Utshovঅধ্যায় 84
84.1
ভীষ্ম উবাচ
হ্রীনিষেধাঃ সদা সন্তঃ সত্যার্জবসমন্বিতাঃ
শক্তাঃ কথয়িতুং সম্যক্তে তব স্যুঃ সভাসদঃ
84.2
অত্যাঢ্যাংশ্চাতিশূরাংশ্চ ব্রাহ্মণাংশ্চ বহুশ্রুতান্
সুসংতুষ্টাংশ্চ কৌন্তেয় মহোত্সাহাংশ্চ কর্মসু
84.3
এতান্সহায়াঁল্লিপ্সেথাঃ সর্বাস্বাপত্সু ভারত
কুলীনঃ পূজিতো নিত্যং ন হি শক্তিং নিগূহতি
84.4
প্রসন্নং হ্যপ্রসন্নং বা পীডিতং হৃতমেব বা
আবর্তয়তি ভূয়িষ্ঠং তদেকো হ্যনুপালিতঃ
84.5
কুলীনা দেশজাঃ প্রাজ্ঞা রূপবন্তো বহুশ্রুতাঃ
প্রগল্ভাশ্চানুরক্তাশ্চ তে তব স্যুঃ পরিচ্ছদাঃ
84.6
দৌষ্কুলেয়াশ্চ লুব্ধাশ্চ নৃশংসা নিরপত্রপাঃ
তে ত্বাং তাত নিষেবেয়ুর্যাবদার্দ্রকপাণয়ঃ
84.7
অর্থমানার্ঘ্যসত্কারৈর্ভোগৈরুচ্চাবচৈঃ প্রিয়ান্
যানর্থভাজো মন্যেথাস্তে তে স্যুঃ সুখভাগিনঃ
84.8
অভিন্নবৃত্তা বিদ্বাংসঃ সদ্বৃত্তাশ্চরিতব্রতাঃ
ন ত্বাং নিত্যার্থিনো জহ্যুরক্ষুদ্রাঃ সত্যবাদিনঃ
84.9
অনার্যা যে ন জানন্তি সময়ং মন্দচেতসঃ
তেভ্যঃ প্রতিজুগুপ্সেথা জানীয়াঃ সময়চ্যুতান্
84.10
নৈকমিচ্ছেদ্গণং হিত্বা স্যাচ্চেদন্যতরগ্রহঃ
যস্ত্বেকো বহুভিঃ শ্রেয়ান্কামং তেন গণং ত্যজেৎ
84.11
শ্রেয়সো লক্ষণং হ্যেতদ্বিক্রমো যস্য দৃশ্যতে
কীর্তিপ্রধানো যশ্চ স্যাত্সময়ে যশ্চ তিষ্ঠতি
84.12
সমর্থান্পূজয়েদ্যশ্চ নাস্পর্ধ্যৈঃ স্পর্ধতে চ যঃ
ন চ কামাদ্ভয়াত্ক্রোধাল্লোভাদ্বা ধর্মমুত্সৃজেৎ
84.13
অমানী সত্যবাক্শক্তো জিতাত্মা মান্যমানিতা
স তে মন্ত্রসহায়ঃ স্যাত্সর্বাবস্থং পরীক্ষিতঃ
84.14
কুলীনঃ সত্যসংপন্নস্তিতিক্ষুর্দক্ষ আত্মবান্
শূরঃ কৃতজ্ঞঃ সত্যশ্চ শ্রেয়সঃ পার্থ লক্ষণম্
84.15
তস্যৈবং বর্তমানস্য পুরুষস্য বিজানতঃ
অমিত্রাঃ সংপ্রসীদন্তি ততো মিত্রীভবন্ত্যপি
84.16
অত ঊর্ধ্বমমাত্যানাং পরীক্ষেত গুণাগুণান্
সংয়তাত্মা কৃতপ্রজ্ঞো ভূতিকামশ্চ ভূমিপঃ
84.17
সংবদ্ধাঃ পুরুষৈরাপ্তৈরভিজাতৈঃ স্বদেশজৈঃ
অহার্যৈরব্যভীচারৈঃ সর্বতঃ সুপরীক্ষিতৈঃ
84.18
যোধাঃ স্রৌবাস্তথা মৌলাস্তথৈবান্যেঽপ্যবস্কৃতাঃ
কর্তব্যা ভূতিকামেন পুরুষেণ বুভূষতা
84.19
যেষাং বৈনয়িকী বুদ্ধিঃ প্রকৃতা চৈব শোভনা
