UtshovChapter 51
51.1
वैशंपायन उवाच
श्रुत्वा तु वचनं भीष्मो वासुदेवस्य धीमतः
किंचिदुन्नाम्य वदनं प्राञ्जलिर्वाक्यमब्रवीत्
Vaishampayana uvacha
Shrutva tu vachanam bhishmo vasudevasya dhimatah
Kinchidunnamya vadanam pranjalirvakyamabravit
51.2
नमस्ते भगवन्विष्णो लोकानां निधनोद्भव
त्वं हि कर्ता हृषीकेश संहर्ता चापराजितः
Namaste bhagavanvishno lokanam nidhanodbhava
Tvam hi karta hrishikesha sanharta chaparajitah
51.3
विश्वकर्मन्नमस्तेऽस्तु विश्वात्मन्विश्वसंभव
अपवर्गोऽसि भूतानां पञ्चानां परतः स्थितः
Vishvakarmannamastestu vishvatmanvishvasambhava
Apavargosi bhutanam panchanam paratah sthitah
51.4
नमस्ते त्रिषु लोकेषु नमस्ते परतस्त्रिषु
योगेश्वर नमस्तेऽस्तु त्वं हि सर्वपरायणम्
Namaste trishu lokeshu namaste paratastrishu
Yogeshvara namastestu tvam hi sarvaparayanam
51.5
मत्संश्रितं यदात्थ त्वं वचः पुरुषसत्तम
तेन पश्यामि ते दिव्यान्भावान्हि त्रिषु वर्त्मसु
Matsanshritam yadattha tvam vachah purushasattama
Tena pashyami te divyanbhavanhi trishu vartmasu
51.6
तच्च पश्यामि तत्त्वेन यत्ते रूपं सनातनम्
सप्त मार्गा निरुद्धास्ते वायोरमिततेजसः
Tachcha pashyami tattvena yatte rupam sanatanam
Sapta marga niruddhaste vayoramitatejasah
51.7
दिवं ते शिरसा व्याप्तं पद्भ्यां देवी वसुंधरा
दिशो भुजौ रविश्चक्षुर्वीर्ये शक्रः प्रतिष्ठितः
Divam te shirasa vyaptam padbhyam devi vasundhara
Disho bhujau ravishchakshurvirye shakrah pratishthitah
51.8
अतसीपुष्पसंकाशं पीतवाससमच्युतम्
वपुर्ह्यनुमिमीमस्ते मेघस्येव सविद्युतः
Atasipushpasankasham pitavasasamachyutam
Vapurhyanumimimaste meghasyeva savidyutah
51.9
त्वत्प्रपन्नाय भक्ताय गतिमिष्टां जिगीषवे
यच्छ्रेयः पुण्डरीकाक्ष तद्ध्यायस्व सुरोत्तम
Tvatprapannaya bhaktaya gatimishtam jigishave
Yachchhreyah pundarikaksha taddhyayasva surottama
51.10
वासुदेव उवाच
यतः खलु परा भक्तिर्मयि ते पुरुषर्षभ
ततो वपुर्मया दिव्यं तव राजन्प्रदर्शितम्
Vasudeva uvacha
Yatah khalu para bhaktirmayi te purusharshabha
Tato vapurmaya divyam tava rajanpradarshitam
51.11
न ह्यभक्ताय राजेन्द्र भक्तायानृजवे न च
दर्शयाम्यहमात्मानं न चादान्ताय भारत
Na hyabhaktaya rajendra bhaktayanrijave na cha
Darshayamyahamatmanam na chadantaya bharata
51.12
भवांस्तु मम भक्तश्च नित्यं चार्जवमास्थितः
दमे तपसि सत्ये च दाने च निरतः शुचिः
Bhavanstu mama bhaktashcha nityam charjavamasthitah
Dame tapasi satye cha dane cha niratah shuchih
51.13
अर्हस्त्वं भीष्म मां द्रष्टुं तपसा स्वेन पार्थिव
तव ह्युपस्थिता लोका येभ्यो नावर्तते पुनः
Arhastvam bhishma mam drashtum tapasa svena parthiva
Tava hyupasthita loka yebhyo navartate punah
51.14
पञ्चाशतं षट्च कुरुप्रवीर; शेषं दिनानां तव जीवितस्य
ततः शुभैः कर्मफलोदयैस्त्वं; समेष्यसे भीष्म विमुच्य देहम्
Panchashatam shatcha kurupravira; shesham dinanam tava jivitasya
Tatah shubhaih karmaphalodayaistvam; sameshyase bhishma vimuchya deham
51.15
एते हि देवा वसवो विमाना;न्यास्थाय सर्वे ज्वलिताग्निकल्पाः
अन्तर्हितास्त्वां प्रतिपालयन्ति; काष्ठां प्रपद्यन्तमुदक्पतंगम्
Ete hi deva vasavo vimana;nyasthaya sarve jvalitagnikalpah
Antarhitastvam pratipalayanti; kashtham prapadyantamudakpatangam
51.16
व्यावृत्तमात्रे भगवत्युदीचीं; सूर्ये दिशं कालवशात्प्रपन्ने
गन्तासि लोकान्पुरुषप्रवीर; नावर्तते यानुपलभ्य विद्वान्
Vyavrittamatre bhagavatyudichim; surye disham kalavashatprapanne
Gantasi lokanpurushapravira; navartate yanupalabhya vidvan
51.17
अमुं च लोकं त्वयि भीष्म याते; ज्ञानानि नङ्क्ष्यन्त्यखिलेन वीर
अतः स्म सर्वे त्वयि संनिकर्षं; समागता धर्मविवेचनाय
Amum cha lokam tvayi bhishma yate; gyanani nankshyantyakhilena vira
Atah sma sarve tvayi sannikarsham; samagata dharmavivechanaya
51.18
तज्ज्ञातिशोकोपहतश्रुताय; सत्याभिसंधाय युधिष्ठिराय
प्रब्रूहि धर्मार्थसमाधियुक्त;मर्थ्यं वचोऽस्यापनुदास्य शोकम्
Tajgyatishokopahatashrutaya; satyabhisandhaya yudhishthiraya
Prabruhi dharmarthasamadhiyukta;marthyam vachosyapanudasya shokam