Utshovঅধ্যায় 18
18.1
বৈশংপায়ন উবাচ
তূষ্ণীংভূতং তু রাজানং পুনরেবার্জুনোঽব্রবীৎ
সংতপ্তঃ শোকদুঃখাভ্যাং রাজ্ঞো বাক্শল্যপীডিতঃ
18.2
কথয়ন্তি পুরাবৃত্তমিতিহাসমিমং জনাঃ
বিদেহরাজ্ঞঃ সংবাদং ভার্যয়া সহ ভারত
18.3
উত্সৃজ্য রাজ্যং ভৈক্ষার্থং কৃতবুদ্ধিং জনেশ্বরম্
বিদেহরাজং মহিষী দুঃখিতা প্রত্যভাষত
18.4
ধনান্যপত্যং মিত্রাণি রত্নানি বিবিধানি চ
পন্থানং পাবনং হিত্বা জনকো মৌণ্ড্যমাস্থিতঃ
18.5
তং দদর্শ প্রিয়া ভার্যা ভৈক্ষ্যবৃত্তিমকিংচনম্
ধানামুষ্টিমুপাসীনং নিরীহং গতমত্সরম্
18.6
তমুবাচ সমাগম্য ভর্তারমকুতোভয়ম্
ক্রুদ্ধা মনস্বিনী ভার্যা বিবিক্তে হেতুমদ্বচঃ
18.7
কথমুত্সৃজ্য রাজ্যং স্বং ধনধান্যসমাচিতম্
কাপালীং বৃত্তিমাস্থায় ধানামুষ্টির্বনেঽচরঃ
18.8
প্রতিজ্ঞা তেঽন্যথা রাজন্বিচেষ্টা চান্যথা তব
যদ্রাজ্যং মহদুত্সৃজ্য স্বল্পে তুষ্যসি পার্থিব
18.9
নৈতেনাতিথয়ো রাজন্দেবর্ষিপিতরস্তথা
শক্যমদ্য ত্বয়া ভর্তুং মোঘস্তেঽয়ং পরিশ্রমঃ
18.10
দেবতাতিথিভিশ্চৈব পিতৃভিশ্চৈব পার্থিব
সর্বৈরেতৈঃ পরিত্যক্তঃ পরিব্রজসি নিষ্ক্রিয়ঃ
18.11
যস্ত্বং ত্রৈবিদ্যবৃদ্ধানাং ব্রাহ্মণানাং সহস্রশঃ
ভর্তা ভূত্বা চ লোকস্য সোঽদ্যান্যৈর্ভৃতিমিচ্ছসি
18.12
শ্রিয়ং হিত্বা প্রদীপ্তাং ত্বং শ্ববত্সংপ্রতি বীক্ষ্যসে
অপুত্রা জননী তেঽদ্য কৌসল্যা চাপতিস্ত্বয়া
18.13
অশীতির্ধর্মকামাস্ত্বাং ক্ষত্রিয়াঃ পর্যুপাসতে
ত্বদাশামভিকাঙ্ক্ষন্ত্যঃ কৃপণাঃ ফলহেতুকাঃ
18.14
তাশ্চ ত্বং বিফলাঃ কুর্বন্কাঁল্লোকান্নু গমিষ্যসি
রাজন্সংশয়িতে মোক্ষে পরতন্ত্রেষু দেহিষু
18.15
নৈব তেঽস্তি পরো লোকো নাপরঃ পাপকর্মণঃ
ধর্ম্যান্দারান্পরিত্যজ্য যস্ত্বমিচ্ছসি জীবিতুম্
18.16
স্রজো গন্ধানলংকারান্বাসাংসি বিবিধানি চ
কিমর্থমভিসংত্যজ্য পরিব্রজসি নিষ্ক্রিয়ঃ
18.17
নিপানং সর্বভূতানাং ভূত্বা ত্বং পাবনং মহৎ
আঢ্যো বনস্পতির্ভূত্বা সোঽদ্যান্যান্পর্যুপাসসে
18.18
খাদন্তি হস্তিনং ন্যাসে ক্রব্যাদা বহবোঽপ্যুত
বহবঃ কৃময়শ্চৈব কিং পুনস্ত্বামনর্থকম্
18.19
য ইমাং কুণ্ডিকাং ভিন্দ্যাত্ত্রিবিষ্টব্ধং চ তে হরেৎ
বাসশ্চাপহরেত্তস্মিন্কথং তে মানসং ভবেৎ
18.20
যস্ত্বয়ং সর্বমুত্সৃজ্য ধানামুষ্টিপরিগ্রহঃ
