UtshovChapter 67
67.1
युधिष्ठिर उवाच
चातुराश्रम्य उक्तोऽत्र चातुर्वर्ण्यस्तथैव च
राष्ट्रस्य यत्कृत्यतमं तन्मे ब्रूहि पितामह
Yudhishthira uvacha
Chaturashramya uktotra chaturvarnyastathaiva cha
Rashtrasya yatkrityatamam tanme bruhi pitamaha
67.2
भीष्म उवाच
राष्ट्रस्यैतत्कृत्यतमं राज्ञ एवाभिषेचनम्
अनिन्द्रमबलं राष्ट्रं दस्यवोऽभिभवन्ति च
Bhishma uvacha
Rashtrasyaitatkrityatamam ragya evabhishechanam
Anindramabalam rashtram dasyavobhibhavanti cha
67.3
अराजकेषु राष्ट्रेषु धर्मो न व्यवतिष्ठते
परस्परं च खादन्ति सर्वथा धिगराजकम्
Arajakeshu rashtreshu dharmo na vyavatishthate
Parasparam cha khadanti sarvatha dhigarajakam
67.4
इन्द्रमेनं प्रवृणुते यद्राजानमिति श्रुतिः
यथैवेन्द्रस्तथा राजा संपूज्यो भूतिमिच्छता
Indramenam pravrinute yadrajanamiti shrutih
Yathaivendrastatha raja sampujyo bhutimichchhata
67.5
नाराजकेषु राष्ट्रेषु वस्तव्यमिति वैदिकम्
नाराजकेषु राष्ट्रेषु हव्यमग्निर्वहत्यपि
Narajakeshu rashtreshu vastavyamiti vaidikam
Narajakeshu rashtreshu havyamagnirvahatyapi
67.6
अथ चेदभिवर्तेत राज्यार्थी बलवत्तरः
अराजकानि राष्ट्राणि हतराजानि वा पुनः
Atha chedabhivarteta rajyarthi balavattarah
Arajakani rashtrani hatarajani va punah
67.7
प्रत्युद्गम्याभिपूज्यः स्यादेतदत्र सुमन्त्रितम्
न हि पापात्पापतरमस्ति किंचिदराजकात्
Pratyudgamyabhipujyah syadetadatra sumantritam
Na hi papatpapataramasti kinchidarajakat
67.8
स चेत्समनुपश्येत समग्रं कुशलं भवेत्
बलवान्हि प्रकुपितः कुर्यान्निःशेषतामपि
Sa chetsamanupashyeta samagram kushalam bhavet
Balavanhi prakupitah kuryannihsheshatamapi
67.9
भूयांसं लभते क्लेशं या गौर्भवति दुर्दुहा
सुदुहा या तु भवति नैव तां क्लेशयन्त्युत
Bhuyansam labhate klesham ya gaurbhavati durduha
Suduha ya tu bhavati naiva tam kleshayantyuta
67.10
यदतप्तं प्रणमति न तत्संतापयन्त्युत
यच्च स्वयं नतं दारु न तत्संनामयन्त्यपि
Yadataptam pranamati na tatsantapayantyuta
Yachcha svayam natam daru na tatsannamayantyapi
67.11
एतयोपमया धीरः संनमेत बलीयसे
इन्द्राय स प्रणमते नमते यो बलीयसे
Etayopamaya dhirah sannameta baliyase
Indraya sa pranamate namate yo baliyase
67.12
तस्माद्राजैव कर्तव्यः सततं भूतिमिच्छता
न धनार्थो न दारार्थस्तेषां येषामराजकम्
Tasmadrajaiva kartavyah satatam bhutimichchhata
Na dhanartho na dararthastesham yeshamarajakam
67.13
प्रीयते हि हरन्पापः परवित्तमराजके
यदास्य उद्धरन्त्यन्ये तदा राजानमिच्छति
Priyate hi haranpapah paravittamarajake
Yadasya uddharantyanye tada rajanamichchhati
67.14
