Utshovঅধ্যায় 73
73.1
ভীষ্ম উবাচ
য এব তু সতো রক্ষেদসতশ্চ নিবর্হয়েৎ
স এব রাজ্ঞা কর্তব্যো রাজন্রাজপুরোহিতঃ
73.2
অত্রাপ্যুদাহরন্তীমমিতিহাসং পুরাতনম্
পুরূরবস ঐলস্য সংবাদং মাতরিশ্বনঃ
73.3
ঐল উবাচ
কুতঃ স্বিদ্ব্রাহ্মণো জাতো বর্ণাশ্চাপি কুতস্ত্রয়ঃ
কস্মাচ্চ ভবতি শ্রেয়ানেতদ্বায়ো বিচক্ষ্ব মে
73.4
বায়ুরুবাচ
ব্রহ্মণো মুখতঃ সৃষ্টো ব্রাহ্মণো রাজসত্তম
বাহুভ্যাং ক্ষত্রিয়ঃ সৃষ্ট ঊরুভ্যাং বৈশ্য উচ্যতে
73.5
বর্ণানাং পরিচর্যার্থং ত্রয়াণাং পুরুষর্ষভ
বর্ণশ্চতুর্থঃ পশ্চাত্তু পদ্ভ্যাং শূদ্রো বিনির্মিতঃ
73.6
ব্রাহ্মণো জাতমাত্রস্তু পৃথিবীমন্বজায়ত
ঈশ্বরঃ সর্বভূতানাং ধর্মকোশস্য গুপ্তয়ে
73.7
ততঃ পৃথিব্যা গোপ্তারং ক্ষত্রিয়ং দণ্ডধারিণম্
দ্বিতীয়ং বর্ণমকরোত্প্রজানামনুগুপ্তয়ে
73.8
বৈশ্যস্তু ধনধান্যেন ত্রীন্বর্ণান্বিভৃয়াদিমান্
শূদ্রো হ্যেনান্পরিচরেদিতি ব্রহ্মানুশাসনম্
73.9
ঐল উবাচ
দ্বিজস্য ক্ষত্রবন্ধোর্বা কস্যেয়ং পৃথিবী ভবেৎ
ধর্মতঃ সহ বিত্তেন সম্যগ্বায়ো প্রচক্ষ্ব মে
73.10
বায়ুরুবাচ
বিপ্রস্য সর্বমেবৈতদ্যত্কিংচিজ্জগতীগতম্
জ্যেষ্ঠেনাভিজনেনেহ তদ্ধর্মকুশলা বিদুঃ
73.11
স্বমেব ব্রাহ্মণো ভুঙ্ক্তে স্বং বস্তে স্বং দদাতি চ
গুরুর্হি সর্ববর্ণানাং জ্যেষ্ঠঃ শ্রেষ্ঠশ্চ বৈ দ্বিজঃ
73.12
পত্যভাবে যথা স্ত্রী হি দেবরং কুরুতে পতিম্
আনন্তর্যাত্তথা ক্ষত্রং পৃথিবী কুরুতে পতিম্
73.13
এষ তে প্রথমঃ কল্প আপদ্যন্যো ভবেদতঃ
যদি স্বর্গে পরং স্থানং ধর্মতঃ পরিমার্গসি
73.14
যঃ কশ্চিদ্বিজয়েদ্ভূমিং ব্রাহ্মণায় নিবেদয়েৎ
শ্রুতবৃত্তোপপন্নায় ধর্মজ্ঞায় তপস্বিনে
73.15
স্বধর্মপরিতৃপ্তায় যো ন বিত্তপরো ভবেৎ
যো রাজানং নয়েদ্বুদ্ধ্যা সর্বতঃ পরিপূর্ণয়া
73.16
ব্রাহ্মণো হি কুলে জাতঃ কৃতপ্রজ্ঞো বিনীতবাক্
শ্রেয়ো নয়তি রাজানং ব্রুবংশ্চিত্রাং সরস্বতীম্
73.17
রাজা চরতি যং ধর্মং ব্রাহ্মণেন নিদর্শিতম্
শুশ্রূষুরনহংবাদী ক্ষত্রধর্মব্রতে স্থিতঃ
73.18
তাবতা স কৃতপ্রজ্ঞশ্চিরং যশসি তিষ্ঠতি
তস্য ধর্মস্য সর্বস্য ভাগী রাজপুরোহিতঃ
73.19
এবমেব প্রজাঃ সর্বা রাজানমভিসংশ্রিতাঃ
সম্যগ্বৃত্তাঃ স্বধর্মস্থা ন কুতশ্চিদ্ভয়ান্বিতাঃ
73.20
রাষ্ট্রে চরন্তি যং ধর্মং রাজ্ঞা সাধ্বভিরক্ষিতাঃ
চতুর্থং তস্য ধর্মস্য রাজা ভাগং স বিন্দতি
73.21
দেবা মনুষ্যাঃ পিতরো গন্ধর্বোরগরাক্ষসাঃ
যজ্ঞমেবোপজীবন্তি নাস্তি চেষ্টমরাজকে
73.22
ইতো দত্তেন জীবন্তি দেবতাঃ পিতরস্তথা
রাজন্যেবাস্য ধর্মস্য যোগক্ষেমঃ প্রতিষ্ঠিতঃ
73.23
ছায়ায়ামপ্সু বায়ৌ চ সুখমুষ্ণেঽধিগচ্ছতি
অগ্নৌ বাসসি সূর্যে চ সুখং শীতেঽধিগচ্ছতি
73.24
শব্দে স্পর্শে রসে রূপে গন্ধে চ রমতে মনঃ
তেষু ভোগেষু সর্বেষু নভীতো লভতে সুখম্
73.25
অভয়স্যৈব যো দাতা তস্যৈব সুমহত্ফলম্
ন হি প্রাণসমং দানং ত্রিষু লোকেষু বিদ্যতে
73.26
ইন্দ্রো রাজা যমো রাজা ধর্মো রাজা তথৈব চ
রাজা বিভর্তি রূপাণি রাজ্ঞা সর্বমিদং ধৃতম্