Utshovঅধ্যায় 15
15.1
বৈশংপায়ন উবাচ
যাজ্ঞসেন্যা বচঃ শ্রুত্বা পুনরেবার্জুনোঽব্রবীৎ
অনুমান্য মহাবাহুং জ্যেষ্ঠং ভ্রাতরমীশ্বরম্
15.2
দণ্ডঃ শাস্তি প্রজাঃ সর্বা দণ্ড এবাভিরক্ষতি
দণ্ডঃ সুপ্তেষু জাগর্তি দণ্ডং ধর্মং বিদুর্বুধাঃ
15.3
ধর্মং সংরক্ষতে দণ্ডস্তথৈবার্থং নরাধিপ
কামং সংরক্ষতে দণ্ডস্ত্রিবর্গো দণ্ড উচ্যতে
15.4
দণ্ডেন রক্ষ্যতে ধান্যং ধনং দণ্ডেন রক্ষ্যতে
এতদ্বিদ্বন্নুপাদত্স্ব স্বভাবং পশ্য লৌকিকম্
15.5
রাজদণ্ডভয়াদেকে পাপাঃ পাপং ন কুর্বতে
যমদণ্ডভয়াদেকে পরলোকভয়াদপি
15.6
পরস্পরভয়াদেকে পাপাঃ পাপং ন কুর্বতে
এবং সাংসিদ্ধিকে লোকে সর্বং দণ্ডে প্রতিষ্ঠিতম্
15.7
দণ্ডস্যৈব ভয়াদেকে ন খাদন্তি পরস্পরম্
অন্ধে তমসি মজ্জেয়ুর্যদি দণ্ডো ন পালয়েৎ
15.8
যস্মাদদান্তান্দময়ত্যশিষ্টান্দণ্ডয়ত্যপি
দমনাদ্দণ্ডনাচ্চৈব তস্মাদ্দণ্ডং বিদুর্বুধাঃ
15.9
বাচি দণ্ডো ব্রাহ্মণানাং ক্ষত্রিয়াণাং ভুজার্পণম্
দানদণ্ডঃ স্মৃতো বৈশ্যো নির্দণ্ডঃ শূদ্র উচ্যতে
15.10
অসংমোহায় মর্ত্যানামর্থসংরক্ষণায় চ
মর্যাদা স্থাপিতা লোকে দণ্ডসংজ্ঞা বিশাং পতে
15.11
যত্র শ্যামো লোহিতাক্ষো দণ্ডশ্চরতি সূনৃতঃ
প্রজাস্তত্র ন মুহ্যন্তি নেতা চেত্সাধু পশ্যতি
15.12
ব্রহ্মচারী গৃহস্থশ্চ বানপ্রস্থোঽথ ভিক্ষুকঃ
দণ্ডস্যৈব ভয়াদেতে মনুষ্যা বর্ত্মনি স্থিতাঃ
15.13
নাভীতো যজতে রাজন্নাভীতো দাতুমিচ্ছতি
নাভীতঃ পুরুষঃ কশ্চিত্সময়ে স্থাতুমিচ্ছতি
15.14
নাচ্ছিত্ত্বা পরমর্মাণি নাকৃত্বা কর্ম দারুণম্
নাহত্বা মত্স্যঘাতীব প্রাপ্নোতি মহতীং শ্রিয়ম্
15.15
নাঘ্নতঃ কীর্তিরস্তীহ ন বিত্তং ন পুনঃ প্রজাঃ
ইন্দ্রো বৃত্রবধেনৈব মহেন্দ্রঃ সমপদ্যত
15.16
য এব দেবা হন্তারস্তাঁল্লোকোঽর্চয়তে ভৃশম্
হন্তা রুদ্রস্তথা স্কন্দঃ শক্রোঽগ্নির্বরুণো যমঃ
15.17
হন্তা কালস্তথা বায়ুর্মৃত্যুর্বৈশ্রবণো রবিঃ
বসবো মরুতঃ সাধ্যা বিশ্বেদেবাশ্চ ভারত
15.18
এতান্দেবান্নমস্যন্তি প্রতাপপ্রণতা জনাঃ
ন ব্রহ্মাণং ন ধাতারং ন পূষাণং কথংচন
15.19
মধ্যস্থান্সর্বভূতেষু দান্তাঞ্শমপরায়ণান্
যজন্তে মানবাঃ কেচিত্প্রশান্তাঃ সর্বকর্মসু
15.20
ন হি পশ্যামি জীবন্তং লোকে কংচিদহিংসয়া
