Utshovঅধ্যায় 83
83.1
ভীষ্ম উবাচ
এষা প্রথমতো বৃত্তির্দ্বিতীয়াং শৃণু ভারত
যঃ কশ্চিজ্জনয়েদর্থং রাজ্ঞা রক্ষ্যঃ স মানবঃ
83.2
হ্রিয়মাণমমাত্যেন ভৃতো বা যদি বাভৃতঃ
যো রাজকোশং নশ্যন্তমাচক্ষীত যুধিষ্ঠির
83.3
শ্রোতব্যং তস্য চ রহো রক্ষ্যশ্চামাত্যতো ভবেৎ
অমাত্যা হ্যুপহন্তারং ভূয়িষ্ঠং ঘ্নন্তি ভারত
83.4
রাজকোশস্য গোপ্তারং রাজকোশবিলোপকাঃ
সমেত্য সর্বে বাধন্তে স বিনশ্যত্যরক্ষিতঃ
83.5
অত্রাপ্যুদাহরন্তীমমিতিহাসং পুরাতনম্
মুনিঃ কালকবৃক্ষীয়ঃ কৌসল্যং যদুবাচ হ
83.6
কোসলানামাধিপত্যং সংপ্রাপ্তে ক্ষেমদর্শিনি
মুনিঃ কালকবৃক্ষীয় আজগামেতি নঃ শ্রুতম্
83.7
স কাকং পঞ্জরে বদ্ধ্বা বিষয়ং ক্ষেমদর্শিনঃ
পূর্বং পর্যচরদ্যুক্তঃ প্রবৃত্ত্যর্থী পুনঃ পুনঃ
83.8
অধীয়ে বায়সীং বিদ্যাং শংসন্তি মম বায়সাঃ
অনাগতমতীতং চ যচ্চ সংপ্রতি বর্ততে
83.9
ইতি রাষ্ট্রে পরিপতন্বহুশঃ পুরুষৈঃ সহ
সর্বেষাং রাজয়ুক্তানাং দুষ্কৃতং পরিপৃষ্টবান্
83.10
স বুদ্ধ্বা তস্য রাষ্ট্রস্য ব্যবসায়ং হি সর্বশঃ
রাজয়ুক্তাপচারাংশ্চ সর্বান্বুদ্ধ্বা ততস্ততঃ
83.11
তমেব কাকমাদায় রাজানং দ্রষ্টুমাগমৎ
সর্বজ্ঞোঽস্মীতি বচনং ব্রুবাণঃ সংশিতব্রতঃ
83.12
স স্ম কৌসল্যমাগম্য রাজামাত্যমলংকৃতম্
প্রাহ কাকস্য বচনাদমুত্রেদং ত্বয়া কৃতম্
83.13
অসৌ চাসৌ চ জানীতে রাজকোশস্ত্বয়া হৃতঃ
এবমাখ্যাতি কাকোঽয়ং তচ্ছীঘ্রমনুগম্যতাম্
83.14
তথান্যানপি স প্রাহ রাজকোশহরান্সদা
ন চাস্য বচনং কিংচিদকৃতং শ্রূয়তে ক্বচিৎ
83.15
তেন বিপ্রকৃতাঃ সর্বে রাজয়ুক্তাঃ কুরূদ্বহ
তমতিক্রম্য সুপ্তস্য নিশি কাকমপোথয়ন্
83.16
বায়সং তু বিনির্ভিন্নং দৃষ্ট্বা বাণেন পঞ্জরে
পূর্বাহ্ণে ব্রাহ্মণো বাক্যং ক্ষেমদর্শিনমব্রবীৎ
83.17
রাজংস্ত্বামভয়ং যাচে প্রভুং প্রাণধনেশ্বরম্
অনুজ্ঞাতস্ত্বয়া ব্রূয়াং বচনং ত্বত্পুরো হিতম্
83.18
মিত্রার্থমভিসংতপ্তো ভক্ত্যা সর্বাত্মনা গতঃ
অয়ং তবার্থং হরতে যো ব্রূয়াদক্ষমান্বিতঃ
83.19
সংবুবোধয়িষুর্মিত্রং সদশ্বমিব সারথিঃ
অতিমন্যুপ্রসক্তো হি প্রসজ্য হিতকারণম্
83.20
তথাবিধস্য সুহৃদঃ ক্ষন্তব্যং সংবিজানতা
ঐশ্বর্যমিচ্ছতা নিত্যং পুরুষেণ বুভূষতা
83.21
তং রাজা প্রত্যুবাচেদং যন্মা কিংচিদ্ভবান্বদেৎ
কস্মাদহং ন ক্ষমেয়মাকাঙ্ক্ষন্নাত্মনো হিতম্
83.22
ব্রাহ্মণ প্রতিজানীহি প্রব্রূহি যদি চেচ্ছসি
করিষ্যামি হি তে বাক্যং যদ্যন্মাং বিপ্র বক্ষ্যসি
83.23
মুনিরুবাচ
জ্ঞাত্বা নয়ানপায়াংশ্চ ভৃত্যতস্তে ভয়ানি চ
ভক্ত্যা বৃত্তিং সমাখ্যাতুং ভবতোঽন্তিকমাগমম্
