অধ্যায় 75

75.1

ভীষ্ম উবাচ
যোগক্ষেমো হি রাষ্ট্রস্য রাজন্যায়ত্ত উচ্যতে
যোগক্ষেমশ্চ রাজ্ঞোঽপি সমায়ত্তঃ পুরোহিতে

যতাদৃষ্টং ভয়ং ব্রহ্ম প্রজানাং শময়ত্যুত
দৃষ্টং চ রাজা বাহুভ্যাং তদ্রাষ্ট্রং সুখমেধতে

অত্রাপ্যুদাহরন্তীমমিতিহাসং পুরাতনম্
মুচুকুন্দস্য সংবাদং রাজ্ঞো বৈশ্রবণস্য চ

মুচুকুন্দো বিজিত্যেমাং পৃথিবীং পৃথিবীপতিঃ
জিজ্ঞাসমানঃ স্ববলমভ্যয়াদলকাধিপম্

ততো বৈশ্রবণো রাজা রক্ষাংসি সমবাসৃজৎ
তে বলান্যবমৃদ্নন্তঃ প্রাচরংস্তস্য নৈরৃতাঃ

স হন্যমানে সৈন্যে স্বে মুচুকুন্দো নরাধিপঃ
গর্হয়ামাস বিদ্বাংসং পুরোহিতমরিংদমঃ

তত উগ্রং তপস্তপ্ত্বা বসিষ্ঠো ব্রহ্মবিত্তমঃ
রক্ষাংস্যপাবধীত্তত্র পন্থানং চাপ্যবিন্দত

ততো বৈশ্রবণো রাজা মুচুকুন্দমদর্শয়ৎ
বধ্যমানেষু সৈন্যেষু বচনং চেদমব্রবীৎ

ত্বত্তো হি বলিনঃ পূর্বে রাজানঃ সপুরোহিতাঃ
ন চৈবং সমবর্তংস্তে যথা ত্বমিহ বর্তসে

তে খল্বপি কৃতাস্ত্রাশ্চ বলবন্তশ্চ ভূমিপাঃ
আগম্য পর্যুপাসন্তে মামীশং সুখদুঃখয়োঃ

যদ্যস্তি বাহুবীর্যং তে তদ্দর্শয়িতুমর্হসি
কিং ব্রাহ্মণবলেন ত্বমতিমাত্রং প্রবর্তসে

মুচুকুন্দস্ততঃ ক্রুদ্ধঃ প্রত্যুবাচ ধনেশ্বরম্
ন্যায়পূর্বমসংরব্ধমসংভ্রান্তমিদং বচঃ

ব্রহ্মক্ষত্রমিদং সৃষ্টমেকয়োনি স্বয়ংভুবা
পৃথগ্বলবিধানং চ তল্লোকং পরিরক্ষতি

তপোমন্ত্রবলং নিত্যং ব্রাহ্মণেষু প্রতিষ্ঠিতম্
অস্ত্রবাহুবলং নিত্যং ক্ষত্রিয়েষু প্রতিষ্ঠিতম্

তাভ্যাং সংভূয় কর্তব্যং প্রজানাং পরিপালনম্
তথা চ মাং প্রবর্তন্তং গর্হয়স্যলকাধিপ

ততোঽব্রবীদ্বৈশ্রবণো রাজানং সপুরোহিতম্
নাহং রাজ্যমনির্দিষ্টং কস্মৈচিদ্বিদধাম্যুত

নাচ্ছিন্দে চাপি নির্দিষ্টমিতি জানীহি পার্থিব
প্রশাধি পৃথিবীং বীর মদ্দত্তামখিলামিমাম্

মুচুকুন্দ উবাচ
নাহং রাজ্যং ভবদ্দত্তং ভোক্তুমিচ্ছামি পার্থিব
বাহুবীর্যার্জিতং রাজ্যমশ্নীয়ামিতি কাময়ে

ভীষ্ম উবাচ
ততো বৈশ্রবণো রাজা বিস্ময়ং পরমং যয়ৌ
ক্ষত্রধর্মে স্থিতং দৃষ্ট্বা মুচুকুন্দমসংভ্রমম্

ততো রাজা মুচুকুন্দঃ সোঽন্বশাসদ্বসুংধরাম্
বাহুবীর্যার্জিতাং সম্যক্ক্ষত্রধর্মমনুব্রতঃ

এবং যো ব্রহ্মবিদ্রাজা ব্রহ্মপূর্বং প্রবর্ততে
জয়ত্যবিজিতামুর্বীং যশশ্চ মহদশ্নুতে

নিত্যোদকো ব্রাহ্মণঃ স্যান্নিত্যশস্ত্রশ্চ ক্ষত্রিয়ঃ
তয়োর্হি সর্বমায়ত্তং যত্কিংচিজ্জগতীগতম্