অধ্যায় 71

71.1

যুধিষ্ঠির উবাচ
কেন বৃত্তেন বৃত্তজ্ঞ বর্তমানো মহীপতিঃ
সুখেনার্থান্সুখোদর্কানিহ চ প্রেত্য চাপ্নুয়াৎ

ভীষ্ম উবাচ
ইয়ং গুণানাং ষট্ত্রিংশত্ষট্ত্রিংশদ্গুণসংয়ুতা
যান্গুণাংস্তু গুণোপেতঃ কুর্বন্গুণমবাপ্নুয়াৎ

চরেদ্ধর্মানকটুকো মুঞ্চেত্স্নেহং ন নাস্তিকঃ
অনৃশংসশ্চরেদর্থং চরেত্কামমনুদ্ধতঃ

প্রিয়ং ব্রূয়াদকৃপণঃ শূরঃ স্যাদবিকত্থনঃ
দাতা নাপাত্রবর্ষী স্যাত্প্রগল্ভঃ স্যাদনিষ্ঠুরঃ

সংদধীত ন চানার্যৈর্বিগৃহ্ণীয়ান্ন বন্ধুভিঃ
নানাপ্তৈঃ কারয়েচ্চারং কুর্যাত্কার্যমপীডয়া

অর্থান্ব্রূয়ান্ন চাসত্সু গুণান্ব্রূয়ান্ন চাত্মনঃ
আদদ্যান্ন চ সাধুভ্যো নাসত্পুরুষমাশ্রয়েৎ

নাপরীক্ষ্য নয়েদ্দণ্ডং ন চ মন্ত্রং প্রকাশয়েৎ
বিসৃজেন্ন চ লুব্ধেভ্যো বিশ্বসেন্নাপকারিষু

অনীর্ষুর্গুপ্তদারঃ স্যাচ্চোক্ষঃ স্যাদঘৃণী নৃপঃ
স্ত্রিয়ং সেবেত নাত্যর্থং মৃষ্টং ভুঞ্জীত নাহিতম্

অস্তব্ধঃ পূজয়েন্মান্যান্গুরূন্সেবেদমায়য়া
অর্চেদ্দেবান্ন দম্ভেন শ্রিয়মিচ্ছেদকুত্সিতাম্

সেবেত প্রণয়ং হিত্বা দক্ষঃ স্যান্ন ত্বকালবিৎ
সান্ত্বয়েন্ন চ ভোগার্থমনুগৃহ্ণন্ন চাক্ষিপেৎ

প্রহরেন্ন ত্ববিজ্ঞায় হত্বা শত্রূন্ন শেষয়েৎ
ক্রোধং কুর্যান্ন চাকস্মান্মৃদুঃ স্যান্নাপকারিষু

এবং চরস্ব রাজ্যস্থো যদি শ্রেয় ইহেচ্ছসি
অতোঽন্যথা নরপতির্ভয়মৃচ্ছত্যনুত্তমম্

ইতি সর্বান্গুণানেতান্যথোক্তান্যোঽনুবর্ততে
অনুভূয়েহ ভদ্রাণি প্রেত্য স্বর্গে মহীয়তে

বৈশংপায়ন উবাচ
ইদং বচঃ শাংতনবস্য শুশ্রুবা;ন্যুধিষ্ঠিরঃ পাণ্ডবমুখ্যসংবৃতঃ
তদা ববন্দে চ পিতামহং নৃপো; যথোক্তমেতচ্চ চকার বুদ্ধিমান্