সত্ত্বৈঃ সত্ত্বানি জীবন্তি দুর্বলৈর্বলবত্তরাঃ
15.21
নকুলো মূষকানত্তি বিডালো নকুলং তথা
বিডালমত্তি শ্বা রাজঞ্শ্বানং ব্যালমৃগস্তথা
15.22
তানত্তি পুরুষঃ সর্বান্পশ্য ধর্মো যথাগতঃ
প্রাণস্যান্নমিদং সর্বং জঙ্গমং স্থাবরং চ যৎ
15.23
বিধানং দেববিহিতং তত্র বিদ্বান্ন মুহ্যতি
যথা সৃষ্টোঽসি রাজেন্দ্র তথা ভবিতুমর্হসি
15.24
বিনীতক্রোধহর্ষা হি মন্দা বনমুপাশ্রিতাঃ
বিনা বধং ন কুর্বন্তি তাপসাঃ প্রাণয়াপনম্
15.25
উদকে বহবঃ প্রাণাঃ পৃথিব্যাং চ ফলেষু চ
ন চ কশ্চিন্ন তান্হন্তি কিমন্যত্প্রাণয়াপনাৎ
15.26
সূক্ষ্ময়োনীনি ভূতানি তর্কগম্যানি কানিচিৎ
পক্ষ্মণোঽপি নিপাতেন যেষাং স্যাত্স্কন্ধপর্যয়ঃ
15.27
গ্রামান্নিষ্ক্রম্য মুনয়ো বিগতক্রোধমত্সরাঃ
বনে কুটুম্বধর্মাণো দৃশ্যন্তে পরিমোহিতাঃ
15.28
ভূমিং ভিত্ত্বৌষধীশ্ছিত্ত্বা বৃক্ষাদীনণ্ডজান্পশূন্
মনুষ্যাস্তন্বতে যজ্ঞাংস্তে স্বর্গং প্রাপ্নুবন্তি চ
15.29
দণ্ডনীত্যাং প্রণীতায়াং সর্বে সিধ্যন্ত্যুপক্রমাঃ
কৌন্তেয় সর্বভূতানাং তত্র মে নাস্তি সংশয়ঃ
15.30
দণ্ডশ্চেন্ন ভবেল্লোকে ব্যনশিষ্যন্নিমাঃ প্রজাঃ
শূলে মত্স্যানিবাপক্ষ্যন্দুর্বলান্বলবত্তরাঃ
15.31
সত্যং চেদং ব্রহ্মণা পূর্বমুক্তং; দণ্ডঃ প্রজা রক্ষতি সাধু নীতঃ
পশ্যাগ্নয়শ্চ প্রতিশাম্যন্ত্যভীতাঃ; সংতর্জিতা দণ্ডভয়াজ্জ্বলন্তি
15.32
অন্ধং তম ইবেদং স্যান্ন প্রজ্ঞায়েত কিংচন
দণ্ডশ্চেন্ন ভবেল্লোকে বিভজন্সাধ্বসাধুনী
15.33
যেঽপি সংভিন্নমর্যাদা নাস্তিকা বেদনিন্দকাঃ
তেঽপি ভোগায় কল্পন্তে দণ্ডেনোপনিপীডিতাঃ
15.34
সর্বো দণ্ডজিতো লোকো দুর্লভো হি শুচির্নরঃ
দণ্ডস্য হি ভয়াদ্ভীতো ভোগায়েহ প্রকল্পতে
15.35
চাতুর্বর্ণ্যাপ্রমোহায় সুনীতনয়নায় চ
দণ্ডো বিধাত্রা বিহিতো ধর্মার্থাবভিরক্ষিতুম্
15.36
যদি দণ্ডান্ন বিভ্যেয়ুর্বয়াংসি শ্বাপদানি চ
অদ্যুঃ পশূন্মনুষ্যাংশ্চ যজ্ঞার্থানি হবীংষি চ
15.37
ন ব্রহ্মচার্যধীয়ীত কল্যাণী গৌর্ন দুহ্যতে
ন কন্যোদ্বহনং গচ্ছেদ্যদি দণ্ডো ন পালয়েৎ
15.38
বিশ্বলোপঃ প্রবর্তেত ভিদ্যেরন্সর্বসেতবঃ
মমত্বং ন প্রজানীয়ুর্যদি দণ্ডো ন পালয়েৎ
15.39