83.24
প্রাগেবোক্তশ্চ দোষোঽয়মাচার্যৈর্নৃপসেবিনাম্
অগতীকগতির্হ্যেষা যা রাজ্ঞা সহ জীবিকা
83.25
আশীবিষৈশ্চ তস্যাহুঃ সংগতং যস্য রাজভিঃ
বহুমিত্রাশ্চ রাজানো বহ্বমিত্রাস্তথৈব চ
83.26
তেভ্যঃ সর্বেভ্য এবাহুর্ভয়ং রাজোপসেবিনাম্
অথৈষামেকতো রাজন্মুহূর্তাদেব ভীর্ভবেৎ
83.27
নৈকান্তেনাপ্রমাদো হি কর্তুং শক্যো মহীপতৌ
ন তু প্রমাদঃ কর্তব্যঃ কথংচিদ্ভূতিমিচ্ছতা
83.28
প্রমাদাদ্ধি স্খলেদ্রাজা স্খলিতে নাস্তি জীবিতম্
অগ্নিং দীপ্তমিবাসীদেদ্রাজানমুপশিক্ষিতঃ
83.29
আশীবিষমিব ক্রুদ্ধং প্রভুং প্রাণধনেশ্বরম্
যত্নেনোপচরেন্নিত্যং নাহমস্মীতি মানবঃ
83.30
দুর্ব্যাহৃতাচ্ছঙ্কমানো দুষ্কৃতাদ্দুরধিষ্ঠিতাৎ
দুরাসিতাদ্দুর্ব্রজিতাদিঙ্গিতাদঙ্গচেষ্টিতাৎ
83.31
দেবতেব হি সর্বার্থান্কুর্যাদ্রাজা প্রসাদিতঃ
বৈশ্বানর ইব ক্রুদ্ধঃ সমূলমপি নির্দহেৎ
ইতি রাজন্ময়ঃ প্রাহ বর্ততে চ তথৈব তৎ
83.32
অথ ভূয়াংসমেবার্থং করিষ্যামি পুনঃ পুনঃ
দদাত্যস্মদ্বিধোঽমাত্যো বুদ্ধিসাহায্যমাপদি
83.33
বায়সশ্চৈব মে রাজন্নন্তকায়াভিসংহিতঃ
ন চ মেঽত্র ভবান্গর্হ্যো ন চ যেষাং ভবান্প্রিয়ঃ
হিতাহিতাংস্তু বুধ্যেথা মা পরোক্ষমতির্ভব
83.34
যে ত্বাদানপরা এব বসন্তি ভবতো গৃহে
অভূতিকামা ভূতানাং তাদৃশৈর্মেঽভিসংহিতম্
83.35
যে বা ভবদ্বিনাশেন রাজ্যমিচ্ছন্ত্যনন্তরম্
অন্তরৈরভিসংধায় রাজন্সিধ্যন্তি নান্যথা
83.36
তেষামহং ভয়াদ্রাজন্গমিষ্যাম্যন্যমাশ্রমম্
তৈর্হি মে সংধিতো বাণঃ কাকে নিপতিতঃ প্রভো
83.37
ছদ্মনা মম কাকশ্চ গমিতো যমসাদনম্
দৃষ্টং হ্যেতন্ময়া রাজংস্তপোদীর্ঘেণ চক্ষুষা
83.38
বহুনক্রঝষগ্রাহাং তিমিংগিলগণায়ুতাম্
কাকেন বডিশেনেমামতার্ষং ত্বামহং নদীম্
83.39
স্থাণ্বশ্মকণ্টকবতীং ব্যাঘ্রসিংহগজাকুলাম্
দুরাসদাং দুষ্প্রবেশাং গুহাং হৈমবতীমিব
83.40
অগ্নিনা তামসং দুর্গং নৌভিরাপ্যং চ গম্যতে
রাজদুর্গাবতরণে নোপায়ং পণ্ডিতা বিদুঃ
83.41
গহনং ভবতো রাজ্যমন্ধকারতমোবৃতম্
নেহ বিশ্বসিতুং শক্যং ভবতাপি কুতো ময়া
83.42
অতো নায়ং শুভো বাসস্তুল্যে সদসতী ইহ
বধো হ্যেবাত্র সুকৃতে দুষ্কৃতে ন চ সংশয়ঃ
83.43
ন্যায়তো দুষ্কৃতে ঘাতঃ সুকৃতে স্যাত্কথং বধঃ
নেহ যুক্তং চিরং স্থাতুং জবেনাতো ব্রজেদ্বুধঃ
83.44
সীতা নাম নদী রাজন্প্লবো যস্যাং নিমজ্জতি
তথোপমামিমাং মন্যে বাগুরাং সর্বঘাতিনীম্
83.45
মধুপ্রপাতো হি ভবান্ভোজনং বিষসংয়ুতম্
অসতামিব তে ভাবো বর্ততে ন সতামিব
আশীবিষৈঃ পরিবৃতঃ কূপস্ত্বমিব পার্থিব
83.46
