Utshovঅধ্যায় 16
16.1
বৈশংপায়ন উবাচ
অর্জুনস্য বচঃ শ্রুত্বা ভীমসেনোঽত্যমর্ষণঃ
ধৈর্যমাস্থায় তেজস্বী জ্যেষ্ঠং ভ্রাতরমব্রবীৎ
16.2
রাজন্বিদিতধর্মোঽসি ন তেঽস্ত্যবিদিতং ভুবি
উপশিক্ষাম তে বৃত্তং সদৈব ন চ শক্নুমঃ
16.3
ন বক্ষ্যামি ন বক্ষ্যামীত্যেবং মে মনসি স্থিতম্
অতিদুঃখাত্তু বক্ষ্যামি তন্নিবোধ জনাধিপ
16.4
ভবতস্তু প্রমোহেন সর্বং সংশয়িতং কৃতম্
বিক্লবত্বং চ নঃ প্রাপ্তমবলত্বং তথৈব চ
16.5
কথং হি রাজা লোকস্য সর্বশাস্ত্রবিশারদঃ
মোহমাপদ্যতে দৈন্যাদ্যথা কুপুরুষস্তথা
16.6
আগতিশ্চ গতিশ্চৈব লোকস্য বিদিতা তব
আয়ত্যাং চ তদাত্বে চ ন তেঽস্ত্যবিদিতং প্রভো
16.7
এবং গতে মহারাজ রাজ্যং প্রতি জনাধিপ
হেতুমত্র প্রবক্ষ্যামি তদিহৈকমনাঃ শৃণু
16.8
দ্বিবিধো জায়তে ব্যাধিঃ শারীরো মানসস্তথা
পরস্পরং তয়োর্জন্ম নির্দ্বংদ্বং নোপলভ্যতে
16.9
শারীরাজ্জায়তে ব্যাধির্মানসো নাত্র সংশয়ঃ
মানসাজ্জায়তে ব্যাধিঃ শারীর ইতি নিশ্চয়ঃ
16.10
শারীরমানসে দুঃখে যোঽতীতে অনুশোচতি
দুঃখেন লভতে দুঃখং দ্বাবনর্থৌ প্রপদ্যতে
16.11
শীতোষ্ণে চৈব বায়ুশ্চ ত্রয়ঃ শারীরজা গুণাঃ
তেষাং গুণানাং সাম্যং চ তদাহুঃ স্বস্থলক্ষণম্
16.12
তেষামন্যতমোত্সেকে বিধানমুপদিষ্যতে
উষ্ণেন বাধ্যতে শীতং শীতেনোষ্ণং প্রবাধ্যতে
16.13
সত্ত্বং রজস্তমশ্চৈব মানসাঃ স্যুস্ত্রয়ো গুণাঃ
হর্ষেণ বাধ্যতে শোকো হর্ষঃ শোকেন বাধ্যতে
16.14
কশ্চিত্সুখে বর্তমানো দুঃখস্য স্মর্তুমিচ্ছতি
কশ্চিদ্দুঃখে বর্তমানঃ সুখস্য স্মর্তুমিচ্ছতি
16.15
স ত্বং ন দুঃখী দুঃখস্য ন সুখী চ সুখস্য চ
ন দুঃখী সুখজাতস্য ন সুখী দুঃখজস্য বা
16.16
স্মর্তুমর্হসি কৌরব্য দিষ্টং তু বলবত্তরম্
অথ বা তে স্বভাবোঽয়ং যেন পার্থিব কৃষ্যসে
16.17
দৃষ্ট্বা সভাগতাং কৃষ্ণামেকবস্ত্রাং রজস্বলাম্
মিষতাং পাণ্ডুপুত্রাণাং ন তস্য স্মর্তুমর্হসি
16.18
প্রব্রাজনং চ নগরাদজিনৈশ্চ নিবাসনম্
মহারণ্যনিবাসশ্চ ন তস্য স্মর্তুমর্হসি
16.19
জটাসুরাত্পরিক্লেশং চিত্রসেনেন চাহবম্
সৈন্ধবাচ্চ পরিক্লেশং কথং বিস্মৃতবানসি
পুনরজ্ঞাতচর্যায়াং কীচকেন পদা বধম্
16.20
যচ্চ তে দ্রোণভীষ্মাভ্যাং যুদ্ধমাসীদরিংদম
মনসৈকেন তে যুদ্ধমিদং ঘোরমুপস্থিতম্
16.21
যত্র নাস্তি শরৈঃ কার্যং ন মিত্রৈর্ন চ বন্ধুভিঃ
আত্মনৈকেন যোদ্ধব্যং তত্তে যুদ্ধমুপস্থিতম্
16.22
তস্মিন্ননির্জিতে যুদ্ধে প্রাণান্যদি হ মোক্ষ্যসে
অন্যং দেহং সমাস্থায় পুনস্তেনৈব যোত্স্যসে
16.23
তস্মাদদ্যৈব গন্তব্যং যুদ্ধস্য ভরতর্ষভ
এতজ্জিত্বা মহারাজ কৃতকৃত্যো ভবিষ্যসি
16.24
এতাং বুদ্ধিং বিনিশ্চিত্য ভূতানামাগতিং গতিম্
পিতৃপৈতামহে বৃত্তে শাধি রাজ্যং যথোচিতম্
16.25
দিষ্ট্যা দুর্যোধনঃ পাপো নিহতঃ সানুগো যুধি
দ্রৌপদ্যাঃ কেশপক্ষস্য দিষ্ট্যা ত্বং পদবীং গতঃ
16.26
যজস্ব বাজিমেধেন বিধিবদ্দক্ষিণাবতা
বয়ং তে কিংকরাঃ পার্থ বাসুদেবশ্চ বীর্যবান্