पापा अपि तदा क्षेमं न लभन्ते कदाचन
एकस्य हि द्वौ हरतो द्वयोश्च बहवोऽपरे
Papa api tada kshemam na labhante kadachana
Ekasya hi dvau harato dvayoshcha bahavopare
67.15
अदासः क्रियते दासो ह्रियन्ते च बलात्स्त्रियः
एतस्मात्कारणाद्देवाः प्रजापालान्प्रचक्रिरे
Adasah kriyate daso hriyante cha balatstriyah
Etasmatkaranaddevah prajapalanprachakrire
67.16
राजा चेन्न भवेल्लोके पृथिव्यां दण्डधारकः
शूले मत्स्यानिवापक्ष्यन्दुर्बलान्बलवत्तराः
Raja chenna bhavelloke prithivyam dandadharakah
Shule matsyanivapakshyandurbalanbalavattarah
67.17
अराजकाः प्रजाः पूर्वं विनेशुरिति नः श्रुतम्
परस्परं भक्षयन्तो मत्स्या इव जले कृशान्
Arajakah prajah purvam vineshuriti nah shrutam
Parasparam bhakshayanto matsya iva jale krishan
67.18
ताः समेत्य ततश्चक्रुः समयानिति नः श्रुतम्
वाक्क्रूरो दण्डपुरुषो यश्च स्यात्पारदारिकः
यश्च न स्वमथादद्यात्त्याज्या नस्तादृशा इति
Tah sametya tatashchakruh samayaniti nah shrutam
Vakkruro dandapurusho yashcha syatparadarikah
Yashcha na svamathadadyattyajya nastadrisha iti
67.19
विश्वासनार्थं वर्णानां सर्वेषामविशेषतः
तास्तथा समयं कृत्वा समये नावतस्थिरे
Vishvasanartham varnanam sarveshamavisheshatah
Tastatha samayam kritva samaye navatasthire
67.20
सहितास्तास्तदा जग्मुरसुखार्ताः पितामहम्
अनीश्वरा विनश्यामो भगवन्नीश्वरं दिश
Sahitastastada jagmurasukhartah pitamaham
Anishvara vinashyamo bhagavannishvaram disha
67.21
यं पूजयेम संभूय यश्च नः परिपालयेत्
ताभ्यो मनुं व्यादिदेश मनुर्नाभिननन्द ताः
Yam pujayema sambhuya yashcha nah paripalayet
Tabhyo manum vyadidesha manurnabhinananda tah
67.22
मनुरुवाच
बिभेमि कर्मणः क्रूराद्राज्यं हि भृशदुष्करम्
विशेषतो मनुष्येषु मिथ्यावृत्तिषु नित्यदा
Manuruvacha
Bibhemi karmanah kruradrajyam hi bhrishadushkaram
Visheshato manushyeshu mithyavrittishu nityada
67.23
भीष्म उवाच
तमब्रुवन्प्रजा मा भैः कर्मणैनो गमिष्यति
पशूनामधिपञ्चाशद्धिरण्यस्य तथैव च
धान्यस्य दशमं भागं दास्यामः कोशवर्धनम्
Bhishma uvacha
Tamabruvanpraja ma bhaih karmanaino gamishyati
Pashunamadhipanchashaddhiranyasya tathaiva cha
Dhanyasya dashamam bhagam dasyamah koshavardhanam
67.24
मुख्येन शस्त्रपत्रेण ये मनुष्याः प्रधानतः
भवन्तं तेऽनुयास्यन्ति महेन्द्रमिव देवताः
Mukhyena shastrapatrena ye manushyah pradhanatah
Bhavantam tenuyasyanti mahendramiva devatah
67.25
स त्वं जातबलो राजन्दुष्प्रधर्षः प्रतापवान्
सुखे धास्यसि नः सर्वान्कुबेर इव नैरृतान्
Sa tvam jatabalo rajandushpradharshah pratapavan
