UtshovChapter 55
55.1
वैशंपायन उवाच
अथाब्रवीन्महातेजा वाक्यं कौरवनन्दनः
हन्त धर्मान्प्रवक्ष्यामि दृढे वाङ्मनसी मम
तव प्रसादाद्गोविन्द भूतात्मा ह्यसि शाश्वतः
Vaishampayana uvacha
Athabravinmahateja vakyam kauravanandanah
Hanta dharmanpravakshyami dridhe vanmanasi mama
Tava prasadadgovinda bhutatma hyasi shashvatah
55.2
युधिष्ठिरस्तु मां राजा धर्मान्समनुपृच्छतु
एवं प्रीतो भविष्यामि धर्मान्वक्ष्यामि चानघ
Yudhishthirastu mam raja dharmansamanuprichchhatu
Evam prito bhavishyami dharmanvakshyami chanagha
55.3
यस्मिन्राजर्षभे जाते धर्मात्मनि महात्मनि
अहृष्यन्नृषयः सर्वे स मां पृच्छतु पाण्डवः
Yasminrajarshabhe jate dharmatmani mahatmani
Ahrishyannrishayah sarve sa mam prichchhatu pandavah
55.4
सर्वेषां दीप्तयशसां कुरूणां धर्मचारिणाम्
यस्य नास्ति समः कश्चित्स मां पृच्छतु पाण्डवः
Sarvesham diptayashasam kurunam dharmacharinam
Yasya nasti samah kashchitsa mam prichchhatu pandavah
55.5
धृतिर्दमो ब्रह्मचर्यं क्षमा धर्मश्च नित्यदा
यस्मिन्नोजश्च तेजश्च स मां पृच्छतु पाण्डवः
Dhritirdamo brahmacharyam kshama dharmashcha nityada
Yasminnojashcha tejashcha sa mam prichchhatu pandavah
55.6
सत्यं दानं तपः शौचं शान्तिर्दाक्ष्यमसंभ्रमः
यस्मिन्नेतानि सर्वाणि स मां पृच्छतु पाण्डवः
Satyam danam tapah shaucham shantirdakshyamasambhramah
Yasminnetani sarvani sa mam prichchhatu pandavah
55.7
यो न कामान्न संरम्भान्न भयान्नार्थकारणात्
कुर्यादधर्मं धर्मात्मा स मां पृच्छतु पाण्डवः
Yo na kamanna sanrambhanna bhayannarthakaranat
Kuryadadharmam dharmatma sa mam prichchhatu pandavah
55.8
संबन्धिनोऽतिथीन्भृत्यान्संश्रितोपाश्रितांश्च यः
संमानयति सत्कृत्य स मां पृच्छतु पाण्डवः
Sambandhinotithinbhrityansanshritopashritanshcha yah
Sammanayati satkritya sa mam prichchhatu pandavah
55.9
सत्यनित्यः क्षमानित्यो ज्ञाननित्योऽतिथिप्रियः
यो ददाति सतां नित्यं स मां पृच्छतु पाण्डवः
Satyanityah kshamanityo gyananityotithipriyah
Yo dadati satam nityam sa mam prichchhatu pandavah
55.10
इज्याध्ययननित्यश्च धर्मे च निरतः सदा
शान्तः श्रुतरहस्यश्च स मां पृच्छतु पाण्डवः
Ijyadhyayananityashcha dharme cha niratah sada
Shantah shrutarahasyashcha sa mam prichchhatu pandavah
55.11
वासुदेव उवाच
लज्जया परयोपेतो धर्मात्मा स युधिष्ठिरः
अभिशापभयाद्भीतो भवन्तं नोपसर्पति
Vasudeva uvacha
Lajjaya parayopeto dharmatma sa yudhishthirah
Abhishapabhayadbhito bhavantam nopasarpati
55.12
लोकस्य कदनं कृत्वा लोकनाथो विशां पते
अभिशापभयाद्भीतो भवन्तं नोपसर्पति
Lokasya kadanam kritva lokanatho visham pate
Abhishapabhayadbhito bhavantam nopasarpati
55.13
पूज्यान्मान्यांश्च भक्तांश्च गुरून्संबन्धिबान्धवान्
अर्घ्यार्हानिषुभिर्हत्वा भवन्तं नोपसर्पति
Pujyanmanyanshcha bhaktanshcha gurunsambandhibandhavan
Arghyarhanishubhirhatva bhavantam nopasarpati
55.14
भीष्म उवाच
ब्राह्मणानां यथा धर्मो दानमध्ययनं तपः
क्षत्रियाणां तथा कृष्ण समरे देहपातनम्
Bhishma uvacha
Brahmananam yatha dharmo danamadhyayanam tapah
Kshatriyanam tatha krishna samare dehapatanam
55.15
पितॄन्पितामहान्पुत्रान्गुरून्संबन्धिबान्धवान्
मिथ्याप्रवृत्तान्यः संख्ये निहन्याद्धर्म एव सः
Pitrinpitamahanputrangurunsambandhibandhavan
Mithyapravrittanyah sankhye nihanyaddharma eva sah
55.16
समयत्यागिनो लुब्धान्गुरूनपि च केशव
निहन्ति समरे पापान्क्षत्रियो यः स धर्मवित्
Samayatyagino lubdhangurunapi cha keshava
Nihanti samare papankshatriyo yah sa dharmavit
55.17
आहूतेन रणे नित्यं योद्धव्यं क्षत्रबन्धुना
धर्म्यं स्वर्ग्यं च लोक्यं च युद्धं हि मनुरब्रवीत्
Ahutena rane nityam yoddhavyam kshatrabandhuna
Dharmyam svargyam cha lokyam cha yuddham hi manurabravit
55.18
वैशंपायन उवाच
एवमुक्तस्तु भीष्मेण धर्मराजो युधिष्ठिरः
विनीतवदुपागम्य तस्थौ संदर्शनेऽग्रतः
Vaishampayana uvacha
Evamuktastu bhishmena dharmarajo yudhishthirah
Vinitavadupagamya tasthau sandarshanegratah
55.19
अथास्य पादौ जग्राह भीष्मश्चाभिननन्द तम्
मूर्ध्नि चैनमुपाघ्राय निषीदेत्यब्रवीत्तदा
Athasya padau jagraha bhishmashchabhinananda tam
Murdhni chainamupaghraya nishidetyabravittada
55.20
तमुवाचाथ गाङ्गेय ऋषभः सर्वधन्विनाम्
पृच्छ मां तात विस्रब्धं मा भैस्त्वं कुरुसत्तम
Tamuvachatha gangeya rishabhah sarvadhanvinam
Prichchha mam tata visrabdham ma bhaistvam kurusattama