অধ্যায় 13

13.1

সহদেব উবাচ
ন বাহ্যং দ্রব্যমুত্সৃজ্য সিদ্ধির্ভবতি ভারত
শারীরং দ্রব্যমুত্সৃজ্য সিদ্ধির্ভবতি বা ন বা

বাহ্যদ্রব্যবিমুক্তস্য শারীরেষু চ গৃধ্যতঃ
যো ধর্মো যত্সুখং বা স্যাদ্দ্বিষতাং তত্তথাস্তু নঃ

শারীরং দ্রব্যমুত্সৃজ্য পৃথিবীমনুশাসতঃ
যো ধর্মো যত্সুখং বা স্যাত্সুহৃদাং তত্তথাস্তু নঃ

দ্ব্যক্ষরস্তু ভবেন্মৃত্যুস্ত্র্যক্ষরং ব্রহ্ম শাশ্বতম্
মমেতি চ ভবেন্মৃত্যুর্ন মমেতি চ শাশ্বতম্

ব্রহ্মমৃত্যূ চ তৌ রাজন্নাত্মন্যেব সমাশ্রিতৌ
অদৃশ্যমানৌ ভূতানি যোধয়েতামসংশয়ম্

অবিনাশোঽস্য সত্ত্বস্য নিয়তো যদি ভারত
ভিত্ত্বা শরীরং ভূতানাং ন হিংসা প্রতিপত্স্যতে

অথাপি চ সহোত্পত্তিঃ সত্ত্বস্য প্রলয়স্তথা
নষ্টে শরীরে নষ্টং স্যাদ্বৃথা চ স্যাত্ক্রিয়াপথঃ

তস্মাদেকান্তমুত্সৃজ্য পূর্বৈঃ পূর্বতরৈশ্চ যঃ
পন্থা নিষেবিতঃ সদ্ভিঃ স নিষেব্যো বিজানতা

লব্ধ্বাপি পৃথিবীং কৃত্স্নাং সহস্থাবরজঙ্গমাম্
ন ভুঙ্ক্তে যো নৃপঃ সম্যঙ্নিষ্ফলং তস্য জীবিতম্

অথ বা বসতো রাজন্বনে বন্যেন জীবতঃ
দ্রব্যেষু যস্য মমতা মৃত্যোরাস্যে স বর্ততে

বাহ্যাভ্যন্তরভূতানাং স্বভাবং পশ্য ভারত
যে তু পশ্যন্তি তদ্ভাবং মুচ্যন্তে মহতো ভয়াৎ

ভবান্পিতা ভবান্মাতা ভবান্ভ্রাতা ভবান্গুরুঃ
দুঃখপ্রলাপানার্তস্য তস্মান্মে ক্ষন্তুমর্হসি

তথ্যং বা যদি বাতথ্যং যন্ময়ৈতত্প্রভাষিতম্
তদ্বিদ্ধি পৃথিবীপাল ভক্ত্যা ভরতসত্তম