অধ্যায় 77

77.1

যুধিষ্ঠির উবাচ
স্বকর্মণ্যপরে যুক্তাস্তথৈবান্যে বিকর্মণি
তেষাং বিশেষমাচক্ষ্ব ব্রাহ্মণানাং পিতামহ

ভীষ্ম উবাচ
বিদ্যালক্ষণসংপন্নাঃ সর্বত্রাম্নায়দর্শিনঃ
এতে ব্রহ্মসমা রাজন্ব্রাহ্মণাঃ পরিকীর্তিতাঃ

ঋত্বিগাচার্যসংপন্নাঃ স্বেষু কর্মস্ববস্থিতাঃ
এতে দেবসমা রাজন্ব্রাহ্মণানাং ভবন্ত্যুত

ঋত্বিক্পুরোহিতো মন্ত্রী দূতোঽথার্থানুশাসকঃ
এতে ক্ষত্রসমা রাজন্ব্রাহ্মণানাং ভবন্ত্যুত

অশ্বারোহা গজারোহা রথিনোঽথ পদাতয়ঃ
এতে বৈশ্যসমা রাজন্ব্রাহ্মণানাং ভবন্ত্যুত

জন্মকর্মবিহীনা যে কদর্যা ব্রহ্মবন্ধবঃ
এতে শূদ্রসমা রাজন্ব্রাহ্মণানাং ভবন্ত্যুত

অশ্রোত্রিয়াঃ সর্ব এব সর্বে চানাহিতাগ্নয়ঃ
তান্সর্বান্ধার্মিকো রাজা বলিং বিষ্টিং চ কারয়েৎ

আহ্বায়কা দেবলকা নক্ষত্রগ্রাময়াজকাঃ
এতে ব্রাহ্মণচণ্ডালা মহাপথিকপঞ্চমাঃ

এতেভ্যো বলিমাদদ্যাদ্ধীনকোশো মহীপতিঃ
ঋতে ব্রহ্মসমেভ্যশ্চ দেবকল্পেভ্য এব চ

অব্রাহ্মণানাং বিত্তস্য স্বামী রাজেতি বৈদিকম্
ব্রাহ্মণানাং চ যে কেচিদ্বিকর্মস্থা ভবন্ত্যুত

বিকর্মস্থাস্তু নোপেক্ষ্যা জাতু রাজ্ঞা কথংচন
নিয়ম্যাঃ সংবিভজ্যাশ্চ ধর্মানুগ্রহকাম্যয়া

যস্য স্ম বিষয়ে রাজ্ঞঃ স্তেনো ভবতি বৈ দ্বিজঃ
রাজ্ঞ এবাপরাধং তং মন্যন্তে তদ্বিদো জনাঃ

অবৃত্ত্যা যো ভবেত্স্তেনো বেদবিত্স্নাতকস্তথা
রাজন্স রাজ্ঞা ভর্তব্য ইতি ধর্মবিদো বিদুঃ

স চেন্নো পরিবর্তেত কৃতবৃত্তিঃ পরংতপ
ততো নির্বাসনীয়ঃ স্যাত্তস্মাদ্দেশাত্সবান্ধবঃ