অধ্যায় 20

20.1

বৈশংপায়ন উবাচ
তস্মিন্বাক্যান্তরে বক্তা দেবস্থানো মহাতপাঃ
অভিনীততরং বাক্যমিত্যুবাচ যুধিষ্ঠিরম্

যদ্বচঃ ফল্গুনেনোক্তং ন জ্যায়োঽস্তি ধনাদিতি
অত্র তে বর্তয়িষ্যামি তদেকাগ্রমনাঃ শৃণু

অজাতশত্রো ধর্মেণ কৃত্স্না তে বসুধা জিতা
তাং জিত্বা ন বৃথা রাজংস্ত্বং পরিত্যক্তুমর্হসি

চতুষ্পদী হি নিঃশ্রেণী কর্মণ্যেষা প্রতিষ্ঠিতা
তাং ক্রমেণ মহাবাহো যথাবজ্জয় পার্থিব

তস্মাত্পার্থ মহায়জ্ঞৈর্যজস্ব বহুদক্ষিণৈঃ
স্বাধ্যায়য়জ্ঞা ঋষয়ো জ্ঞানয়জ্ঞাস্তথাপরে

কর্মনিষ্ঠাংস্তু বুধ্যেথাস্তপোনিষ্ঠাংশ্চ ভারত
বৈখানসানাং রাজেন্দ্র বচনং শ্রূয়তে যথা

ঈহতে ধনহেতোর্যস্তস্যানীহা গরীয়সী
ভূয়ান্দোষঃ প্রবর্ধেত যস্তং ধনমপাশ্রয়েৎ

কৃচ্ছ্রাচ্চ দ্রব্যসংহারং কুর্বন্তি ধনকারণাৎ
ধনেন তৃষিতোঽবুদ্ধ্যা ভ্রূণহত্যাং ন বুধ্যতে

অনর্হতে যদ্দদাতি ন দদাতি যদর্হতে
অনর্হার্হাপরিজ্ঞানাদ্দানধর্মোঽপি দুষ্করঃ

যজ্ঞায় সৃষ্টানি ধনানি ধাত্রা; যষ্টাদিষ্টঃ পুরুষো রক্ষিতা চ
তস্মাত্সর্বং যজ্ঞ এবোপয়োজ্যং; ধনং ততোঽনন্তর এব কামঃ

যজ্ঞৈরিন্দ্রো বিবিধৈরন্নবদ্ভি;র্দেবান্সর্বানভ্যয়ান্মহৌজাঃ
তেনেন্দ্রত্বং প্রাপ্য বিভ্রাজতেঽসৌ; তস্মাদ্যজ্ঞে সর্বমেবোপয়োজ্যম্

মহাদেবঃ সর্বমেধে মহাত্মা; হুত্বাত্মানং দেবদেবো বিভূতঃ
বিশ্বাঁল্লোকান্ব্যাপ্য বিষ্টভ্য কীর্ত্যা; বিরোচতে দ্যুতিমান্কৃত্তিবাসাঃ

আবিক্ষিতঃ পার্থিবো বৈ মরুত্তঃ; স্বৃদ্ধ্যা মর্ত্যো যোঽজয়দ্দেবরাজম্
যজ্ঞে যস্য শ্রীঃ স্বয়ং সংনিবিষ্টা; যস্মিন্ভাণ্ডং কাঞ্চনং সর্বমাসীৎ

হরিশ্চন্দ্রঃ পার্থিবেন্দ্রঃ শ্রুতস্তে; যজ্ঞৈরিষ্ট্বা পুণ্যকৃদ্বীতশোকঃ
ঋদ্ধ্যা শক্রং যোঽজয়ন্মানুষঃ সং;স্তস্মাদ্যজ্ঞে সর্বমেবোপয়োজ্যম্