Utshovঅধ্যায় 19
19.1
যুধিষ্ঠির উবাচ
বেদাহং তাত শাস্ত্রাণি অপরাণি পরাণি চ
উভয়ং বেদবচনং কুরু কর্ম ত্যজেতি চ
19.2
আকুলানি চ শাস্ত্রাণি হেতুভিশ্চিত্রিতানি চ
নিশ্চয়শ্চৈব যন্মাত্রো বেদাহং তং যথাবিধি
19.3
ত্বং তু কেবলমস্ত্রজ্ঞো বীরব্রতমনুষ্ঠিতঃ
শাস্ত্রার্থং তত্ত্বতো গন্তুং ন সমর্থঃ কথংচন
19.4
শাস্ত্রার্থসূক্ষ্মদর্শী যো ধর্মনিশ্চয়কোবিদঃ
তেনাপ্যেবং ন বাচ্যোঽহং যদি ধর্মং প্রপশ্যসি
19.5
ভ্রাতৃসৌহৃদমাস্থায় যদুক্তং বচনং ত্বয়া
ন্যায্যং যুক্তং চ কৌন্তেয় প্রীতোঽহং তেন তেঽর্জুন
19.6
যুদ্ধধর্মেষু সর্বেষু ক্রিয়াণাং নৈপুণেষু চ
ন ত্বয়া সদৃশঃ কশ্চিত্ত্রিষু লোকেষু বিদ্যতে
19.7
ধর্মসূক্ষ্মং তু যদ্বাক্যং তত্র দুষ্প্রতরং ত্বয়া
ধনংজয় ন মে বুদ্ধিমভিশঙ্কিতুমর্হসি
19.8
যুদ্ধশাস্ত্রবিদেব ত্বং ন বৃদ্ধাঃ সেবিতাস্ত্বয়া
সমাসবিস্তরবিদাং ন তেষাং বেত্সি নিশ্চয়ম্
19.9
তপস্ত্যাগো বিধিরিতি নিশ্চয়স্তাত ধীমতাম্
পরং পরং জ্যায় এষাং সৈষা নৈঃশ্রেয়সী গতিঃ
19.10
ন ত্বেতন্মন্যসে পার্থ ন জ্যায়োঽস্তি ধনাদিতি
অত্র তে বর্তয়িষ্যামি যথা নৈতত্প্রধানতঃ
19.11
তপঃস্বাধ্যায়শীলা হি দৃশ্যন্তে ধার্মিকা জনাঃ
ঋষয়স্তপসা যুক্তা যেষাং লোকাঃ সনাতনাঃ
19.12
অজাতশ্মশ্রবো ধীরাস্তথান্যে বনবাসিনঃ
অনন্তা অধনা এব স্বাধ্যায়েন দিবং গতাঃ
19.13
উত্তরেণ তু পন্থানমার্যা বিষয়নিগ্রহাৎ
অবুদ্ধিজং তমস্ত্যক্ত্বা লোকাংস্ত্যাগবতাং গতাঃ
19.14
দক্ষিণেন তু পন্থানং যং ভাস্বন্তং প্রপশ্যসি
এতে ক্রিয়াবতাং লোকা যে শ্মশানানি ভেজিরে
19.15
অনির্দেশ্যা গতিঃ সা তু যাং প্রপশ্যন্তি মোক্ষিণঃ
তস্মাত্ত্যাগঃ প্রধানেষ্টঃ স তু দুঃখঃ প্রবেদিতুম্
19.16
অনুসৃত্য তু শাস্ত্রাণি কবয়ঃ সমবস্থিতাঃ
অপীহ স্যাদপীহ স্যাত্সারাসারদিদৃক্ষয়া
19.17
বেদবাদানতিক্রম্য শাস্ত্রাণ্যারণ্যকানি চ
বিপাট্য কদলীস্কন্ধং সারং দদৃশিরে ন তে
19.18
অথৈকান্তব্যুদাসেন শরীরে পঞ্চভৌতিকে
ইচ্ছাদ্বেষসমায়ুক্তমাত্মানং প্রাহুরিঙ্গিতৈঃ
19.19
অগ্রাহ্যশ্চক্ষুষা সোঽপি অনির্দেশ্যং চ তদ্গিরা
কর্মহেতুপুরস্কারং ভূতেষু পরিবর্ততে
19.20
কল্যাণগোচরং কৃত্বা মনস্তৃষ্ণাং নিগৃহ্য চ
কর্মসংততিমুত্সৃজ্য স্যান্নিরালম্বনঃ সুখী
19.21
অস্মিন্নেবং সূক্ষ্মগম্যে মার্গে সদ্ভির্নিষেবিতে
কথমর্থমনর্থাঢ্যমর্জুন ত্বং প্রশংসসি
19.22
পূর্বশাস্ত্রবিদো হ্যেবং জনাঃ পশ্যন্তি ভারত
ক্রিয়াসু নিরতা নিত্যং দানে যজ্ঞে চ কর্মণি
19.23
ভবন্তি সুদুরাবর্তা হেতুমন্তোঽপি পণ্ডিতাঃ
দৃঢপূর্বশ্রুতা মূঢা নৈতদস্তীতি বাদিনঃ
19.24
অমৃতস্যাবমন্তারো বক্তারো জনসংসদি
চরন্তি বসুধাং কৃত্স্নাং বাবদূকা বহুশ্রুতাঃ
19.25
যান্বয়ং নাভিজানীমঃ কস্তাঞ্জ্ঞাতুমিহার্হতি
এবং প্রাজ্ঞান্সতশ্চাপি মহতঃ শাস্ত্রবিত্তমান্
19.26
তপসা মহদাপ্নোতি বুদ্ধ্যা বৈ বিন্দতে মহৎ
ত্যাগেন সুখমাপ্নোতি সদা কৌন্তেয় ধর্মবিৎ