UtshovChapter 33
33.1
युधिष्ठिर उवाच
हताः पुत्राश्च पौत्राश्च भ्रातरः पितरस्तथा
श्वशुरा गुरवश्चैव मातुलाः सपितामहाः
Yudhishthira uvacha
Hatah putrashcha pautrashcha bhratarah pitarastatha
Shvashura guravashchaiva matulah sapitamahah
33.2
क्षत्रियाश्च महात्मानः संबन्धिसुहृदस्तथा
वयस्या ज्ञातयश्चैव भ्रातरश्च पितामह
Kshatriyashcha mahatmanah sambandhisuhridastatha
Vayasya gyatayashchaiva bhratarashcha pitamaha
33.3
बहवश्च मनुष्येन्द्रा नानादेशसमागताः
घातिता राज्यलुब्धेन मयैकेन पितामह
Bahavashcha manushyendra nanadeshasamagatah
Ghatita rajyalubdhena mayaikena pitamaha
33.4
तांस्तादृशानहं हत्वा धर्मनित्यान्महीक्षितः
असकृत्सोमपान्वीरान्किं प्राप्स्यामि तपोधन
Tanstadrishanaham hatva dharmanityanmahikshitah
Asakritsomapanvirankim prapsyami tapodhana
33.5
दह्याम्यनिशमद्याहं चिन्तयानः पुनः पुनः
हीनां पार्थिवसिंहैस्तैः श्रीमद्भिः पृथिवीमिमाम्
Dahyamyanishamadyaham chintayanah punah punah
Hinam parthivasinhaistaih shrimadbhih prithivimimam
33.6
दृष्ट्वा ज्ञातिवधं घोरं हतांश्च शतशः परान्
कोटिशश्च नरानन्यान्परितप्ये पितामह
Drishtva gyativadham ghoram hatanshcha shatashah paran
Kotishashcha narananyanparitapye pitamaha
33.7
का नु तासां वरस्त्रीणामवस्थाद्य भविष्यति
विहीनानां स्वतनयैः पतिभिर्भ्रातृभिस्तथा
Ka nu tasam varastrinamavasthadya bhavishyati
Vihinanam svatanayaih patibhirbhratribhistatha
33.8
अस्मानन्तकरान्घोरान्पाण्डवान्वृष्णिसंहितान्
आक्रोशन्त्यः कृशा दीना निपतन्त्यश्च भूतले
Asmanantakaranghoranpandavanvrishnisanhitan
Akroshantyah krisha dina nipatantyashcha bhutale
33.9
अपश्यन्त्यः पितॄन्भ्रातॄन्पतीन्पुत्रांश्च योषितः
त्यक्त्वा प्राणान्प्रियान्सर्वा गमिष्यन्ति यमक्षयम्
Apashyantyah pitrinbhratrinpatinputranshcha yoshitah
Tyaktva prananpriyansarva gamishyanti yamakshayam
33.10
वत्सलत्वाद्द्विजश्रेष्ठ तत्र मे नास्ति संशयः
व्यक्तं सौक्ष्म्याच्च धर्मस्य प्राप्स्यामः स्त्रीवधं वयम्
Vatsalatvaddvijashreshtha tatra me nasti sanshayah
Vyaktam saukshmyachcha dharmasya prapsyamah strivadham vayam
33.11
ते वयं सुहृदो हत्वा कृत्वा पापमनन्तकम्
नरके निपतिष्यामो ह्यधःशिरस एव च
Te vayam suhrido hatva kritva papamanantakam
Narake nipatishyamo hyadhahshirasa eva cha
33.12
शरीराणि विमोक्ष्यामस्तपसोग्रेण सत्तम
आश्रमांश्च विशेषांस्त्वं ममाचक्ष्व पितामह
Sharirani vimokshyamastapasogrena sattama
Ashramanshcha visheshanstvam mamachakshva pitamaha