অধ্যায় 85

85.1

ভীষ্ম উবাচ
অত্রাপ্যুদাহরন্তীমমিতিহাসং পুরাতনম্
বৃহস্পতেশ্চ সংবাদং শক্রস্য চ যুধিষ্ঠির

শক্র উবাচ
কিং স্বিদেকপদং ব্রহ্মন্পুরুষঃ সম্যগাচরন্
প্রমাণং সর্বভূতানাং যশশ্চৈবাপ্নুয়ান্মহৎ

বৃহস্পতিরুবাচ
সান্ত্বমেকপদং শক্র পুরুষঃ সম্যগাচরন্
প্রমাণং সর্বভূতানাং যশশ্চৈবাপ্নুয়ান্মহৎ

এতদেকপদং শক্র সর্বলোকসুখাবহম্
আচরন্সর্বভূতেষু প্রিয়ো ভবতি সর্বদা

যো হি নাভাষতে কিংচিত্সততং ভ্রুকুটীমুখঃ
দ্বেষ্যো ভবতি ভূতানাং স সান্ত্বমিহ নাচরন্

যস্তু পূর্বমভিপ্রেক্ষ্য পূর্বমেবাভিভাষতে
স্মিতপূর্বাভিভাষী চ তস্য লোকঃ প্রসীদতি

দানমেব হি সর্বত্র সান্ত্বেনানভিজল্পিতম্
ন প্রীণয়তি ভূতানি নির্ব্যঞ্জনমিবাশনম্

অদাতা হ্যপি ভূতানাং মধুরামীরয়ন্গিরম্
সর্বলোকমিমং শক্র সান্ত্বেন কুরুতে বশে

তস্মাত্সান্ত্বং প্রকর্তব্যং দণ্ডমাধিত্সতামিহ
ফলং চ জনয়ত্যেবং ন চাস্যোদ্বিজতে জনঃ

সুকৃতস্য হি সান্ত্বস্য শ্লক্ষ্ণস্য মধুরস্য চ
সম্যগাসেব্যমানস্য তুল্যং জাতু ন বিদ্যতে

ভীষ্ম উবাচ
ইত্যুক্তঃ কৃতবান্সর্বং তথা শক্রঃ পুরোধসা
তথা ত্বমপি কৌন্তেয় সম্যগেতত্সমাচর