Utshovঅধ্যায় 14
14.1
বৈশংপায়ন উবাচ
অব্যাহরতি কৌন্তেয়ে ধর্মরাজে যুধিষ্ঠিরে
ভ্রাতৄণাং ব্রুবতাং তাংস্তান্বিবিধান্বেদনিশ্চয়ান্
14.2
মহাভিজনসংপন্না শ্রীমত্যায়তলোচনা
অভ্যভাষত রাজেন্দ্রং দ্রৌপদী যোষিতাং বরা
14.3
আসীনমৃষভং রাজ্ঞাং ভ্রাতৃভিঃ পরিবারিতম্
সিংহশার্দূলসদৃশৈর্বারণৈরিব যূথপম্
14.4
অভিমানবতী নিত্যং বিশেষেণ যুধিষ্ঠিরে
লালিতা সততং রাজ্ঞা ধর্মজ্ঞা ধর্মদর্শিনী
14.5
আমন্ত্র্য বিপুলশ্রোণী সাম্না পরমবল্গুনা
ভর্তারমভিসংপ্রেক্ষ্য ততো বচনমব্রবীৎ
14.6
ইমে তে ভ্রাতরঃ পার্থ শুষ্যন্ত স্তোককা ইব
বাবাশ্যমানাস্তিষ্ঠন্তি ন চৈনানভিনন্দসে
14.7
নন্দয়ৈতান্মহারাজ মত্তানিব মহাদ্বিপান্
উপপন্নেন বাক্যেন সততং দুঃখভাগিনঃ
14.8
কথং দ্বৈতবনে রাজন্পূর্বমুক্ত্বা তথা বচঃ
ভ্রাতৄনেতান্স্ম সহিতাঞ্শীতবাতাতপার্দিতান্
14.9
বয়ং দুর্যোধনং হত্বা মৃধে ভোক্ষ্যাম মেদিনীম্
সংপূর্ণাং সর্বকামানামাহবে বিজয়ৈষিণঃ
14.10
বিরথাংশ্চ রথান্কৃত্বা নিহত্য চ মহাগজান্
সংস্তীর্য চ রথৈর্ভূমিং সসাদিভিররিংদমাঃ
14.11
যজতাং বিবিধৈর্যজ্ঞৈঃ সমৃদ্ধৈরাপ্তদক্ষিণৈঃ
বনবাসকৃতং দুঃখং ভবিষ্যতি সুখায় নঃ
14.12
ইত্যেতানেবমুক্ত্বা ত্বং স্বয়ং ধর্মভৃতাং বর
কথমদ্য পুনর্বীর বিনিহংসি মনাংস্যুত
14.13
ন ক্লীবো বসুধাং ভুঙ্ক্তে ন ক্লীবো ধনমশ্নুতে
ন ক্লীবস্য গৃহে পুত্রা মত্স্যাঃ পঙ্ক ইবাসতে
14.14
নাদণ্ডঃ ক্ষত্রিয়ো ভাতি নাদণ্ডো ভূতিমশ্নুতে
নাদণ্ডস্য প্রজা রাজ্ঞঃ সুখমেধন্তি ভারত
14.15
মিত্রতা সর্বভূতেষু দানমধ্যয়নং তপঃ
ব্রাহ্মণস্যৈষ ধর্মঃ স্যান্ন রাজ্ঞো রাজসত্তম
14.16
অসতাং প্রতিষেধশ্চ সতাং চ পরিপালনম্
এষ রাজ্ঞাং পরো ধর্মঃ সমরে চাপলায়নম্
14.17
যস্মিন্ক্ষমা চ ক্রোধশ্চ দানাদানে ভয়াভয়ে
নিগ্রহানুগ্রহৌ চোভৌ স বৈ ধর্মবিদুচ্যতে
14.18
ন শ্রুতেন ন দানেন ন সান্ত্বেন ন চেজ্যয়া
ত্বয়েয়ং পৃথিবী লব্ধা নোত্কোচেন তথাপ্যুত
14.19
যত্তদ্বলমমিত্রাণাং তথা বীরসমুদ্যতম্
হস্ত্যশ্বরথসংপন্নং ত্রিভিরঙ্গৈর্মহত্তরম্
14.20
রক্ষিতং দ্রোণকর্ণাভ্যামশ্বত্থাম্না কৃপেণ চ
তত্ত্বয়া নিহতং বীর তস্মাদ্ভুঙ্ক্ষ্ব বসুংধরাম্
