অধ্যায় 80

80.1

যুধিষ্ঠির উবাচ
ক্বসমুত্থাঃ কথংশীলা ঋত্বিজঃ স্যুঃ পিতামহ
কথংবিধাশ্চ রাজেন্দ্র তদ্ব্রূহি বদতাং বর

ভীষ্ম উবাচ
প্রতিকর্ম পুরাচার ঋত্বিজাং স্ম বিধীয়তে
আদৌ ছন্দাংসি বিজ্ঞায় দ্বিজানাং শ্রুতমেব চ

যে ত্বেকরতয়ো নিত্যং ধীরা নাপ্রিয়বাদিনঃ
পরস্পরস্য সুহৃদঃ সংমতাঃ সমদর্শিনঃ

যেষ্বানৃশংস্যং সত্যং চাপ্যহিংসা তপ আর্জবম্
অদ্রোহো নাভিমানশ্চ হ্রীস্তিতিক্ষা দমঃ শমঃ

হ্রীমান্সত্যধৃতির্দান্তো ভূতানামবিহিংসকঃ
অকামদ্বেষসংয়ুক্তস্ত্রিভিঃ শুক্লৈঃ সমন্বিতঃ

অহিংসকো জ্ঞানতৃপ্তঃ স ব্রহ্মাসনমর্হতি
এতে মহর্ত্বিজস্তাত সর্বে মান্যা যথাতথম্

যুধিষ্ঠির উবাচ
যদিদং বেদবচনং দক্ষিণাসু বিধীয়তে
ইদং দেয়মিদং দেয়ং ন ক্বচিদ্ব্যবতিষ্ঠতে

নেদং প্রতি ধনং শাস্ত্রমাপদ্ধর্মমশাস্ত্রতঃ
আজ্ঞা শাস্ত্রস্য ঘোরেয়ং ন শক্তিং সমবেক্ষতে

শ্রদ্ধামারভ্য যষ্টব্যমিত্যেষা বৈদিকী শ্রুতিঃ
মিথ্যোপেতস্য যজ্ঞস্য কিমু শ্রদ্ধা করিষ্যতি

ভীষ্ম উবাচ
ন বেদানাং পরিভবান্ন শাঠ্যেন ন মায়য়া
কশ্চিন্মহদবাপ্নোতি মা তে ভূদ্বুদ্ধিরীদৃশী

যজ্ঞাঙ্গং দক্ষিণাস্তাত বেদানাং পরিবৃংহণম্
ন মন্ত্রা দক্ষিণাহীনাস্তারয়ন্তি কথংচন

শক্তিস্তু পূর্ণপাত্রেণ সংমিতানবমা ভবেৎ
অবশ্যং তাত যষ্টব্যং ত্রিভির্বর্ণৈর্যথাবিধি

সোমো রাজা ব্রাহ্মণানামিত্যেষা বৈদিকী শ্রুতিঃ
তং চ বিক্রেতুমিচ্ছন্তি ন বৃথা বৃত্তিরিষ্যতে
তেন ক্রীতেন ধর্মেণ ততো যজ্ঞঃ প্রতায়তে

ইত্যেবং ধর্মতঃ খ্যাতমৃষিভির্ধর্মবাদিভিঃ
পুমান্যজ্ঞশ্চ সোমশ্চ ন্যায়বৃত্তো যথা ভবেৎ
অন্যায়বৃত্তঃ পুরুষো ন পরস্য ন চাত্মনঃ

শরীরং যজ্ঞপাত্রাণি ইত্যেষা শ্রূয়তে শ্রুতিঃ
তানি সম্যক্প্রণীতানি ব্রাহ্মণানাং মহাত্মনাম্

তপো যজ্ঞাদপি শ্রেষ্ঠমিত্যেষা পরমা শ্রুতিঃ
তত্তে তপঃ প্রবক্ষ্যামি বিদ্বংস্তদপি মে শৃণু

অহিংসা সত্যবচনমানৃশংস্যং দমো ঘৃণা
এতত্তপো বিদুর্ধীরা ন শরীরস্য শোষণম্

অপ্রামাণ্যং চ বেদানাং শাস্ত্রাণাং চাতিলঙ্ঘনম্
অব্যবস্থা চ সর্বত্র তদ্বৈ নাশনমাত্মনঃ

নিবোধ দশহোতৄণাং বিধানং পার্থ যাদৃশম্
চিত্তিঃ স্রুক্চিত্তমাজ্যং চ পবিত্রং জ্ঞানমুত্তমম্

সর্বং জিহ্মং মৃত্যুপদমার্জবং ব্রহ্মণঃ পদম্
এতাবাঞ্জ্ঞানবিষয়ঃ কিং প্রলাপঃ করিষ্যতি