Utshovঅধ্যায় 74
74.1
ভীষ্ম উবাচ
রাজ্ঞা পুরোহিতঃ কার্যো ভবেদ্বিদ্বান্বহুশ্রুতঃ
উভৌ সমীক্ষ্য ধর্মার্থাবপ্রমেয়াবনন্তরম্
74.2
ধর্মাত্মা ধর্মবিদ্যেষাং রাজ্ঞাং রাজন্পুরোহিতঃ
রাজা চৈবংগুণো যেষাং কুশলং তেষু সর্বশঃ
74.3
উভৌ প্রজা বর্ধয়তো দেবান্পূর্বান্পরান্পিতৄন্
যৌ সমেয়াস্থিতৌ ধর্মে শ্রদ্ধেয়ৌ সুতপস্বিনৌ
74.4
পরস্পরস্য সুহৃদৌ সংমতৌ সমচেতসৌ
ব্রহ্মক্ষত্রস্য সংমানাত্প্রজাঃ সুখমবাপ্নুয়ুঃ
74.5
বিমাননাত্তয়োরেব প্রজা নশ্যেয়ুরেব হ
ব্রহ্মক্ষত্রং হি সর্বেষাং ধর্মাণাং মূলমুচ্যতে
74.6
অত্রাপ্যুদাহরন্তীমমিতিহাসং পুরাতনম্
ঐলকশ্যপসংবাদং তং নিবোধ যুধিষ্ঠির
74.7
ঐল উবাচ
যদা হি ব্রহ্ম প্রজহাতি ক্ষত্রং; ক্ষত্রং যদা বা প্রজহাতি ব্রহ্ম
অন্বগ্বলং কতমেঽস্মিন্ভজন্তে; তথাবল্যং কতমেঽস্মিন্বিয়ন্তি
74.8
কশ্যপ উবাচ
ব্যৃদ্ধং রাষ্ট্রং ভবতি ক্ষত্রিয়স্য; ব্রহ্ম ক্ষত্রং যত্র বিরুধ্যতে হ
অন্বগ্বলং দস্যবস্তদ্ভজন্তে;ঽবল্যং তথা তত্র বিয়ন্তি সন্তঃ
74.9
নৈষামুক্ষা বর্ধতে নোত উস্রা; ন গর্গরো মথ্যতে নো যজন্তে
নৈষাং পুত্রা বেদমধীয়তে চ; যদা ব্রহ্ম ক্ষত্রিয়াঃ সংত্যজন্তি
74.10
নৈষামুক্ষা বর্ধতে জাতু গেহে; নাধীয়তে সপ্রজা নো যজন্তে
অপধ্বস্তা দস্যুভূতা ভবন্তি; যে ব্রাহ্মণাঃ ক্ষত্রিয়ান্সংত্যজন্তি
74.11
এতৌ হি নিত্যসংয়ুক্তাবিতরেতরধারণে
ক্ষত্রং হি ব্রহ্মণো যোনির্যোনিঃ ক্ষত্রস্য চ দ্বিজাঃ
74.12
উভাবেতৌ নিত্যমভিপ্রপন্নৌ; সংপ্রাপতুর্মহতীং শ্রীপ্রতিষ্ঠাম্
তয়োঃ সংধির্ভিদ্যতে চেত্পুরাণ;স্ততঃ সর্বং ভবতি হি সংপ্রমূঢম্
74.13
নাত্র প্লবং লভতে পারগামী; মহাগাধে নৌরিব সংপ্রণুন্না
চাতুর্বর্ণ্যং ভবতি চ সংপ্রমূঢং; ততঃ প্রজাঃ ক্ষয়সংস্থা ভবন্তি
74.14
ব্রহ্মবৃক্ষো রক্ষ্যমাণো মধু হেম চ বর্ষতি
অরক্ষ্যমাণঃ সততমশ্রু পাপং চ বর্ষতি
74.15
অব্রহ্মচারী চরণাদপেতো; যদা ব্রহ্মা ব্রহ্মণি ত্রাণমিচ্ছেৎ
আশ্চর্যশো বর্ষতি তত্র দেব;স্তত্রাভীক্ষ্ণং দুঃসহাশ্চাবিশন্তি
74.16
স্ত্রিয়ং হত্বা ব্রাহ্মণং বাপি পাপঃ; সভায়াং যত্র লভতেঽনুবাদম্
রাজ্ঞঃ সকাশে ন বিভেতি চাপি; ততো ভয়ং জায়তে ক্ষত্রিয়স্য
74.17
পাপৈঃ পাপে ক্রিয়মাণেঽতিবেলং; ততো রুদ্রো জায়তে দেব এষঃ
পাপৈঃ পাপাঃ সংজনয়ন্তি রুদ্রং; ততঃ সর্বান্সাধ্বসাধূন্হিনস্তি