ন সংবত্সরসত্রাণি তিষ্ঠেয়ুরকুতোভয়াঃ
বিধিবদ্দক্ষিণাবন্তি যদি দণ্ডো ন পালয়েৎ
15.40
চরেয়ুর্নাশ্রমে ধর্মং যথোক্তং বিধিমাশ্রিতাঃ
ন বিদ্যাং প্রাপ্নুয়াত্কশ্চিদ্যদি দণ্ডো ন পালয়েৎ
15.41
ন চোষ্ট্রা ন বলীবর্দা নাশ্বাশ্বতরগর্দভাঃ
যুক্তা বহেয়ুর্যানানি যদি দণ্ডো ন পালয়েৎ
15.42
ন প্রেষ্যা বচনং কুর্যুর্ন বালো জাতু কর্হিচিৎ
তিষ্ঠেত্পিতৃমতে ধর্মে যদি দণ্ডো ন পালয়েৎ
15.43
দণ্ডে স্থিতাঃ প্রজাঃ সর্বা ভয়ং দণ্ডং বিদুর্বুধাঃ
দণ্ডে স্বর্গো মনুষ্যাণাং লোকোঽয়ং চ প্রতিষ্ঠিতঃ
15.44
ন তত্র কূটং পাপং বা বঞ্চনা বাপি দৃশ্যতে
যত্র দণ্ডঃ সুবিহিতশ্চরত্যরিবিনাশনঃ
15.45
হবিঃ শ্বা প্রপিবেদ্ধৃষ্টো দণ্ডশ্চেন্নোদ্যতো ভবেৎ
হরেত্কাকঃ পুরোডাশং যদি দণ্ডো ন পালয়েৎ
15.46
যদিদং ধর্মতো রাজ্যং বিহিতং যদ্যধর্মতঃ
কার্যস্তত্র ন শোকো বৈ ভুঙ্ক্ষ্ব ভোগান্যজস্ব চ
15.47
সুখেন ধর্মং শ্রীমন্তশ্চরন্তি শুচিবাসসঃ
সংবসন্তঃ প্রিয়ৈর্দারৈর্ভুঞ্জানাশ্চান্নমুত্তমম্
15.48
অর্থে সর্বে সমারম্ভাঃ সমায়ত্তা ন সংশয়ঃ
স চ দণ্ডে সমায়ত্তঃ পশ্য দণ্ডস্য গৌরবম্
15.49
লোকয়াত্রার্থমেবেহ ধর্মপ্রবচনং কৃতম্
অহিংসা সাধুহিংসেতি শ্রেয়ান্ধর্মপরিগ্রহঃ
15.50
নাত্যন্তগুণবান্কশ্চিন্ন চাপ্যত্যন্তনির্গুণঃ
উভয়ং সর্বকার্যেষু দৃশ্যতে সাধ্বসাধু চ
15.51
পশূনাং বৃষণং ছিত্ত্বা ততো ভিন্দন্তি নস্তকান্
কৃষন্তি বহবো ভারান্বধ্নন্তি দময়ন্তি চ
15.52
এবং পর্যাকুলে লোকে বিপথে জর্জরীকৃতে
তৈস্তৈর্ন্যায়ৈর্মহারাজ পুরাণং ধর্মমাচর
15.53
যজ দেহি প্রজা রক্ষ ধর্মং সমনুপালয়
অমিত্রাঞ্জহি কৌন্তেয় মিত্রাণি পরিপালয়
15.54
মা চ তে নিঘ্নতঃ শত্রূন্মন্যুর্ভবতু ভারত
ন তত্র কিল্বিষং কিংচিত্কর্তুর্ভবতি ভারত
15.55
আততায়ী হি যো হন্যাদাততায়িনমাগতম্
ন তেন ভ্রূণহা স স্যান্মন্যুস্তং মন্যুমৃচ্ছতি
15.56
অবধ্যঃ সর্বভূতানামন্তরাত্মা ন সংশয়ঃ
অবধ্যে চাত্মনি কথং বধ্যো ভবতি কেনচিৎ
15.57
যথা হি পুরুষঃ শালাং পুনঃ সংপ্রবিশেন্নবাম্
এবং জীবঃ শরীরাণি তানি তানি প্রপদ্যতে
15.58
দেহান্পুরাণানুত্সৃজ্য নবান্সংপ্রতিপদ্যতে
এবং মৃত্যুমুখং প্রাহুর্যে জনাস্তত্ত্বদর্শিনঃ