Utshovঅধ্যায় 78
78.1
যুধিষ্ঠির উবাচ
কেষাং রাজা প্রভবতি বিত্তস্য ভরতর্ষভ
কয়া চ বৃত্ত্যা বর্তেত তন্মে ব্রূহি পিতামহ
78.2
ভীষ্ম উবাচ
অব্রাহ্মণানাং বিত্তস্য স্বামী রাজেতি বৈদিকম্
ব্রাহ্মণানাং চ যে কেচিদ্বিকর্মস্থা ভবন্ত্যুত
78.3
বিকর্মস্থাশ্চ নোপেক্ষ্যা বিপ্রা রাজ্ঞা কথংচন
ইতি রাজ্ঞাং পুরাবৃত্তমভিজল্পন্তি সাধবঃ
78.4
যস্য স্ম বিষয়ে রাজ্ঞঃ স্তেনো ভবতি বৈ দ্বিজঃ
রাজ্ঞ এবাপরাধং তং মন্যন্তে কিল্বিষং নৃপ
78.5
অভিশস্তমিবাত্মানং মন্যন্তে তেন কর্মণা
তস্মাদ্রাজর্ষয়ঃ সর্বে ব্রাহ্মণানন্বপালয়ন্
78.6
অত্রাপ্যুদাহরন্তীমমিতিহাসং পুরাতনম্
গীতং কেকয়রাজেন হ্রিয়মাণেন রক্ষসা
78.7
কেকয়ানামধিপতিং রক্ষো জগ্রাহ দারুণম্
স্বাধ্যায়েনান্বিতং রাজন্নরণ্যে সংশিতব্রতম্
78.8
রাজোবাচ
ন মে স্তেনো জনপদে ন কদর্যো ন মদ্যপঃ
নানাহিতাগ্নির্নায়জ্বা মামকান্তরমাবিশঃ
78.9
ন চ মে ব্রাহ্মণোঽবিদ্বান্নাব্রতী নাপ্যসোমপঃ
নানাহিতাগ্নির্বিষয়ে মামকান্তরমাবিশঃ
78.10
নানাপ্তদক্ষিণৈর্যজ্ঞৈর্যজন্তে বিষয়ে মম
অধীতে নাব্রতী কশ্চিন্মামকান্তরমাবিশঃ
78.11
অধীয়তেঽধ্যাপয়ন্তি যজন্তে যাজয়ন্তি চ
দদতি প্রতিগৃহ্ণন্তি ষট্সু কর্মস্ববস্থিতাঃ
78.12
পূজিতাঃ সংবিভক্তাশ্চ মৃদবঃ সত্যবাদিনঃ
ব্রাহ্মণা মে স্বকর্মস্থা মামকান্তরমাবিশঃ
78.13
ন যাচন্তে প্রয়চ্ছন্তি সত্যধর্মবিশারদাঃ
নাধ্যাপয়ন্ত্যধীয়ন্তে যজন্তে ন চ যাজকাঃ
78.14
ব্রাহ্মণান্পরিরক্ষন্তি সংগ্রামেষ্বপলায়িনঃ
ক্ষত্রিয়া মে স্বকর্মস্থা মামকান্তরমাবিশঃ
78.15
কৃষিগোরক্ষবাণিজ্যমুপজীবন্ত্যমায়য়া
অপ্রমত্তাঃ ক্রিয়াবন্তঃ সুব্রতাঃ সত্যবাদিনঃ
78.16
সংবিভাগং দমং শৌচং সৌহৃদং চ ব্যপাশ্রিতাঃ
মম বৈশ্যাঃ স্বকর্মস্থা মামকান্তরমাবিশঃ
78.17
ত্রীন্বর্ণাননুতিষ্ঠন্তি যথাবদনসূয়কাঃ
মম শূদ্রাঃ স্বকর্মস্থা মামকান্তরমাবিশঃ
78.18
কৃপণানাথবৃদ্ধানাং দুর্বলাতুরয়োষিতাম্
