্যবচনং সংবিভাগো ধৃতিঃ ক্ষমা
প্রজনঃ স্বেষু দারেষু মার্দবং হ্রীরচাপলম্

ধনং ধর্মপ্রধানেষ্টং মনুঃ স্বায়ংভুবোঽব্রবীৎ
তস্মাদেবং প্রয়ত্নেন কৌন্তেয় পরিপালয়

যো হি রাজ্যে স্থিতঃ শশ্বদ্বশী তুল্যপ্রিয়াপ্রিয়ঃ
ক্ষত্রিয়ো যজ্ঞশিষ্টাশী রাজশাস্ত্রার্থতত্ত্ববিৎ

অসাধুনিগ্রহরতঃ সাধূনাং প্রগ্রহে রতঃ
ধর্মে বর্ত্মনি সংস্থাপ্য প্রজা বর্তেত ধর্মবিৎ

পুত্রসংক্রামিতশ্রীস্তু বনে বন্যেন বর্তয়ন্
বিধিনা শ্রামণেনৈব কুর্যাত্কালমতন্দ্রিতঃ

য এবং বর্ততে রাজা রাজধর্মবিনিশ্চিতঃ
তস্যায়ং চ পরশ্চৈব লোকঃ স্যাত্সফলো নৃপ
নির্বাণং তু সুদুষ্পারং বহুবিঘ্নং চ মে মতম্

এবং ধর্মমনুক্রান্তাঃ সত্যদানতপঃপরাঃ
আনৃশংস্যগুণৈর্যুক্তাঃ কামক্রোধবিবর্জিতাঃ

প্রজানাং পালনে যুক্তা দমমুত্তমমাস্থিতাঃ
গোব্রাহ্মণার্থং যুদ্ধেন সংপ্রাপ্তা গতিমুত্তমাম্

এবং রুদ্রাঃ সবসবস্তথাদিত্যাঃ পরংতপ
সাধ্যা রাজর্ষিসংঘাশ্চ ধর্মমেতং সমাশ্রিতাঃ
অপ্রমত্তাস্ততঃ স্বর্গং প্রাপ্তাঃ পুণ্যৈঃ স্বকর্মভিঃ