UtshovChapter 48
48.1
वैशंपायन उवाच
ततः स च हृषीकेशः स च राजा युधिष्ठिरः
कृपादयश्च ते सर्वे चत्वारः पाण्डवाश्च ह
Vaishampayana uvacha
Tatah sa cha hrishikeshah sa cha raja yudhishthirah
Kripadayashcha te sarve chatvarah pandavashcha ha
48.2
रथैस्ते नगराकारैः पताकाध्वजशोभितैः
ययुराशु कुरुक्षेत्रं वाजिभिः शीघ्रगामिभिः
Rathaiste nagarakaraih patakadhvajashobhitaih
Yayurashu kurukshetram vajibhih shighragamibhih
48.3
तेऽवतीर्य कुरुक्षेत्रं केशमज्जास्थिसंकुलम्
देहन्यासः कृतो यत्र क्षत्रियैस्तैर्महात्मभिः
Tevatirya kurukshetram keshamajjasthisankulam
Dehanyasah krito yatra kshatriyaistairmahatmabhih
48.4
गजाश्वदेहास्थिचयैः पर्वतैरिव संचितम्
नरशीर्षकपालैश्च शङ्खैरिव समाचितम्
Gajashvadehasthichayaih parvatairiva sanchitam
Narashirshakapalaishcha shankhairiva samachitam
48.5
चितासहस्रैर्निचितं वर्मशस्त्रसमाकुलम्
आपानभूमिं कालस्य तदा भुक्तोज्झितामिव
Chitasahasrairnichitam varmashastrasamakulam
Apanabhumim kalasya tada bhuktojjhitamiva
48.6
भूतसंघानुचरितं रक्षोगणनिषेवितम्
पश्यन्तस्ते कुरुक्षेत्रं ययुराशु महारथाः
Bhutasanghanucharitam rakshogananishevitam
Pashyantaste kurukshetram yayurashu maharathah
48.7
गच्छन्नेव महाबाहुः सर्वयादवनन्दनः
युधिष्ठिराय प्रोवाच जामदग्न्यस्य विक्रमम्
Gachchhanneva mahabahuh sarvayadavanandanah
Yudhishthiraya provacha jamadagnyasya vikramam
48.8
अमी रामह्रदाः पञ्च दृश्यन्ते पार्थ दूरतः
येषु संतर्पयामास पूर्वान्क्षत्रियशोणितैः
Ami ramahradah pancha drishyante partha duratah
Yeshu santarpayamasa purvankshatriyashonitaih
48.9
त्रिःसप्तकृत्वो वसुधां कृत्वा निःक्षत्रियां प्रभुः
इहेदानीं ततो रामः कर्मणो विरराम ह
Trihsaptakritvo vasudham kritva nihkshatriyam prabhuh
Ihedanim tato ramah karmano virarama ha
48.10
युधिष्ठिर उवाच
त्रिःसप्तकृत्वः पृथिवी कृता निःक्षत्रिया तदा
रामेणेति यदात्थ त्वमत्र मे संशयो महान्
Yudhishthira uvacha
Trihsaptakritvah prithivi krita nihkshatriya tada
Rameneti yadattha tvamatra me sanshayo mahan
48.11
क्षत्रबीजं यदा दग्धं रामेण यदुपुंगव
कथं भूयः समुत्पत्तिः क्षत्रस्यामितविक्रम
Kshatrabijam yada dagdham ramena yadupungava
Katham bhuyah samutpattih kshatrasyamitavikrama
48.12
महात्मना भगवता रामेण यदुपुंगव
कथमुत्सादितं क्षत्रं कथं वृद्धिं पुनर्गतम्
Mahatmana bhagavata ramena yadupungava
Kathamutsaditam kshatram katham vriddhim punargatam
48.13
महाभारतयुद्धे हि कोटिशः क्षत्रिया हताः
तथाभूच्च मही कीर्णा क्षत्रियैर्वदतां वर
Mahabharatayuddhe hi kotishah kshatriya hatah
Tathabhuchcha mahi kirna kshatriyairvadatam vara
48.14
एवं मे छिन्धि वार्ष्णेय संशयं तार्क्ष्यकेतन
आगमो हि परः कृष्ण त्वत्तो नो वासवानुज
Evam me chhindhi varshneya sanshayam tarkshyaketana
Agamo hi parah krishna tvatto no vasavanuja
48.15
वैशंपायन उवाच
ततो व्रजन्नेव गदाग्रजः प्रभुः; शशंस तस्मै निखिलेन तत्त्वतः
युधिष्ठिरायाप्रतिमौजसे तदा; यथाभवत्क्षत्रियसंकुला मही
Vaishampayana uvacha
Tato vrajanneva gadagrajah prabhuh; shashansa tasmai nikhilena tattvatah
Yudhishthirayapratimaujase tada; yathabhavatkshatriyasankula mahi