Utshovঅধ্যায় 76
76.1
যুধিষ্ঠির উবাচ
যয়া বৃত্ত্যা মহীপালো বিবর্ধয়তি মানবান্
পুণ্যাংশ্চ লোকাঞ্জয়তি তন্মে ব্রূহি পিতামহ
76.2
ভীষ্ম উবাচ
দানশীলো ভবেদ্রাজা যজ্ঞশীলশ্চ ভারত
উপবাসতপঃশীলঃ প্রজানাং পালনে রতঃ
76.3
সর্বাশ্চৈব প্রজা নিত্যং রাজা ধর্মেণ পালয়েৎ
উত্থানেনাপ্রমাদেন পূজয়েচ্চৈব ধার্মিকান্
76.4
রাজ্ঞা হি পূজিতো ধর্মস্ততঃ সর্বত্র পূজ্যতে
যদ্যদাচরতে রাজা তত্প্রজানাং হি রোচতে
76.5
নিত্যমুদ্যতদণ্ডশ্চ ভবেন্মৃত্যুরিবারিষু
নিহন্যাত্সর্বতো দস্যূন্ন কামাত্কস্যচিত্ক্ষমেৎ
76.6
যং হি ধর্মং চরন্তীহ প্রজা রাজ্ঞা সুরক্ষিতাঃ
চতুর্থং তস্য ধর্মস্য রাজা ভারত বিন্দতি
76.7
যদধীতে যদ্যজতে যদ্দদাতি যদর্চতি
রাজা চতুর্থভাক্তস্য প্রজা ধর্মেণ পালয়ন্
76.8
যদ্রাষ্ট্রেঽকুশলং কিংচিদ্রাজ্ঞোঽরক্ষয়তঃ প্রজাঃ
চতুর্থং তস্য পাপস্য রাজা ভারত বিন্দতি
76.9
অপ্যাহুঃ সর্বমেবেতি ভূয়োঽর্ধমিতি নিশ্চয়ঃ
কর্মণঃ পৃথিবীপাল নৃশংসোঽনৃতবাগপি
তাদৃশাত্কিল্বিষাদ্রাজা শৃণু যেন প্রমুচ্যতে
76.10
প্রত্যাহর্তুমশক্যং স্যাদ্ধনং চোরৈর্হৃতং যদি
স্বকোশাত্তত্প্রদেয়ং স্যাদশক্তেনোপজীবতা
76.11
সর্ববর্ণৈঃ সদা রক্ষ্যং ব্রহ্মস্বং ব্রাহ্মণাস্তথা
ন স্থেয়ং বিষয়ে তেষু যোঽপকুর্যাদ্দ্বিজাতিষু
76.12
ব্রহ্মস্বে রক্ষ্যমাণে হি সর্বং ভবতি রক্ষিতম্
তেষাং প্রসাদে নির্বৃত্তে কৃতকৃত্যো ভবেন্নৃপঃ
76.13
পর্জন্যমিব ভূতানি মহাদ্রুমমিব দ্বিজাঃ
নরাস্তমুপজীবন্তি নৃপং সর্বার্থসাধকম্
76.14
ন হি কামাত্মনা রাজ্ঞা সততং শঠবুদ্ধিনা
নৃশংসেনাতিলুব্ধেন শক্যাঃ পালয়িতুং প্রজাঃ
76.15
যুধিষ্ঠির উবাচ
নাহং রাজ্যসুখান্বেষী রাজ্যমিচ্ছাম্যপি ক্ষণম্
ধর্মার্থং রোচয়ে রাজ্যং ধর্মশ্চাত্র ন বিদ্যতে
76.16
তদলং মম রাজ্যেন যত্র ধর্মো ন বিদ্যতে
বনমেব গমিষ্যামি তস্মাদ্ধর্মচিকীর্ষয়া
76.17
তত্র মেধ্যেষ্বরণ্যেষু ন্যস্তদণ্ডো জিতেন্দ্রিয়ঃ
ধর্মমারাধয়িষ্যামি মুনির্মূলফলাশনঃ
76.18
ভীষ্ম উবাচ
বেদাহং তব যা বুদ্ধিরানৃশংস্যগুণৈব সা
ন চ শুদ্ধানৃশংস্যেন শক্যং মহদুপাসিতুম্
76.19