Sukhe dhasyasi nah sarvankubera iva nairritan
67.26
यं च धर्मं चरिष्यन्ति प्रजा राज्ञा सुरक्षिताः
चतुर्थं तस्य धर्मस्य त्वत्संस्थं नो भविष्यति
Yam cha dharmam charishyanti praja ragya surakshitah
Chaturtham tasya dharmasya tvatsanstham no bhavishyati
67.27
तेन धर्मेण महता सुखलब्धेन भावितः
पाह्यस्मान्सर्वतो राजन्देवानिव शतक्रतुः
Tena dharmena mahata sukhalabdhena bhavitah
Pahyasmansarvato rajandevaniva shatakratuh
67.28
विजयायाशु निर्याहि प्रतपन्रश्मिमानिव
मानं विधम शत्रूणां धर्मो जयतु नः सदा
Vijayayashu niryahi pratapanrashmimaniva
Manam vidhama shatrunam dharmo jayatu nah sada
67.29
स निर्ययौ महातेजा बलेन महता वृतः
महाभिजनसंपन्नस्तेजसा प्रज्वलन्निव
Sa niryayau mahateja balena mahata vritah
Mahabhijanasampannastejasa prajvalanniva
67.30
तस्य तां महिमां दृष्ट्वा महेन्द्रस्येव देवताः
अपतत्रसिरे सर्वे स्वधर्मे च दधुर्मनः
Tasya tam mahimam drishtva mahendrasyeva devatah
Apatatrasire sarve svadharme cha dadhurmanah
67.31
ततो महीं परिययौ पर्जन्य इव वृष्टिमान्
शमयन्सर्वतः पापान्स्वकर्मसु च योजयन्
Tato mahim pariyayau parjanya iva vrishtiman
Shamayansarvatah papansvakarmasu cha yojayan
67.32
एवं ये भूतिमिच्छेयुः पृथिव्यां मानवाः क्वचित्
कुर्यू राजानमेवाग्रे प्रजानुग्रहकारणात्
Evam ye bhutimichchheyuh prithivyam manavah kvachit
Kuryu rajanamevagre prajanugrahakaranat
67.33
नमस्येयुश्च तं भक्त्या शिष्या इव गुरुं सदा
देवा इव सहस्राक्षं प्रजा राजानमन्तिके
Namasyeyushcha tam bhaktya shishya iva gurum sada
Deva iva sahasraksham praja rajanamantike
67.34
सत्कृतं स्वजनेनेह परोऽपि बहु मन्यते
स्वजनेन त्ववज्ञातं परे परिभवन्त्युत
Satkritam svajaneneha paropi bahu manyate
Svajanena tvavagyatam pare paribhavantyuta
67.35
राज्ञः परैः परिभवः सर्वेषामसुखावहः
तस्माच्छत्रं च पत्रं च वासांस्याभरणानि च
Ragyah paraih paribhavah sarveshamasukhavahah
Tasmachchhatram cha patram cha vasansyabharanani cha
67.36
भोजनान्यथ पानानि राज्ञे दद्युर्गृहाणि च
आसनानि च शय्याश्च सर्वोपकरणानि च
Bhojananyatha panani ragye dadyurgrihani cha
Asanani cha shayyashcha sarvopakaranani cha
67.37
गुप्तात्मा स्याद्दुराधर्षः स्मितपूर्वाभिभाषिता
आभाषितश्च मधुरं प्रतिभाषेत मानवान्
Guptatma syadduradharshah smitapurvabhibhashita
Abhashitashcha madhuram pratibhasheta manavan
67.38
कृतज्ञो दृढभक्तिः स्यात्संविभागी जितेन्द्रियः
ईक्षितः प्रतिवीक्षेत मृदु चर्जु च वल्गु च
Kritagyo dridhabhaktih syatsanvibhagi jitendriyah
Ikshitah prativiksheta mridu charju cha valgu cha