Utshovঅধ্যায় 82
82.1
যুধিষ্ঠির উবাচ
এবমগ্রাহ্যকে তস্মিঞ্জ্ঞাতিসংবন্ধিমণ্ডলে
মিত্রেষ্বমিত্রেষ্বপি চ কথং ভাবো বিভাব্যতে
82.2
ভীষ্ম উবাচ
অত্রাপ্যুদাহরন্তীমমিতিহাসং পুরাতনম্
বাসুদেবস্য সংবাদং সুরর্ষের্নারদস্য চ
82.3
বাসুদেব উবাচ
নাসুহৃত্পরমং মন্ত্রং নারদার্হতি বেদিতুম্
অপণ্ডিতো বাপি সুহৃত্পণ্ডিতো বাপি নাত্মবান্
82.4
স তে সৌহৃদমাস্থায় কিংচিদ্বক্ষ্যামি নারদ
কৃত্স্নাং চ বুদ্ধিং সংপ্রেক্ষ্য সংপৃচ্ছে ত্রিদিবংগম
82.5
দাস্যমৈশ্বর্যবাদেন জ্ঞাতীনাং বৈ করোম্যহম্
অর্ধভোক্তাস্মি ভোগানাং বাগ্দুরুক্তানি চ ক্ষমে
82.6
অরণীমগ্নিকামো বা মথ্নাতি হৃদয়ং মম
বাচা দুরুক্তং দেবর্ষে তন্মে দহতি নিত্যদা
82.7
বলং সংকর্ষণে নিত্যং সৌকুমার্যং পুনর্গদে
রূপেণ মত্তঃ প্রদ্যুম্নঃ সোঽসহায়োঽস্মি নারদ
82.8
অন্যে হি সুমহাভাগা বলবন্তো দুরাসদাঃ
নিত্যোত্থানেন সংপন্না নারদান্ধকবৃষ্ণয়ঃ
82.9
যস্য ন স্যুর্ন বৈ স স্যাদ্যস্য স্যুঃ কৃচ্ছ্রমেব তৎ
দ্বাভ্যাং নিবারিতো নিত্যং বৃণোম্যেকতরং ন চ
82.10
স্যাতাং যস্যাহুকাক্রূরৌ কিং নু দুঃখতরং ততঃ
যস্য বাপি ন তৌ স্যাতাং কিং নু দুঃখতরং ততঃ
82.11
সোঽহং কিতবমাতেব দ্বয়োরপি মহামুনে
একস্য জয়মাশংসে দ্বিতীয়স্যাপরাজয়ম্
82.12
মমৈবং ক্লিশ্যমানস্য নারদোভয়তঃ সদা
বক্তুমর্হসি যচ্ছ্রেয়ো জ্ঞাতীনামাত্মনস্তথা
82.13
নারদ উবাচ
আপদো দ্বিবিধাঃ কৃষ্ণ বাহ্যাশ্চাভ্যন্তরাশ্চ হ
প্রাদুর্ভবন্তি বার্ষ্ণেয় স্বকৃতা যদি বান্যতঃ
82.14
সেয়মাভ্যন্তরা তুভ্যমাপত্কৃচ্ছ্রা স্বকর্মজা
অক্রূরভোজপ্রভবাঃ সর্বে হ্যেতে তদন্বয়াঃ
82.15
অর্থহেতোর্হি কামাদ্বাদ্বারা বীভত্সয়াপি বা
আত্মনা প্রাপ্তমৈশ্বর্যমন্যত্র প্রতিপাদিতম্
82.16
কৃতমূলমিদানীং তজ্জাতশব্দং সহায়বৎ
ন শক্যং পুনরাদাতুং বান্তমন্নমিব ত্বয়া
82.17
বভ্রূগ্রসেনয়ো রাজ্যং নাপ্তুং শক্যং কথংচন
জ্ঞাতিভেদভয়াত্কৃষ্ণ ত্বয়া চাপি বিশেষতঃ
82.18
তচ্চেত্সিধ্যেত্প্রয়ত্নেন কৃত্বা কর্ম সুদুষ্করম্
মহাক্ষয়ব্যয়ং বা স্যাদ্বিনাশো বা পুনর্ভবেৎ
82.19
অনায়সেন শস্ত্রেণ মৃদুনা হৃদয়চ্ছিদা
জিহ্বামুদ্ধর সর্বেষাং পরিমৃজ্যানুমৃজ্য চ
82.20
বাসুদেব উবাচ
অনায়সং মুনে শস্ত্রং মৃদু বিদ্যামহং কথম্
যেনৈষামুদ্ধরে জিহ্বাং পরিমৃজ্যানুমৃজ্য চ
82.21
নারদ উবাচ
শক্ত্যান্নদানং সততং তিতিক্ষা দম আর্জবম্
যথার্হপ্রতিপূজা চ শস্ত্রমেতদনায়সম্
82.22
জ্ঞাতীনাং বক্তুকামানাং কটূনি চ লঘূনি চ
গিরা ত্বং হৃদয়ং বাচং শময়স্ব মনাংসি চ
82.23
নামহাপুরুষঃ কশ্চিন্নানাত্মা নাসহায়বান্
মহতীং ধুরমাদত্তে তামুদ্যম্যোরসা বহ
82.24
সর্ব এব গুরুং ভারমনড্বান্বহতে সমে
দুর্গে প্রতীকঃ সুগবো ভারং বহতি দুর্বহম্
82.25
ভেদাদ্বিনাশঃ সংঘানাং সংঘমুখ্যোঽসি কেশব
যথা ত্বাং প্রাপ্য নোত্সীদেদয়ং সংঘস্তথা কুরু
82.26
নান্যত্র বুদ্ধিক্ষান্তিভ্যাং নান্যত্রেন্দ্রিয়নিগ্রহাৎ
নান্যত্র ধনসংত্যাগাদ্গণঃ প্রাজ্ঞেঽবতিষ্ঠতে
82.27
ধন্যং যশস্যমায়ুষ্যং স্বপক্ষোদ্ভাবনং শুভম্
জ্ঞাতীনামবিনাশঃ স্যাদ্যথা কৃষ্ণ তথা কুরু
82.28
আয়ত্যাং চ তদাত্বে চ ন তেঽস্ত্যবিদিতং প্রভো
ষাড্গুণ্যস্য বিধানেন যাত্রায়ানবিধৌ তথা
82.29
মাধবাঃ কুকুরা ভোজাঃ সর্বে চান্ধকবৃষ্ণয়ঃ
ত্বয্যাসক্তা মহাবাহো লোকা লোকেশ্বরাশ্চ যে
82.30
উপাসতে হি ত্বদ্বুদ্ধিমৃষয়শ্চাপি মাধব
ত্বং গুরুঃ সর্বভূতানাং জানীষে ত্বং গতাগতম্
ত্বামাসাদ্য যদুশ্রেষ্ঠমেধন্তে জ্ঞাতিনঃ সুখম্