Utshovঅধ্যায় 81
81.1
যুধিষ্ঠির উবাচ
যদপ্যল্পতরং কর্ম তদপ্যেকেন দুষ্করম্
পুরুষেণাসহায়েন কিমু রাজ্যং পিতামহ
81.2
কিংশীলঃ কিংসমাচারো রাজ্ঞোঽর্থসচিবো ভবেৎ
কীদৃশে বিশ্বসেদ্রাজা কীদৃশে নাপি বিশ্বসেৎ
81.3
ভীষ্ম উবাচ
চতুর্বিধানি মিত্রাণি রাজ্ঞাং রাজন্ভবন্ত্যুত
সহার্থো ভজমানশ্চ সহজঃ কৃত্রিমস্তথা
81.4
ধর্মাত্মা পঞ্চমং মিত্রং স তু নৈকস্য ন দ্বয়োঃ
যতো ধর্মস্ততো বা স্যান্মধ্যস্থো বা ততো ভবেৎ
81.5
যস্তস্যার্থো ন রোচেত ন তং তস্য প্রকাশয়েৎ
ধর্মাধর্মেণ রাজানশ্চরন্তি বিজিগীষবঃ
81.6
চতুর্ণাং মধ্যমৌ শ্রেষ্ঠৌ নিত্যং শঙ্ক্যৌ তথাপরৌ
সর্বে নিত্যং শঙ্কিতব্যাঃ প্রত্যক্ষং কার্যমাত্মনঃ
81.7
ন হি রাজ্ঞা প্রমাদো বৈ কর্তব্যো মিত্ররক্ষণে
প্রমাদিনং হি রাজানং লোকাঃ পরিভবন্ত্যুত
81.8
অসাধুঃ সাধুতামেতি সাধুর্ভবতি দারুণঃ
অরিশ্চ মিত্রং ভবতি মিত্রং চাপি প্রদুষ্যতি
81.9
অনিত্যচিত্তঃ পুরুষস্তস্মিন্কো জাতু বিশ্বসেৎ
তস্মাত্প্রধানং যত্কার্যং প্রত্যক্ষং তত্সমাচরেৎ
81.10
একান্তেন হি বিশ্বাসঃ কৃত্স্নো ধর্মার্থনাশকঃ
অবিশ্বাসশ্চ সর্বত্র মৃত্যুনা ন বিশিষ্যতে
81.11
অকালমৃত্যুর্বিশ্বাসো বিশ্বসন্হি বিপদ্যতে
যস্মিন্করোতি বিশ্বাসমিচ্ছতস্তস্য জীবতি
81.12
তস্মাদ্বিশ্বসিতব্যং চ শঙ্কিতব্যং চ কেষুচিৎ
এষা নীতিগতিস্তাত লক্ষ্মীশ্চৈব সনাতনী
81.13
যং মন্যেত মমাভাবাদিমমর্থাগমঃ স্পৃশেৎ
নিত্যং তস্মাচ্ছঙ্কিতব্যমমিত্রং তং বিদুর্বুধাঃ
81.14
যস্য ক্ষেত্রাদপ্যুদকং ক্ষেত্রমন্যস্য গচ্ছতি
ন তত্রানিচ্ছতস্তস্য ভিদ্যেরন্সর্বসেতবঃ
81.15
তথৈবাত্যুদকাদ্ভীতস্তস্য ভেদনমিচ্ছতি
যমেবংলক্ষণং বিদ্যাত্তমমিত্রং বিনির্দিশেৎ
81.16
যঃ সমৃদ্ধ্যা ন তুষ্যেত ক্ষয়ে দীনতরো ভবেৎ
এতদুত্তমমিত্রস্য নিমিত্তমভিচক্ষতে
81.17
যং মন্যেত মমাভাবাদস্যাভাবো ভবেদিতি
তস্মিন্কুর্বীত বিশ্বাসং যথা পিতরি বৈ তথা
81.18
তং শক্ত্যা বর্ধমানশ্চ সর্বতঃ পরিবৃংহয়েৎ
নিত্যং ক্ষতাদ্বারয়তি যো ধর্মেষ্বপি কর্মসু
81.19
ক্ষতাদ্ভীতং বিজানীয়াদুত্তমং মিত্রলক্ষণম্
যে তস্য ক্ষতমিচ্ছন্তি তে তস্য রিপবঃ স্মৃতাঃ
81.20
ব্যসনান্নিত্যভীতোঽসৌ সমৃদ্ধ্যামেব তৃপ্যতে
যত্স্যাদেবংবিধং মিত্রং তদাত্মসমমুচ্যতে
81.21
রূপবর্ণস্বরোপেতস্তিতিক্ষুরনসূয়কঃ