দুর্গতীর্থা বৃহত্কূলা করীরীবেত্রসংয়ুতা
নদী মধুরপানীয়া যথা রাজংস্তথা ভবান্
শ্বগৃধ্রগোমায়ুয়ুতো রাজহংসসমো হ্যসি
83.47
যথাশ্রিত্য মহাবৃক্ষং কক্ষঃ সংবর্ধতে মহান্
ততস্তং সংবৃণোত্যেব তমতীত্য চ বর্ধতে
83.48
তেনৈবোপেন্ধনো নূনং দাবো দহতি দারুণঃ
তথোপমা হ্যমাত্যাস্তে রাজংস্তান্পরিশোধয়
83.49
ভবতৈব কৃতা রাজন্ভবতা পরিপালিতাঃ
ভবন্তং পর্যবজ্ঞায় জিঘাংসন্তি ভবত্প্রিয়ম্
83.50
উষিতং শঙ্কমানেন প্রমাদং পরিরক্ষতা
অন্তঃসর্প ইবাগারে বীরপত্ন্যা ইবালয়ে
শীলং জিজ্ঞাসমানেন রাজ্ঞশ্চ সহজীবিনা
83.51
কচ্চিজ্জিতেন্দ্রিয়ো রাজা কচ্চিদভ্যন্তরা জিতাঃ
কচ্চিদেষাং প্রিয়ো রাজা কচ্চিদ্রাজ্ঞঃ প্রিয়াঃ প্রজাঃ
83.52
জিজ্ঞাসুরিহ সংপ্রাপ্তস্তবাহং রাজসত্তম
তস্য মে রোচসে রাজন্ক্ষুধিতস্যেব ভোজনম্
83.53
অমাত্যা মে ন রোচন্তে বিতৃষ্ণস্য যথোদকম্
ভবতোঽর্থকৃদিত্যেব ময়ি দোষো হি তৈঃ কৃতঃ
বিদ্যতে কারণং নান্যদিতি মে নাত্র সংশয়ঃ
83.54
ন হি তেষামহং দ্রুগ্ধস্তত্তেষাং দোষবদ্গতম্
অরের্হি দুর্হতাদ্ভেয়ং ভগ্নপৃষ্ঠাদিবোরগাৎ
83.55
রাজোবাচ
ভূয়সা পরিবর্হেণ সত্কারেণ চ ভূয়সা
পূজিতো ব্রাহ্মণশ্রেষ্ঠ ভূয়ো বস গৃহে মম
83.56
যে ত্বাং ব্রাহ্মণ নেচ্ছন্তি ন তে বত্স্যন্তি মে গৃহে
ভবতৈব হি তজ্জ্ঞেয়ং যদিদানীমনন্তরম্
83.57
যথা স্যাদ্দুষ্কৃতো দণ্ডো যথা চ সুকৃতং কৃতম্
তথা সমীক্ষ্য ভগবঞ্শ্রেয়সে বিনিয়ুঙ্ক্ষ্ব মাম্
83.58
মুনিরুবাচ
অদর্শয়ন্নিমং দোষমেকৈকং দুর্বলং কুরু
ততঃ কারণমাজ্ঞায় পুরুষং পুরুষং জহি
83.59
একদোষা হি বহবো মৃদ্নীয়ুরপি কণ্টকান্
মন্ত্রভেদভয়াদ্রাজংস্তস্মাদেতদ্ব্রবীমি তে
83.60
বয়ং তু ব্রাহ্মণা নাম মৃদুদণ্ডাঃ কৃপালবঃ
স্বস্তি চেচ্ছামি ভবতঃ পরেষাং চ যথাত্মনঃ
83.61
রাজন্নাত্মানমাচক্ষে সংবন্ধী ভবতো হ্যহম্
মুনিঃ কালকবৃক্ষীয় ইত্যেবমভিসংজ্ঞিতঃ
83.62
পিতুঃ সখা চ ভবতঃ সংমতঃ সত্যসংগরঃ
ব্যাপন্নে ভবতো রাজ্যে রাজন্পিতরি সংস্থিতে
83.63
সর্বকামান্পরিত্যজ্য তপস্তপ্তং তদা ময়া
স্নেহাত্ত্বাং প্রব্রবীম্যেতন্মা ভূয়ো বিভ্রমেদিতি
83.64
উভে দৃষ্ট্বা দুঃখসুখে রাজ্যং প্রাপ্য যদৃচ্ছয়া
রাজ্যেনামাত্যসংস্থেন কথং রাজন্প্রমাদ্যসি
83.65
ভীষ্ম উবাচ
ততো রাজকুলে নান্দী সংজজ্ঞে ভূয়সী পুনঃ
পুরোহিতকুলে চৈব সংপ্রাপ্তে ব্রাহ্মণর্ষভে
83.66
একচ্ছত্রাং মহীং কৃত্বা কৌসল্যায় যশস্বিনে
মুনিঃ কালকবৃক্ষীয় ঈজে ক্রতুভিরুত্তমৈঃ
83.67
হিতং তদ্বচনং শ্রুত্বা কৌসল্যোঽন্বশিষন্মহীম্
তথা চ কৃতবান্রাজা যথোক্তং তেন ভারত