তেজো ধৈর্যং ক্ষমা শৌচমনুরাগ স্থিতির্ধৃতিঃ
84.20
পরীক্ষিতগুণান্নিত্যং প্রৌঢভাবান্ধুরংধরান্
পঞ্চোপধাব্যতীতাংশ্চ কুর্যাদ্রাজার্থকারিণঃ
84.21
পর্যাপ্তবচনান্বীরান্প্রতিপত্তিবিশারদান্
কুলীনান্সত্যসংপন্নানিঙ্গিতজ্ঞাননিষ্ঠুরান্
84.22
দেশকালবিধানজ্ঞান্ভর্তৃকার্যহিতৈষিণঃ
নিত্যমর্থেষু সর্বেষু রাজা কুর্বীত মন্ত্রিণঃ
84.23
হীনতেজা হ্যসংহৃষ্টো নৈব জাতু ব্যবস্যতি
অবশ্যং জনয়ত্যেব সর্বকর্মসু সংশয়ান্
84.24
এবমল্পশ্রুতো মন্ত্রী কল্যাণাভিজনোঽপ্যুত
ধর্মার্থকাময়ুক্তোঽপি নালং মন্ত্রং পরীক্ষিতুম্
84.25
তথৈবানভিজাতোঽপি কামমস্তু বহুশ্রুতঃ
অনায়ক ইবাচক্ষুর্মুহ্যত্যূহ্যেষু কর্মসু
84.26
যো বা হ্যস্থিরসংকল্পো বুদ্ধিমানাগতাগমঃ
উপায়জ্ঞোঽপি নালং স কর্ম যাপয়িতুং চিরম্
84.27
কেবলাত্পুনরাচারাত্কর্মণো নোপপদ্যতে
পরিমর্শো বিশেষাণামশ্রুতস্যেহ দুর্মতেঃ
84.28
মন্ত্রিণ্যননুরক্তে তু বিশ্বাসো ন হি বিদ্যতে
তস্মাদননুরক্তায় নৈব মন্ত্রং প্রকাশয়েৎ
84.29
ব্যথয়েদ্ধি স রাজানং মন্ত্রিভিঃ সহিতোঽনৃজুঃ
মারুতোপহতচ্ছিদ্রৈঃ প্রবিশ্যাগ্নিরিব দ্রুমম্
84.30
সংক্রুধ্যত্যেকদা স্বামী স্থানাচ্চৈবাপকর্ষতি
বাচা ক্ষিপতি সংরব্ধস্ততঃ পশ্চাত্প্রসীদতি
84.31
তানি তান্যনুরক্তেন শক্যান্যনুতিতিক্ষিতুম্
মন্ত্রিণাং চ ভবেত্ক্রোধো বিস্ফূর্জিতমিবাশনেঃ
84.32
যস্তু সংহরতে তানি ভর্তুঃ প্রিয়চিকীর্ষয়া
সমানসুখদুঃখং তং পৃচ্ছেদর্থেষু মানবম্
84.33
অনৃজুস্ত্বনুরক্তোঽপি সংপন্নশ্চেতরৈর্গুণৈঃ
রাজ্ঞঃ প্রজ্ঞানয়ুক্তোঽপি ন মন্ত্রং শ্রোতুমর্হতি
84.34
যোঽমিত্রৈঃ সহ সংবদ্ধো ন পৌরান্বহু মন্যতে
স সুহৃত্তাদৃশো রাজ্ঞো ন মন্ত্রং শ্রোতুমর্হতি
84.35
অবিদ্বানশুচিঃ স্তব্ধঃ শত্রুসেবী বিকত্থনঃ
স সুহৃত্ক্রোধনো লুব্ধো ন মন্ত্রং শ্রোতুমর্হতি
84.36
আগন্তুশ্চানুরক্তোঽপি কামমস্তু বহুশ্রুতঃ
সত্কৃতঃ সংবিভক্তো বা ন মন্ত্রং শ্রোতুমর্হতি
84.37
যস্ত্বল্পেনাপি কার্যেণ সকৃদাক্ষারিতো ভবেৎ
পুনরন্যৈর্গুণৈর্যুক্তো ন মন্ত্রং শ্রোতুমর্হতি
84.38
কৃতপ্রজ্ঞশ্চ মেধাবী বুধো জানপদঃ শুচিঃ
