Utshovঅধ্যায় 72
72.1
যুধিষ্ঠির উবাচ
কথং রাজা প্রজা রক্ষন্নাধিবন্ধেন যুজ্যতে
ধর্মে চ নাপরাধ্নোতি তন্মে ব্রূহি পিতামহ
72.2
ভীষ্ম উবাচ
সমাসেনৈব তে তাত ধর্মান্বক্ষ্যামি নিশ্চিতান্
বিস্তরেণ হি ধর্মাণাং ন জাত্বন্তমবাপ্নুয়াৎ
72.3
ধর্মনিষ্ঠাঞ্শ্রুতবতো বেদব্রতসমাহিতান্
অর্চিতান্বাসয়েথাস্ত্বং গৃহে গুণবতো দ্বিজান্
72.4
প্রত্যুত্থায়োপসংগৃহ্য চরণাবভিবাদ্য চ
অথ সর্বাণি কুর্বীথাঃ কার্যাণি সপুরোহিতঃ
72.5
ধর্মকার্যাণি নির্বর্ত্য মঙ্গলানি প্রয়ুজ্য চ
ব্রাহ্মণান্বাচয়েথাস্ত্বমর্থসিদ্ধিজয়াশিষঃ
72.6
আর্জবেন চ সংপন্নো ধৃত্যা বুদ্ধ্যা চ ভারত
অর্থার্থং পরিগৃহ্ণীয়াত্কামক্রোধৌ চ বর্জয়েৎ
72.7
কামক্রোধৌ পুরস্কৃত্য যোঽর্থং রাজানুতিষ্ঠতি
ন স ধর্মং ন চাপ্যর্থং পরিগৃহ্ণাতি বালিশঃ
72.8
মা স্ম লুব্ধাংশ্চ মূর্খাংশ্চ কামে চার্থেষু যূয়ুজঃ
অলুব্ধান্বুদ্ধিসংপন্নান্সর্বকর্মসু যোজয়েৎ
72.9
মূর্খো হ্যধিকৃতোঽর্থেষু কার্যাণামবিশারদঃ
প্রজাঃ ক্লিশ্নাত্যয়োগেন কামদ্বেষসমন্বিতঃ
72.10
বলিষষ্ঠেন শুল্কেন দণ্ডেনাথাপরাধিনাম্
শাস্ত্রনীতেন লিপ্সেথা বেতনেন ধনাগমম্
72.11
দাপয়িত্বা করং ধর্ম্যং রাষ্ট্রং নিত্যং যথাবিধি
অশেষান্কল্পয়েদ্রাজা যোগক্ষেমানতন্দ্রিতঃ
72.12
গোপায়িতারং দাতারং ধর্মনিত্যমতন্দ্রিতম্
অকামদ্বেষসংয়ুক্তমনুরজ্যন্তি মানবাঃ
72.13
মা স্মাধর্মেণ লাভেন লিপ্সেথাস্ত্বং ধনাগমম্
ধর্মার্থাবধ্রুবৌ তস্য যোঽপশাস্ত্রপরো ভবেৎ
72.14
অপশাস্ত্রপরো রাজা সংচয়ান্নাধিগচ্ছতি
অস্থানে চাস্য তদ্বিত্তং সর্বমেব বিনশ্যতি
72.15
অর্থমূলোঽপহিংসাং চ কুরুতে স্বয়মাত্মনঃ
করৈরশাস্ত্রদৃষ্টৈর্হি মোহাত্সংপীডয়ন্প্রজাঃ
72.16
ঊধশ্ছিন্দ্যাদ্ধি যো ধেন্বাঃ ক্ষীরার্থী ন লভেত্পয়ঃ
এবং রাষ্ট্রময়োগেন পীডিতং ন বিবর্ধতে
72.17
যো হি দোগ্ধ্রীমুপাস্তে তু স নিত্যং লভতে পয়ঃ
এবং রাষ্ট্রমুপায়েন ভুঞ্জানো লভতে ফলম্
72.18
অথ রাষ্ট্রমুপায়েন ভুজ্যমানং সুরক্ষিতম্
জনয়ত্যতুলাং নিত্যং কোশবৃদ্ধিং যুধিষ্ঠির
72.19
দোগ্ধি ধান্যং হিরণ্যং চ প্রজা রাজ্ঞি সুরক্ষিতা
নিত্যং স্বেভ্যঃ পরেভ্যশ্চ তৃপ্তা মাতা যথা পয়ঃ
72.20
মালাকারোপমো রাজন্ভব মাঙ্গারিকোপমঃ
তথা যুক্তশ্চিরং রাষ্ট্রং ভোক্তুং শক্যসি পালয়ন্
72.21
পরচক্রাভিয়ানেন যদি তে স্যাদ্ধনক্ষয়ঃ
অথ সাম্নৈব লিপ্সেথা ধনমব্রাহ্মণেষু যৎ
72.22
মা স্ম তে ব্রাহ্মণং দৃষ্ট্বা ধনস্থং প্রচলেন্মনঃ
অন্ত্যায়ামপ্যবস্থায়াং কিমু স্ফীতস্য ভারত
72.23
ধনানি তেভ্যো দদ্যাস্ত্বং যথাশক্তি যথার্হতঃ
সান্ত্বয়ন্পরিরক্ষংশ্চ স্বর্গমাপ্স্যসি দুর্জয়ম্
72.24
এবং ধর্মেণ বৃত্তেন প্রজাস্ত্বং পরিপালয়ন্
স্বন্তং পুণ্যং যশোবন্তং প্রাপ্স্যসে কুরুনন্দন
72.25
ধর্মেণ ব্যবহারেণ প্রজাঃ পালয় পাণ্ডব
যুধিষ্ঠির তথা যুক্তো নাধিবন্ধেন যোক্ষ্যসে
72.26
এষ এব পরো ধর্মো যদ্রাজা রক্ষতে প্রজাঃ
ভূতানাং হি যথা ধর্মে রক্ষণং চ পরা দয়া
72.27
তস্মাদেবং পরং ধর্মং মন্যন্তে ধর্মকোবিদাঃ
যদ্রাজা রক্ষণে যুক্তো ভূতেষু কুরুতে দয়াম্
72.28
যদহ্না কুরুতে পাপমরক্ষন্ভয়তঃ প্রজাঃ
রাজা বর্ষসহস্রেণ তস্যান্তমধিগচ্ছতি
72.29
যদহ্না কুরুতে পুণ্যং প্রজা ধর্মেণ পালয়ন্
দশ বর্ষসহস্রাণি তস্য ভুঙ্ক্তে ফলং দিবি
72.30
স্বিষ্টিঃ স্বধীতিঃ সুতপা লোকাঞ্জয়তি যাবতঃ
ক্ষণেন তানবাপ্নোতি প্রজা ধর্মেণ পালয়ন্
72.31
এবং ধর্মং প্রয়ত্নেন কৌন্তেয় পরিপালয়ন্
ইহ পুণ্যফলং লব্ধ্বা নাধিবন্ধেন যোক্ষ্যসে
72.32
স্বর্গলোকে চ মহতীং শ্রিয়ং প্রাপ্স্যসি পাণ্ডব
অসংভবশ্চ ধর্মাণামীদৃশানামরাজসু
তস্মাদ্রাজৈব নান্যোঽস্তি যো মহত্ফলমাপ্নুয়াৎ
72.33
স রাজ্যমৃদ্ধিমত্প্রাপ্য ধর্মেণ পরিপালয়ন্
ইন্দ্রং তর্পয় সোমেন কামৈশ্চ সুহৃদো জনান্