অপি তু ত্বা মৃদুং দান্তমত্যার্যমতিধার্মিকম্
ক্লীবং ধর্মঘৃণায়ুক্তং ন লোকো বহু মন্যতে
76.20
রাজধর্মানবেক্ষস্ব পিতৃপৈতামহোচিতান্
নৈতদ্রাজ্ঞামথো বৃত্তং যথা ত্বং স্থাতুমিচ্ছসি
76.21
ন হি বৈক্লব্যসংসৃষ্টমানৃশংস্যমিহাস্থিতঃ
প্রজাপালনসংভূতং প্রাপ্তা ধর্মফলং হ্যসি
76.22
ন হ্যেতামাশিষং পাণ্ডুর্ন চ কুন্ত্যন্বয়াচত
ন চৈতাং প্রাজ্ঞতাং তাত যয়া চরসি মেধয়া
76.23
শৌর্যং বলং চ সত্ত্বং চ পিতা তব সদাব্রবীৎ
মাহাত্ম্যং বলমৌদার্যং তব কুন্ত্যন্বয়াচত
76.24
নিত্যং স্বাহা স্বধা নিত্যমুভে মানুষদৈবতে
পুত্রেষ্বাশাসতে নিত্যং পিতরো দৈবতানি চ
76.25
দানমধ্যয়নং যজ্ঞঃ প্রজানাং পরিপালনম্
ধর্মমেতমধর্মং বা জন্মনৈবাভ্যজায়িথাঃ
76.26
কালে ধুরি নিয়ুক্তানাং বহতাং ভার আহিতে
সীদতামপি কৌন্তেয় ন কীর্তিরবসীদতি
76.27
সমন্ততো বিনিয়তো বহত্যস্খলিতো হি যঃ
নির্দোষকর্মবচনাত্সিদ্ধিঃ কর্মণ এব সা
76.28
নৈকান্তবিনিপাতেন বিচচারেহ কশ্চন
ধর্মী গৃহী বা রাজা বা ব্রহ্মচার্যথ বা পুনঃ
76.29
অল্পং তু সাধুভূয়িষ্ঠং যত্কর্মোদারমেব তৎ
কৃতমেবাকৃতাচ্ছ্রেয়ো ন পাপীয়োঽস্ত্যকর্মণঃ
76.30
যদা কুলীনো ধর্মজ্ঞঃ প্রাপ্নোত্যৈশ্বর্যমুত্তমম্
যোগক্ষেমস্তদা রাজন্কুশলায়ৈব কল্পতে
76.31
দানেনান্যং বলেনান্যমন্যং সূনৃতয়া গিরা
সর্বতঃ পরিগৃহ্ণীয়াদ্রাজ্যং প্রাপ্যেহ ধার্মিকঃ
76.32
যং হি বৈদ্যাঃ কুলে জাতা অবৃত্তিভয়পীডিতাঃ
প্রাপ্য তৃপ্তাঃ প্রতিষ্ঠন্তি ধর্মঃ কোঽভ্যধিকস্ততঃ
76.33
যুধিষ্ঠির উবাচ
কিং ন্বতঃ পরমং স্বর্গ্যং কা ন্বতঃ প্রীতিরুত্তমা
কিং ন্বতঃ পরমৈশ্বর্যং ব্রূহি মে যদি মন্যসে
76.34
ভীষ্ম উবাচ
যস্মিন্প্রতিষ্ঠিতাঃ সম্যক্ক্ষেমং বিন্দন্তি তত্ক্ষণম্
স স্বর্গজিত্তমোঽস্মাকং সত্যমেতদ্ব্রবীমি তে
76.35
ত্বমেব প্রীতিমাংস্তস্মাত্কুরূণাং কুরুসত্তম
ভব রাজা জয় স্বর্গং সতো রক্ষাসতো জহি
76.36
অনু ত্বা তাত জীবন্তু সুহৃদঃ সাধুভিঃ সহ
পর্জন্যমিব ভূতানি স্বাদুদ্রুমমিবাণ্ডজাঃ
76.37
ধৃষ্টং শূরং প্রহর্তারমনৃশংসং জিতেন্দ্রিয়ম্
বত্সলং সংবিভক্তারমনু জীবন্তু ত্বাং জনাঃ