সংবিভক্তাস্মি সর্বেষাং মামকান্তরমাবিশঃ
78.19
কুলদেশাদিধর্মাণাং প্রথিতানাং যথাবিধি
অব্যুচ্ছেত্তাস্মি সর্বেষাং মামকান্তরমাবিশঃ
78.20
তপস্বিনো মে বিষয়ে পূজিতাঃ পরিপালিতাঃ
সংবিভক্তাশ্চ সত্কৃত্য মামকান্তরমাবিশঃ
78.21
নাসংবিভজ্য ভোক্তাস্মি ন বিশামি পরস্ত্রিয়ম্
স্বতন্ত্রো জাতু ন ক্রীডে মামকান্তরমাবিশঃ
78.22
নাব্রহ্মচারী ভিক্ষাবান্ভিক্ষুর্বাব্রহ্মচারিকঃ
অনৃত্বিজং হুতং নাস্তি মামকান্তরমাবিশঃ
78.23
নাবজানাম্যহং বৃদ্ধান্ন বৈদ্যান্ন তপস্বিনঃ
রাষ্ট্রে স্বপতি জাগর্মি মামকান্তরমাবিশঃ
78.24
বেদাধ্যয়নসংপন্নস্তপস্বী সর্বধর্মবিৎ
স্বামী সর্বস্য রাজ্যস্য শ্রীমান্মম পুরোহিতঃ
78.25
দানেন দিব্যানভিবাঞ্ছামি লোকা;ন্সত্যেনাথো ব্রাহ্মণানাং চ গুপ্ত্যা
শুশ্রূষয়া চাপি গুরূনুপৈমি; ন মে ভয়ং বিদ্যতে রাক্ষসেভ্যঃ
78.26
ন মে রাষ্ট্রে বিধবা ব্রহ্মবন্ধু;র্ন ব্রাহ্মণঃ কৃপণো নোত চোরঃ
ন পারজায়ী ন চ পাপকর্মা; ন মে ভয়ং বিদ্যতে রাক্ষসেভ্যঃ
78.27
ন মে শস্ত্রৈরনির্ভিন্নমঙ্গে দ্ব্যঙ্গুলমন্তরম্
ধর্মার্থং যুধ্যমানস্য মামকান্তরমাবিশঃ
78.28
গোব্রাহ্মণে চ যজ্ঞে চ নিত্যং স্বস্ত্যয়নং মম
আশাসতে জনা রাষ্ট্রে মামকান্তরমাবিশঃ
78.29
রাক্ষস উবাচ
যস্মাত্সর্বাস্ববস্থাসু ধর্মমেবান্ববেক্ষসে
তস্মাত্প্রাপ্নুহি কৈকেয় গৃহান্স্বস্তি ব্রজাম্যহম্
78.30
যেষাং গোব্রাহ্মণা রক্ষ্যাঃ প্রজা রক্ষ্যাশ্চ কেকয়
ন রক্ষোভ্যো ভয়ং তেষাং কুত এব তু মানুষাৎ
78.31
যেষাং পুরোগমা বিপ্রা যেষাং ব্রহ্মবলং বলম্
প্রিয়াতিথ্যাস্তথা দারাস্তে বৈ স্বর্গজিতো নরাঃ
78.32
ভীষ্ম উবাচ
তস্মাদ্দ্বিজাতীন্রক্ষেত তে হি রক্ষন্তি রক্ষিতাঃ
আশীরেষাং ভবেদ্রাজ্ঞাং রাষ্ট্রং সম্যক্প্রবর্ধতে
78.33
তস্মাদ্রাজ্ঞা বিশেষেণ বিকর্মস্থা দ্বিজাতয়ঃ
নিয়ম্যাঃ সংবিভজ্যাশ্চ প্রজানুগ্রহকারণাৎ
78.34
য এবং বর্ততে রাজা পৌরজানপদেষ্বিহ
অনুভূয়েহ ভদ্রাণি প্রাপ্নোতীন্দ্রসলোকতাম্