অধ্যায় 17

17.1

যুধিষ্ঠির উবাচ
অসংতোষঃ প্রমাদশ্চ মদো রাগোঽপ্রশান্ততা
বলং মোহোঽভিমানশ্চ উদ্বেগশ্চাপি সর্বশঃ

এভিঃ পাপ্মভিরাবিষ্টো রাজ্যং ত্বমভিকাঙ্ক্ষসি
নিরামিষো বিনির্মুক্তঃ প্রশান্তঃ সুসুখী ভব

য ইমামখিলাং ভূমিং শিষ্যাদেকো মহীপতিঃ
তস্যাপ্যুদরমেবৈকং কিমিদং ত্বং প্রশংসসি

নাহ্না পূরয়িতুং শক্যা ন মাসেন নরর্ষভ
অপূর্যাং পূরয়ন্নিচ্ছামায়ুষাপি ন শক্নুয়াৎ

যথেদ্ধঃ প্রজ্বলত্যগ্নিরসমিদ্ধঃ প্রশাম্যতি
অল্পাহারতয়া ত্বগ্নিং শময়ৌদর্যমুত্থিতম্
জয়োদরং পৃথিব্যা তে শ্রেয়ো নির্জিতয়া জিতম্

মানুষান্কামভোগাংস্ত্বমৈশ্বর্যং চ প্রশংসসি
অভোগিনোঽবলাশ্চৈব যান্তি স্থানমনুত্তমম্

যোগক্ষেমৌ চ রাষ্ট্রস্য ধর্মাধর্মৌ ত্বয়ি স্থিতৌ
মুচ্যস্ব মহতো ভারাত্ত্যাগমেবাভিসংশ্রয়

একোদরকৃতে ব্যাঘ্রঃ করোতি বিঘসং বহু
তমন্যেঽপ্যুপজীবন্তি মন্দবেগংচরা মৃগাঃ

বিষয়ান্প্রতিসংহৃত্য সংন্যাসং কুরুতে যতিঃ
ন চ তুষ্যন্তি রাজানঃ পশ্য বুদ্ধ্যন্তরং যথা

পত্রাহারৈরশ্মকুট্টৈর্দন্তোলূখলিকৈস্তথা
অব্ভক্ষৈর্বায়ুভক্ষৈশ্চ তৈরয়ং নরকো জিতঃ

যশ্চেমাং বসুধাং কৃত্স্নাং প্রশাসেদখিলাং নৃপঃ
তুল্যাশ্মকাঞ্চনো যশ্চ স কৃতার্থো ন পার্থিবঃ

সংকল্পেষু নিরারম্ভো নিরাশো নির্মমো ভব
বিশোকং স্থানমাতিষ্ঠ ইহ চামুত্র চাব্যয়ম্

নিরামিষা ন শোচন্তি শোচসি ত্বং কিমামিষম্
পরিত্যজ্যামিষং সর্বং মৃষাবাদাত্প্রমোক্ষ্যসে

পন্থানৌ পিতৃয়ানশ্চ দেবয়ানশ্চ বিশ্রুতৌ
ঈজানাঃ পিতৃয়ানেন দেবয়ানেন মোক্ষিণঃ

তপসা ব্রহ্মচর্যেণ স্বাধ্যায়েন চ পাবিতাঃ
বিমুচ্য দেহান্বৈ ভান্তি মৃত্যোরবিষয়ং গতাঃ

আমিষং বন্ধনং লোকে কর্মেহোক্তং তথামিষম্
তাভ্যাং বিমুক্তঃ পাশাভ্যাং পদমাপ্নোতি তত্পরম্

অপি গাথামিমাং গীতাং জনকেন বদন্ত্যুত
নির্দ্বংদ্বেন বিমুক্তেন মোক্ষং সমনুপশ্যতা

অনন্তং বত মে বিত্তং যস্য মে নাস্তি কিংচন
মিথিলায়াং প্রদীপ্তায়াং ন মে দহ্যতি কিংচন

প্রজ্ঞাপ্রাসাদমারুহ্য নশোচ্যাঞ্শোচতো জনান্
জগতীস্থানিবাদ্রিস্থো মন্দবুদ্ধীনবেক্ষতে

দৃশ্যং পশ্যতি যঃ পশ্যন্স চক্ষুষ্মান্স বুদ্ধিমান্
অজ্ঞাতানাং চ বিজ্ঞানাত্সংবোধাদ্বুদ্ধিরুচ্যতে

যস্তু বাচং বিজানাতি বহুমানমিয়াত্স বৈ
ব্রহ্মভাবপ্রসূতানাং বৈদ্যানাং ভাবিতাত্মনাম্

যদা ভূতপৃথগ্ভাবমেকস্থমনুপশ্যতি
তত এব চ বিস্তারং ব্রহ্ম সংপদ্যতে তদা

তে জনাস্তাং গতিং যান্তি নাবিদ্বাংসোঽল্পচেতসঃ
নাবুদ্ধয়ো নাতপসঃ সর্বং বুদ্ধৌ প্রতিষ্ঠিতম্