74.18
ঐল উবাচ
কুতো রুদ্রঃ কীদৃশো বাপি রুদ্রঃ; সত্ত্বৈঃ সত্ত্বং দৃশ্যতে বধ্যমানম্
এতদ্বিদ্বন্কশ্যপ মে প্রচক্ষ্ব; যতো রুদ্রো জায়তে দেব এষঃ
74.19
কশ্যপ উবাচ
আত্মা রুদ্রো হৃদয়ে মানবানাং; স্বং স্বং দেহং পরদেহং চ হন্তি
বাতোত্পাতৈঃ সদৃশং রুদ্রমাহু;র্দাবৈর্জীমূতৈঃ সদৃশং রূপমস্য
74.20
ঐল উবাচ
ন বৈ বাতং পরিবৃনোতি কশ্চি;ন্ন জীমূতো বর্ষতি নৈব দাবঃ
তথায়ুক্তো দৃশ্যতে মানবেষু; কামদ্বেষাদ্বধ্যতে মুচ্যতে চ
74.21
কশ্যপ উবাচ
যথৈকগেহে জাতবেদাঃ প্রদীপ্তঃ; কৃত্স্নং গ্রামং প্রদহেত্স ত্বরাবান্
বিমোহনং কুরুতে দেব এষ; ততঃ সর্বং স্পৃশ্যতে পুণ্যপাপৈঃ
74.22
ঐল উবাচ
যদি দণ্ডঃ স্পৃশতে পুণ্যভাজং; পাপৈঃ পাপে ক্রিয়মাণেঽবিশেষাৎ
কস্য হেতোঃ সুকৃতং নাম কুর্যা;দ্দুষ্কৃতং বা কস্য হেতোর্ন কুর্যাৎ
74.23
কশ্যপ উবাচ
অসংত্যাগাত্পাপকৃতামপাপাং;স্তুল্যো দণ্ডঃ স্পৃশতে মিশ্রভাবাৎ
শুষ্কেণার্দ্রং দহ্যতে মিশ্রভাবা;ন্ন মিশ্রঃ স্যাত্পাপকৃদ্ভিঃ কথংচিৎ
74.24
ঐল উবাচ
সাধ্বসাধূন্ধারয়তীহ ভূমিঃ; সাধ্বসাধূংস্তাপয়তীহ সূর্যঃ
সাধ্বসাধূন্বাতয়তীহ বায়ু;রাপস্তথা সাধ্বসাধূন্বহন্তি
74.25
কশ্যপ উবাচ
এবমস্মিন্বর্ততে লোক এব; নামুত্রৈবং বর্ততে রাজপুত্র
প্রেত্যৈতয়োরন্তরবান্বিশেষো; যো বৈ পুণ্যং চরতে যশ্চ পাপম্
74.26
পুণ্যস্য লোকো মধুমান্ঘৃতার্চি;র্হিরণ্যজ্যোতিরমৃতস্য নাভিঃ
তত্র প্রেত্য মোদতে ব্রহ্মচারী; ন তত্র মৃত্যুর্ন জরা নোত দুঃখম্
74.27
পাপস্য লোকো নিরয়োঽপ্রকাশো; নিত্যং দুঃখঃ শোকভূয়িষ্ঠ এব
তত্রাত্মানং শোচতে পাপকর্মা; বহ্বীঃ সমাঃ প্রপতন্নপ্রতিষ্ঠঃ
74.28
মিথো ভেদাদ্ব্রাহ্মণক্ষত্রিয়াণাং; প্রজা দুঃখং দুঃসহং চাবিশন্তি
এবং জ্ঞাত্বা কার্য এবেহ বিদ্বা;ন্পুরোহিতো নৈকবিদ্যো নৃপেণ
74.29
তং চৈবান্বভিষিচ্যেত তথা ধর্মো বিধীয়তে
অগ্র্যো হি ব্রাহ্মণঃ প্রোক্তঃ সর্বস্যৈবেহ ধর্মতঃ
74.30
পূর্বং হি ব্রাহ্মণাঃ সৃষ্টা ইতি ধর্মবিদো বিদুঃ
জ্যেষ্ঠেনাভিজনেনাস্য প্রাপ্তং সর্বং যদুত্তরম্
74.31
তস্মান্মান্যশ্চ পূজ্যশ্চ ব্রাহ্মণঃ প্রসৃতাগ্রভুক্
সর্বং শ্রেষ্ঠং বরিষ্ঠং চ নিবেদ্যং তস্য ধর্মতঃ
74.32
অবশ্যমেতত্কর্তব্যং রাজ্ঞা বলবতাপি হি
ব্রহ্ম বর্ধয়তি ক্ষত্রং ক্ষত্রতো ব্রহ্ম বর্ধতে