UtshovChapter 22
22.1
वैशंपायन उवाच
तस्मिन्वाक्यान्तरे वाक्यं पुनरेवार्जुनोऽब्रवीत्
विषण्णमनसं ज्येष्ठमिदं भ्रातरमीश्वरम्
Vaishampayana uvacha
Tasminvakyantare vakyam punarevarjunobravit
Vishannamanasam jyeshthamidam bhrataramishvaram
22.2
क्षत्रधर्मेण धर्मज्ञ प्राप्य राज्यमनुत्तमम्
जित्वा चारीन्नरश्रेष्ठ तप्यते किं भवान्भृशम्
Kshatradharmena dharmagya prapya rajyamanuttamam
Jitva charinnarashreshtha tapyate kim bhavanbhrisham
22.3
क्षत्रियाणां महाराज संग्रामे निधनं स्मृतम्
विशिष्टं बहुभिर्यज्ञैः क्षत्रधर्ममनुस्मर
Kshatriyanam maharaja sangrame nidhanam smritam
Vishishtam bahubhiryagyaih kshatradharmamanusmara
22.4
ब्राह्मणानां तपस्त्यागः प्रेत्यधर्मविधिः स्मृतः
क्षत्रियाणां च विहितं संग्रामे निधनं विभो
Brahmananam tapastyagah pretyadharmavidhih smritah
Kshatriyanam cha vihitam sangrame nidhanam vibho
22.5
क्षत्रधर्मो महारौद्रः शस्त्रनित्य इति स्मृतः
वधश्च भरतश्रेष्ठ काले शस्त्रेण संयुगे
Kshatradharmo maharaudrah shastranitya iti smritah
Vadhashcha bharatashreshtha kale shastrena sanyuge
22.6
ब्राह्मणस्यापि चेद्राजन्क्षत्रधर्मेण तिष्ठतः
प्रशस्तं जीवितं लोके क्षत्रं हि ब्रह्मसंस्थितम्
Brahmanasyapi chedrajankshatradharmena tishthatah
Prashastam jivitam loke kshatram hi brahmasansthitam
22.7
न त्यागो न पुनर्याच्ञा न तपो मनुजेश्वर
क्षत्रियस्य विधीयन्ते न परस्वोपजीवनम्
Na tyago na punaryachnya na tapo manujeshvara
Kshatriyasya vidhiyante na parasvopajivanam
22.8
स भवान्सर्वधर्मज्ञः सर्वात्मा भरतर्षभ
राजा मनीषी निपुणो लोके दृष्टपरावरः
Sa bhavansarvadharmagyah sarvatma bharatarshabha
Raja manishi nipuno loke drishtaparavarah
22.9
त्यक्त्वा संतापजं शोकं दंशितो भव कर्मणि
क्षत्रियस्य विशेषेण हृदयं वज्रसंहतम्
Tyaktva santapajam shokam danshito bhava karmani
Kshatriyasya visheshena hridayam vajrasanhatam
22.10
जित्वारीन्क्षत्रधर्मेण प्राप्य राज्यमकण्टकम्
विजितात्मा मनुष्येन्द्र यज्ञदानपरो भव
Jitvarinkshatradharmena prapya rajyamakantakam
Vijitatma manushyendra yagyadanaparo bhava
22.11
इन्द्रो वै ब्रह्मणः पुत्रः कर्मणा क्षत्रियोऽभवत्
ज्ञातीनां पापवृत्तीनां जघान नवतीर्नव
Indro vai brahmanah putrah karmana kshatriyobhavat
Gyatinam papavrittinam jaghana navatirnava
22.12
तच्चास्य कर्म पूज्यं हि प्रशस्यं च विशां पते
तेन चेन्द्रत्वमापेदे देवानामिति नः श्रुतम्
Tachchasya karma pujyam hi prashasyam cha visham pate
Tena chendratvamapede devanamiti nah shrutam
22.13
स त्वं यज्ञैर्महाराज यजस्व बहुदक्षिणैः
यथैवेन्द्रो मनुष्येन्द्र चिराय विगतज्वरः
Sa tvam yagyairmaharaja yajasva bahudakshinaih
Yathaivendro manushyendra chiraya vigatajvarah
22.14
मा त्वमेवंगते किंचित्क्षत्रियर्षभ शोचिथाः
गतास्ते क्षत्रधर्मेण शस्त्रपूताः परां गतिम्
Ma tvamevangate kinchitkshatriyarshabha shochithah
Gataste kshatradharmena shastraputah param gatim
22.15
भवितव्यं तथा तच्च यद्वृत्तं भरतर्षभ
दिष्टं हि राजशार्दूल न शक्यमतिवर्तितुम्
Bhavitavyam tatha tachcha yadvrittam bharatarshabha
Dishtam hi rajashardula na shakyamativartitum