কুলীনঃ শীলসংপন্নঃ স তে স্যাত্প্রত্যনন্তরঃ
81.22
মেধাবী স্মৃতিমান্দক্ষঃ প্রকৃত্যা চানৃশংসবান্
যো মানিতোঽমানিতো বা ন সংদূষ্যেত্কদাচন
81.23
ঋত্বিগ্বা যদি বাচার্যঃ সখা বাত্যন্তসংস্তুতঃ
গৃহে বসেদমাত্যস্তে যঃ স্যাত্পরমপূজিতঃ
81.24
স তে বিদ্যাত্পরং মন্ত্রং প্রকৃতিং চার্থধর্ময়োঃ
বিশ্বাসস্তে ভবেত্তত্র যথা পিতরি বৈ তথা
81.25
নৈব দ্বৌ ন ত্রয়ঃ কার্যা ন মৃষ্যেরন্পরস্পরম্
একার্থাদেব ভূতানাং ভেদো ভবতি সর্বদা
81.26
কীর্তিপ্রধানো যশ্চ স্যাদ্যশ্চ স্যাত্সময়ে স্থিতঃ
সমর্থান্যশ্চ ন দ্বেষ্টি সমর্থান্কুরুতে চ যঃ
81.27
যো ন কামাদ্ভয়াল্লোভাত্ক্রোধাদ্বা ধর্মমুত্সৃজেৎ
দক্ষঃ পর্যাপ্তবচনঃ স তে স্যাত্প্রত্যনন্তরঃ
81.28
শূরশ্চার্যশ্চ বিদ্বাংশ্চ প্রতিপত্তিবিশারদঃ
কুলীনঃ শীলসংপন্নস্তিতিক্ষুরনসূয়কঃ
81.29
এতে হ্যমাত্যাঃ কর্তব্যাঃ সর্বকর্মস্ববস্থিতাঃ
পূজিতাঃ সংবিভক্তাশ্চ সুসহায়াঃ স্বনুষ্ঠিতাঃ
81.30
কৃত্স্নমেতে বিনিক্ষিপ্তাঃ প্রতিরূপেষু কর্মসু
যুক্তা মহত্সু কার্যেষু শ্রেয়াংস্যুত্পাদয়ন্তি চ
81.31
এতে কর্মাণি কুর্বন্তি স্পর্ধমানা মিথঃ সদা
অনুতিষ্ঠন্তি চৈবার্থানাচক্ষাণাঃ পরস্পরম্
81.32
জ্ঞাতিভ্যশ্চৈব বিভ্যেথা মৃত্যোরিব যতঃ সদা
উপরাজেব রাজর্ধিং জ্ঞাতির্ন সহতে সদা
81.33
ঋজোর্মৃদোর্বদান্যস্য হ্রীমতঃ সত্যবাদিনঃ
নান্যো জ্ঞাতের্মহাবাহো বিনাশমভিনন্দতি
81.34
অজ্ঞাতিতা নাতিসুখা নাবজ্ঞেয়াস্ত্বতঃ পরম্
অজ্ঞাতিমন্তং পুরুষং পরে পরিভবন্ত্যুত
81.35
নিকৃতস্য নরৈরন্যৈর্জ্ঞাতিরেব পরায়ণম্
নান্যৈর্নিকারং সহতে জ্ঞাতের্জ্ঞাতিঃ কদাচন
81.36
আত্মানমেব জানাতি নিকৃতং বান্ধবৈরপি
তেষু সন্তি গুণাশ্চৈব নৈর্গুণ্যং তেষু লক্ষ্যতে
81.37
নাজ্ঞাতিরনুগৃহ্ণাতি নাজ্ঞাতির্দিগ্ধমস্যতি
উভয়ং জ্ঞাতিলোকেষু দৃশ্যতে সাধ্বসাধু চ
81.38
তান্মানয়েত্পূজয়েচ্চ নিত্যং বাচা চ কর্মণা
কুর্যাচ্চ প্রিয়মেতেভ্যো নাপ্রিয়ং কিংচিদাচরেৎ
81.39
বিশ্বস্তবদবিশ্বস্তস্তেষু বর্তেত সর্বদা
ন হি দোষো গুণো বেতি নিস্পৃক্তস্তেষু দৃশ্যতে
81.40
তস্যৈবং বর্তমানস্য পুরুষস্যাপ্রমাদিনঃ
অমিত্রাঃ সংপ্রসীদন্তি তথা মিত্রীভবন্ত্যপি
81.41
য এবং বর্ততে নিত্যং জ্ঞাতিসংবন্ধিমণ্ডলে
মিত্রেষ্বমিত্রেষ্বৈশ্বর্যে চিরং যশসি তিষ্ঠতি