Utshovঅধ্যায় 79
79.1
যুধিষ্ঠির উবাচ
ব্যাখ্যাতা ক্ষত্রধর্মেণ বৃত্তিরাপত্সু ভারত
কথংচিদ্বৈশ্যধর্মেণ জীবেদ্বা ব্রাহ্মণো ন বা
79.2
ভীষ্ম উবাচ
অশক্তঃ ক্ষত্রধর্মেণ বৈশ্যধর্মেণ বর্তয়েৎ
কৃষিগোরক্ষমাস্থায় ব্যসনে বৃত্তিসংক্ষয়ে
79.3
যুধিষ্ঠির উবাচ
কানি পণ্যানি বিক্রীণন্স্বর্গলোকান্ন হীয়তে
ব্রাহ্মণো বৈশ্যধর্মেণ বর্তয়ন্ভরতর্ষভ
79.4
ভীষ্ম উবাচ
সুরা লবণমিত্যেব তিলান্কেসরিণঃ পশূন্
ঋষভান্মধু মাংসং চ কৃতান্নং চ যুধিষ্ঠির
79.5
সর্বাস্ববস্থাস্বেতানি ব্রাহ্মণঃ পরিবর্জয়েৎ
এতেষাং বিক্রয়াত্তাত ব্রাহ্মণো নরকং ব্রজেৎ
79.6
অজোঽগ্নির্বরুণো মেষঃ সূর্যোঽশ্বঃ পৃথিবী বিরাট্
ধেনুর্যজ্ঞশ্চ সোমশ্চ ন বিক্রেয়াঃ কথংচন
79.7
পক্বেনামস্য নিময়ং ন প্রশংসন্তি সাধবঃ
নিময়েত্পক্বমামেন ভোজনার্থায় ভারত
79.8
বয়ং সিদ্ধমশিষ্যামো ভবান্সাধয়তামিদম্
এবং সমীক্ষ্য নিময়ন্নাধর্মোঽস্তি কদাচন
79.9
অত্র তে বর্তয়িষ্যামি যথা ধর্মঃ পুরাতনঃ
ব্যবহারপ্রবৃত্তানাং তন্নিবোধ যুধিষ্ঠির
79.10
ভবতেঽহং দদানীদং ভবানেতত্প্রয়চ্ছতু
রুচিতে বর্ততে ধর্মো ন বলাত্সংপ্রবর্ততে
79.11
ইত্যেবং সংপ্রবর্তন্ত ব্যবহারাঃ পুরাতনাঃ
ঋষীণামিতরেষাং চ সাধু চেদমসংশয়ম্
79.12
যুধিষ্ঠির উবাচ
অথ তাত যদা সর্বাঃ শস্ত্রমাদদতে প্রজাঃ
ব্যুত্ক্রামন্তি স্বধর্মেভ্যঃ ক্ষত্রস্য ক্ষীয়তে বলম্
79.13
রাজা ত্রাতা ন লোকে স্যাত্কিং তদা স্যাত্পরায়ণম্
এতন্মে সংশয়ং ব্রূহি বিস্তরেণ পিতামহ
79.14
ভীষ্ম উবাচ
দানেন তপসা যজ্ঞৈরদ্রোহেণ দমেন চ
ব্রাহ্মণপ্রমুখা বর্ণাঃ ক্ষেমমিচ্ছেয়ুরাত্মনঃ
79.15
তেষাং যে বেদবলিনস্ত উত্থায় সমন্ততঃ
রাজ্ঞো বলং বর্ধয়েয়ুর্মহেন্দ্রস্যেব দেবতাঃ
79.16
রাজ্ঞো হি ক্ষীয়মাণস্য ব্রহ্মৈবাহুঃ পরায়ণম্
তস্মাদ্ব্রহ্মবলেনৈব সমুত্থেয়ং বিজানতা
79.17
যদা তু বিজয়ী রাজা ক্ষেমং রাষ্ট্রেঽভিসংদধেৎ
তদা বর্ণা যথাধর্মমাবিশেয়ুঃ স্বকর্মসু
79.18
উন্মর্যাদে প্রবৃত্তে তু দস্যুভিঃ সংকরে কৃতে
সর্বে বর্ণা ন দুষ্যেয়ুঃ শস্ত্রবন্তো যুধিষ্ঠির
79.19
যুধিষ্ঠির উবাচ
অথ চেত্সর্বতঃ ক্ষত্রং প্রদুষ্যেদ্ব্রাহ্মণান্প্রতি
কস্তস্য ব্রাহ্মণস্ত্রাতা কো ধর্মঃ কিং পরায়ণম্
79.20
ভীষ্ম উবাচ
তপসা ব্রহ্মচর্যেণ শস্ত্রেণ চ বলেন চ
অমায়য়া মায়য়া চ নিয়ন্তব্যং তদা ভবেৎ
79.21
ক্ষত্রস্যাভিপ্রবৃদ্ধস্য ব্রাহ্মণেষু বিশেষতঃ
ব্রহ্মৈব সংনিয়ন্তৃ স্যাত্ক্ষত্রং হি ব্রহ্মসংভবম্
79.22
অদ্ভ্যোঽগ্নির্ব্রহ্মতঃ ক্ষত্রমশ্মনো লোহমুত্থিতম্
তেষাং সর্বত্রগং তেজঃ স্বাসু যোনিষু শাম্যতি