সর্বকর্মসু যঃ শুদ্ধঃ স মন্ত্রং শ্রোতুমর্হতি
84.39
জ্ঞানবিজ্ঞানসংপন্নঃ প্রকৃতিজ্ঞঃ পরাত্মনোঃ
সুহৃদাত্মসমো রাজ্ঞঃ স মন্ত্রং শ্রোতুমর্হতি
84.40
সত্যবাক্শীলসংপন্নো গম্ভীরঃ সত্রপো মৃদুঃ
পিতৃপৈতামহো যঃ স্যাত্স মন্ত্রং শ্রোতুমর্হতি
84.41
সংতুষ্টঃ সংমতঃ সত্যঃ শৌটীরো দ্বেষ্যপাপকঃ
মন্ত্রবিত্কালবিচ্ছূরঃ স মন্ত্রং শ্রোতুমর্হতি
84.42
সর্বলোকং সমং শক্তঃ সান্ত্বেন কুরুতে বশে
তস্মৈ মন্ত্রঃ প্রয়োক্তব্যো দণ্ডমাধিত্সতা নৃপ
84.43
পৌরজানপদা যস্মিন্বিশ্বাসং ধর্মতো গতাঃ
যোদ্ধা নয়বিপশ্চিচ্চ স মন্ত্রং শ্রোতুমর্হতি
84.44
তস্মাত্সর্বৈর্গুণৈরেতৈরুপপন্নাঃ সুপূজিতাঃ
মন্ত্রিণঃ প্রকৃতিজ্ঞাঃ স্যুস্ত্র্যবরা মহদীপ্সবঃ
84.45
স্বাসু প্রকৃতিষু ছিদ্রং লক্ষয়েরন্পরস্য চ
মন্ত্রিণো মন্ত্রমূলং হি রাজ্ঞো রাষ্ট্রং বিবর্ধতে
84.46
নাস্য ছিদ্রং পরঃ পশ্যেচ্ছিদ্রেষু পরমন্বিয়াৎ
গূহেত্কূর্ম ইবাঙ্গানি রক্ষেদ্বিবরমাত্মনঃ
84.47
মন্ত্রগ্রাহা হি রাজ্যস্য মন্ত্রিণো যে মনীষিণঃ
মন্ত্রসংহননো রাজা মন্ত্রাঙ্গানীতরো জনঃ
84.48
রাজ্যং প্রণিধিমূলং হি মন্ত্রসারং প্রচক্ষতে
স্বামিনং ত্বনুবর্তন্তি বৃত্ত্যর্থমিহ মন্ত্রিণঃ
84.49
স বিনীয় মদক্রোধৌ মানমীর্ষ্যাং চ নির্বৃতঃ
নিত্যং পঞ্চোপধাতীতৈর্মন্ত্রয়েত্সহ মন্ত্রিভিঃ
84.50
তেষাং ত্রয়াণাং বিবিধং বিমর্শং; বুধ্যেত চিত্তং বিনিবেশ্য তত্র
স্বনিশ্চয়ং তং পরনিশ্চয়ং চ; নিবেদয়েদুত্তরমন্ত্রকালে
84.51
ধর্মার্থকামজ্ঞমুপেত্য পৃচ্ছে;দ্যুক্তো গুরুং ব্রাহ্মণমুত্তমার্থম্
নিষ্ঠা কৃতা তেন যদা সহ স্যা;ত্তং তত্র মার্গং প্রণয়েদসক্তম্
84.52
এবং সদা মন্ত্রয়িতব্যমাহু;র্যে মন্ত্রতত্ত্বার্থবিনিশ্চয়জ্ঞাঃ
তস্মাত্ত্বমেবং প্রণয়েঃ সদৈব; মন্ত্রং প্রজাসংগ্রহণে সমর্থম্
84.53
ন বামনাঃ কুব্জকৃশা ন খঞ্জা; নান্ধা জডাঃ স্ত্রী ন নপুংসকং চ
ন চাত্র তির্যঙ্ন পুরো ন পশ্চা;ন্নোর্ধ্বং ন চাধঃ প্রচরেত কশ্চিৎ
84.54
আরুহ্য বাতায়নমেব শূন্যং; স্থলং প্রকাশং কুশকাশহীনম্
বাগঙ্গদোষান্পরিহৃত্য মন্ত্রং; সংমন্ত্রয়েত্কার্যমহীনকালম্