14.21
জম্বূদ্বীপো মহারাজ নানাজনপদায়ুতঃ
ত্বয়া পুরুষশার্দূল দণ্ডেন মৃদিতঃ প্রভো
14.22
জম্বূদ্বীপেন সদৃশঃ ক্রৌঞ্চদ্বীপো নরাধিপ
অপরেণ মহামেরোর্দণ্ডেন মৃদিতস্ত্বয়া
14.23
ক্রৌঞ্চদ্বীপেন সদৃশঃ শাকদ্বীপো নরাধিপ
পূর্বেণ তু মহামেরোর্দণ্ডেন মৃদিতস্ত্বয়া
14.24
উত্তরেণ মহামেরোঃ শাকদ্বীপেন সংমিতঃ
ভদ্রাশ্বঃ পুরুষব্যাঘ্র দণ্ডেন মৃদিতস্ত্বয়া
14.25
দ্বীপাশ্চ সান্তরদ্বীপা নানাজনপদালয়াঃ
বিগাহ্য সাগরং বীর দণ্ডেন মৃদিতাস্ত্বয়া
14.26
এতান্যপ্রতিমানি ত্বং কৃত্বা কর্মাণি ভারত
ন প্রীয়সে মহারাজ পূজ্যমানো দ্বিজাতিভিঃ
14.27
স ত্বং ভ্রাতৄনিমান্দৃষ্ট্বা প্রতিনন্দস্ব ভারত
ঋষভানিব সংমত্তান্গজেন্দ্রানূর্জিতানিব
14.28
অমরপ্রতিমাঃ সর্বে শত্রুসাহাঃ পরংতপাঃ
একোঽপি হি সুখায়ৈষাং ক্ষমঃ স্যাদিতি মে মতিঃ
14.29
কিং পুনঃ পুরুষব্যাঘ্রাঃ পতয়ো মে নরর্ষভাঃ
সমস্তানীন্দ্রিয়াণীব শরীরস্য বিচেষ্টনে
14.30
অনৃতং মাব্রবীচ্ছ্বশ্রূঃ সর্বজ্ঞা সর্বদর্শিনী
যুধিষ্ঠিরস্ত্বাং পাঞ্চালি সুখে ধাস্যত্যনুত্তমে
14.31
হত্বা রাজসহস্রাণি বহূন্যাশুপরাক্রমঃ
তদ্ব্যর্থং সংপ্রপশ্যামি মোহাত্তব জনাধিপ
14.32
যেষামুন্মত্তকো জ্যেষ্ঠঃ সর্বে তস্যোপচারিণঃ
তবোন্মাদেন রাজেন্দ্র সোন্মাদাঃ সর্বপাণ্ডবাঃ
14.33
যদি হি স্যুরনুন্মত্তা ভ্রাতরস্তে জনাধিপ
বদ্ধ্বা ত্বাং নাস্তিকৈঃ সার্ধং প্রশাসেয়ুর্বসুংধরাম্
14.34
কুরুতে মূঢমেবং হি যঃ শ্রেয়ো নাধিগচ্ছতি
ধূপৈরঞ্জনয়োগৈশ্চ নস্যকর্মভিরেব চ
ভেষজৈঃ স চিকিত্স্যঃ স্যাদ্য উন্মার্গেণ গচ্ছতি
14.35
সাহং সর্বাধমা লোকে স্ত্রীণাং ভরতসত্তম
তথা বিনিকৃতামিত্রৈর্যাহমিচ্ছামি জীবিতুম্
14.36
এতেষাং যতমানানামুত্পদ্যন্তে তু সংপদঃ
ত্বং তু সর্বাং মহীং লব্ধ্বা কুরুষে স্বয়মাপদম্
14.37
যথাস্তাং সংমতৌ রাজ্ঞাং পৃথিব্যাং রাজসত্তমৌ
মান্ধাতা চাম্বরীষশ্চ তথা রাজন্বিরাজসে
14.38
প্রশাধি পৃথিবীং দেবীং প্রজা ধর্মেণ পালয়ন্
সপর্বতবনদ্বীপাং মা রাজন্বিমনা ভব
14.39
যজস্ব বিবিধৈর্যজ্ঞৈর্জুহ্বন্নগ্নীন্প্রয়চ্ছ চ
পুরাণি ভোগান্বাসাংসি দ্বিজাতিভ্যো নৃপোত্তম