79.23
যদা ছিনত্ত্যয়োঽশ্মানমগ্নিশ্চাপোঽভিপদ্যতে
ক্ষত্রং চ ব্রাহ্মণং দ্বেষ্টি তদা শাম্যন্তি তে ত্রয়ঃ
79.24
তস্মাদ্ব্রহ্মণি শাম্যন্তি ক্ষত্রিয়াণাং যুধিষ্ঠির
সমুদীর্ণান্যজেয়ানি তেজাংসি চ বলানি চ
79.25
ব্রহ্মবীর্যে মৃদূভূতে ক্ষত্রবীর্যে চ দুর্বলে
দুষ্টেষু সর্ববর্ণেষু ব্রাহ্মণান্প্রতি সর্বশঃ
79.26
যে তত্র যুদ্ধং কুর্বন্তি ত্যক্ত্বা জীবিতমাত্মনঃ
ব্রাহ্মণান্পরিরক্ষন্তো ধর্মমাত্মানমেব চ
79.27
মনস্বিনো মন্যুমন্তঃ পুণ্যলোকা ভবন্তি তে
ব্রাহ্মণার্থং হি সর্বেষাং শস্ত্রগ্রহণমিষ্যতে
79.28
অতি স্বিষ্টস্বধীতানাং লোকানতি তপস্বিনাম্
অনাশকাগ্ন্যোর্বিশতাং শূরা যান্তি পরাং গতিম্
এবমেবাত্মনস্ত্যাগান্নান্যং ধর্মং বিদুর্জনাঃ
79.29
তেভ্যো নমশ্চ ভদ্রং চ যে শরীরাণি জুহ্বতি
ব্রহ্মদ্বিষো নিয়চ্ছন্তস্তেষাং নোঽস্তু সলোকতা
ব্রহ্মলোকজিতঃ স্বর্গ্যান্বীরাংস্তান্মনুরব্রবীৎ
79.30
যথাশ্বমেধাবভৃথে স্নাতাঃ পূতা ভবন্ত্যুত
দুষ্কৃতঃ সুকৃতশ্চৈব তথা শস্ত্রহতা রণে
79.31
ভবত্যধর্মো ধর্মো হি ধর্মাধর্মাবুভাবপি
কারণাদ্দেশকালস্য দেশকালঃ স তাদৃশঃ
79.32
মৈত্রাঃ ক্রূরাণি কুর্বন্তো জয়ন্তি স্বর্গমুত্তমম্
ধর্ম্যাঃ পাপানি কুর্বন্তো গচ্ছন্তি পরমাং গতিম্
79.33
ব্রাহ্মণস্ত্রিষু কালেষু শস্ত্রং গৃহ্ণন্ন দুষ্যতি
আত্মত্রাণে বর্ণদোষে দুর্গস্য নিয়মেষু চ
79.34
যুধিষ্ঠির উবাচ
অভ্যুত্থিতে দস্যুবলে ক্ষত্রার্থে বর্ণসংকরে
সংপ্রমূঢেষু বর্ণেষু যদ্যন্যোঽভিভবেদ্বলী
79.35
ব্রাহ্মণো যদি বা বৈশ্যঃ শূদ্রো বা রাজসত্তম
দস্যুভ্যোঽথ প্রজা রক্ষেদ্দণ্ডং ধর্মেণ ধারয়ন্
79.36
কার্যং কুর্যান্ন বা কুর্যাত্সংবার্যো বা ভবেন্ন বা
ন স্ম শস্ত্রং গ্রহীতব্যমন্যত্র ক্ষত্রবন্ধুতঃ
79.37
ভীষ্ম উবাচ
অপারে যো ভবেত্পারমপ্লবে যঃ প্লবো ভবেৎ
শূদ্রো বা যদি বাপ্যন্যঃ সর্বথা মানমর্হতি
79.38
যমাশ্রিত্য নরা রাজন্বর্তয়েয়ুর্যথাসুখম্
অনাথাঃ পাল্যমানা বৈ দস্যুভিঃ পরিপীডিতাঃ
79.39
তমেব পূজয়েরংস্তে প্রীত্যা স্বমিব বান্ধবম্
মহদ্ধ্যভীক্ষ্ণং কৌরব্য কর্তা সন্মানমর্হতি
79.40
কিমুক্ষ্ণাবহতা কৃত্যং কিং ধেন্বা চাপ্যদুগ্ধয়া
বন্ধ্যয়া ভার্যয়া কোঽর্থঃ কোঽর্থো রাজ্ঞাপ্যরক্ষতা
79.41
যথা দারুময়ো হস্তী যথা চর্মময়ো মৃগঃ
যথা হ্যনেত্রঃ শকটঃ পথি ক্ষেত্রং যথোষরম্
79.42
এবং ব্রহ্মানধীয়ানং রাজা যশ্চ ন রক্ষিতা
ন বর্ষতি চ যো মেঘঃ সর্ব এতে নিরর্থকাঃ
79.43
নিত্যং যস্তু সতো রক্ষেদসতশ্চ নিবর্হয়েৎ
স এব রাজা কর্তব্যস্তেন সর্বমিদং ধৃতম্