যদানেন সমং সর্বং কিমিদং মম দীয়তে
ধানামুষ্টিরিহার্থশ্চেত্প্রতিজ্ঞা তে বিনশ্যতি
18.21
কা বাহং তব কো মে ত্বং কোঽদ্য তে ময্যনুগ্রহঃ
প্রশাধি পৃথিবীং রাজন্যত্র তেঽনুগ্রহো ভবেৎ
প্রাসাদং শয়নং যানং বাসাংস্যাভরণানি চ
18.22
শ্রিয়া নিরাশৈরধনৈস্ত্যক্তমিত্রৈরকিংচনৈঃ
সৌখিকৈঃ সংভৃতানর্থান্যঃ সংত্যজসি কিং নু তৎ
18.23
যোঽত্যন্তং প্রতিগৃহ্ণীয়াদ্যশ্চ দদ্যাত্সদৈব হি
তয়োস্ত্বমন্তরং বিদ্ধি শ্রেয়াংস্তাভ্যাং ক উচ্যতে
18.24
সদৈব যাচমানেষু সত্সু দম্ভবিবর্জিষু
এতেষু দক্ষিণা দত্তা দাবাগ্নাবিব দুর্হুতম্
18.25
জাতবেদা যথা রাজন্নাদগ্ধ্বৈবোপশাম্যতি
সদৈব যাচমানো বৈ তথা শাম্যতি ন দ্বিজঃ
18.26
সতাং চ বেদা অন্নং চ লোকেঽস্মিন্প্রকৃতির্ধ্রুবা
ন চেদ্দাতা ভবেদ্দাতা কুতঃ স্যুর্মোক্ষকাঙ্ক্ষিণঃ
18.27
অন্নাদ্গৃহস্থা লোকেঽস্মিন্ভিক্ষবস্তত এব চ
অন্নাত্প্রাণঃ প্রভবতি অন্নদঃ প্রাণদো ভবেৎ
18.28
গৃহস্থেভ্যোঽভিনির্বৃত্তা গৃহস্থানেব সংশ্রিতাঃ
প্রভবং চ প্রতিষ্ঠাং চ দান্তা নিন্দন্ত আসতে
18.29
ত্যাগান্ন ভিক্ষুকং বিদ্যান্ন মৌণ্ড্যান্ন চ যাচনাৎ
ঋজুস্তু যোঽর্থং ত্যজতি তং সুখং বিদ্ধি ভিক্ষুকম্
18.30
অসক্তঃ সক্তবদ্গচ্ছন্নিঃসঙ্গো মুক্তবন্ধনঃ
সমঃ শত্রৌ চ মিত্রে চ স বৈ মুক্তো মহীপতে
18.31
পরিব্রজন্তি দানার্থং মুণ্ডাঃ কাষায়বাসসঃ
সিতা বহুবিধৈঃ পাশৈঃ সংচিন্বন্তো বৃথামিষম্
18.32
ত্রয়ীং চ নাম বার্তাং চ ত্যক্ত্বা পুত্রাংস্ত্যজন্তি যে
ত্রিবিষ্টব্ধং চ বাসশ্চ প্রতিগৃহ্ণন্ত্যবুদ্ধয়ঃ
18.33
অনিষ্কষায়ে কাষায়মীহার্থমিতি বিদ্ধি তৎ
ধর্মধ্বজানাং মুণ্ডানাং বৃত্ত্যর্থমিতি মে মতিঃ
18.34
কাষায়ৈরজিনৈশ্চীরৈর্নগ্নান্মুণ্ডাঞ্জটাধরান্
বিভ্রত্সাধূন্মহারাজ জয় লোকাঞ্জিতেন্দ্রিয়ঃ
18.35
অগ্ন্যাধেয়ানি গুর্বর্থান্ক্রতূন্সপশুদক্ষিণান্
দদাত্যহরহঃ পূর্বং কো নু ধর্মতরস্ততঃ
18.36
তত্ত্বজ্ঞো জনকো রাজা লোকেঽস্মিন্নিতি গীয়তে
সোঽপ্যাসীন্মোহসংপন্নো মা মোহবশমন্বগাঃ
18.37
এবং ধর্মমনুক্রান্তং সদা দানপরৈর্নরৈঃ
আনৃশংস্যগুণোপেতৈঃ কামক্রোধবিবর্জিতাঃ
18.38
পালয়ন্তঃ প্রজাশ্চৈব দানমুত্তমমাস্থিতাঃ
ইষ্টাঁল্লোকানবাপ্স্যামো ব্রহ্মণ্যাঃ সত্যবাদিনঃ