Utshovঅধ্যায় 86
86.1
যুধিষ্ঠির উবাচ
কথং স্বিদিহ রাজেন্দ্র পালয়ন্পার্থিবঃ প্রজাঃ
প্রতি ধর্মং বিশেষেণ কীর্তিমাপ্নোতি শাশ্বতীম্
86.2
ভীষ্ম উবাচ
ব্যবহারেণ শুদ্ধেন প্রজাপালনতত্পরঃ
প্রাপ্য ধর্মং চ কীর্তিং চ লোকাবাপ্নোত্যুভৌ শুচিঃ
86.3
যুধিষ্ঠির উবাচ
কীদৃশং ব্যবহারং তু কৈশ্চ ব্যবহরেন্নৃপঃ
এতত্পৃষ্টো মহাপ্রাজ্ঞ যথাবদ্বক্তুমর্হসি
86.4
যে চৈতে পূর্বকথিতা গুণাস্তে পুরুষং প্রতি
নৈকস্মিন্পুরুষে হ্যেতে বিদ্যন্ত ইতি মে মতিঃ
86.5
ভীষ্ম উবাচ
এবমেতন্মহাপ্রাজ্ঞ যথা বদসি বুদ্ধিমান্
দুর্লভঃ পুরুষঃ কশ্চিদেভির্গুণগুণৈর্যুতঃ
86.6
কিং তু সংক্ষেপতঃ শীলং প্রয়ত্নে নেহ দুর্লভম্
বক্ষ্যামি তু যথামাত্যান্যাদৃশাংশ্চ করিষ্যসি
86.7
চতুরো ব্রাহ্মণান্বৈদ্যান্প্রগল্ভান্সাত্ত্বিকাঞ্শুচীন্
ত্রীংশ্চ শূদ্রান্বিনীতাংশ্চ শুচীন্কর্মণি পূর্বকে
86.8
অষ্টাভিশ্চ গুণৈর্যুক্তং সূতং পৌরাণিকং চরেৎ
পঞ্চাশদ্বর্ষবয়সং প্রগল্ভমনসূয়কম্
86.9
মতিস্মৃতিসমায়ুক্তং বিনীতং সমদর্শনম্
কার্যে বিবদমানানাং শক্তমর্থেষ্বলোলুপম্
86.10
বিবর্জিতানাং ব্যসনৈঃ সুঘোরৈঃ সপ্তভির্ভৃশম্
অষ্টানাং মন্ত্রিণাং মধ্যে মন্ত্রং রাজোপধারয়েৎ
86.11
ততঃ সংপ্রেষয়েদ্রাষ্ট্রে রাষ্ট্রায়াথ চ দর্শয়েৎ
অনেন ব্যবহারেণ দ্রষ্টব্যাস্তে প্রজাঃ সদা
86.12
ন চাপি গূঢং কার্যং তে গ্রাহ্যং কার্যোপঘাতকম্
কার্যে খলু বিপন্নে ত্বাং সোঽধর্মস্তাংশ্চ পীডয়েৎ
86.13
বিদ্রবেচ্চৈব রাষ্ট্রং তে শ্যেনাত্পক্ষিগণা ইব
পরিস্রবেচ্চ সততং নৌর্বিশীর্ণেব সাগরে
86.14
প্রজাঃ পালয়তোঽসম্যগধর্মেণেহ ভূপতেঃ
হার্দং ভয়ং সংভবতি স্বর্গশ্চাস্য বিরুধ্যতে
86.15
অথ যোঽধর্মতঃ পাতি রাজামাত্যোঽথ বাত্মজঃ
ধর্মাসনে নিয়ুক্তঃ সন্ধর্মমূলং নরর্ষভ
86.16
কার্যেষ্বধিকৃতাঃ সম্যগকুর্বন্তো নৃপানুগাঃ
আত্মানং পুরতঃ কৃত্বা যান্ত্যধঃ সহপার্থিবাঃ
86.17
বলাত্কৃতানাং বলিভিঃ কৃপণং বহু জল্পতাম্
নাথো বৈ ভূমিপো নিত্যমনাথানাং নৃণাং ভবেৎ
86.18
ততঃ সাক্ষিবলং সাধু দ্বৈধে বাদকৃতং ভবেৎ
অসাক্ষিকমনাথং বা পরীক্ষ্যং তদ্বিশেষতঃ
86.19
অপরাধানুরূপং চ দণ্ডং পাপেষু পাতয়েৎ
উদ্বেজয়েদ্ধনৈরৃদ্ধান্দরিদ্রান্বধবন্ধনৈঃ
86.20
বিনয়ৈরপি দুর্বৃত্তান্প্রহারৈরপি পার্থিবঃ
সান্ত্বেনোপপ্রদানেন শিষ্টাংশ্চ পরিপালয়েৎ
86.21
রাজ্ঞো বধং চিকীর্ষেদ্যস্তস্য চিত্রো বধো ভবেৎ
আজীবকস্য স্তেনস্য বর্ণসংকরকস্য চ
86.22
সম্যক্প্রণয়তো দণ্ডং ভূমিপস্য বিশাং পতে
যুক্তস্য বা নাস্ত্যধর্মো ধর্ম এবেহ শাশ্বতঃ
86.23
কামকারেণ দণ্ডং তু যঃ কুর্যাদবিচক্ষণঃ
স ইহাকীর্তিসংয়ুক্তো মৃতো নরকমাপ্নুয়াৎ
86.24
ন পরস্য শ্রবাদেব পরেষাং দণ্ডমর্পয়েৎ
আগমানুগমং কৃত্বা বধ্নীয়ান্মোক্ষয়েত বা
86.25
ন তু হন্যান্নৃপো জাতু দূতং কস্যাংচিদাপদি
দূতস্য হন্তা নিরয়মাবিশেত্সচিবৈঃ সহ
86.26
যথোক্তবাদিনং দূতং ক্ষত্রধর্মরতো নৃপঃ
যো হন্যাত্পিতরস্তস্য ভ্রূণহত্যামবাপ্নুয়ুঃ
86.27
কুলীনঃ শীলসংপন্নো বাগ্মী দক্ষঃ প্রিয়ংবদঃ
যথোক্তবাদী স্মৃতিমান্দূতঃ স্যাত্সপ্তভির্গুণৈঃ
86.28
এতৈরেব গুণৈর্যুক্তঃ প্রতীহারোঽস্য রক্ষিতা
শিরোরক্ষশ্চ ভবতি গুণৈরেতৈঃ সমন্বিতঃ
86.29
ধর্মার্থশাস্ত্রতত্ত্বজ্ঞঃ সংধিবিগ্রহকো ভবেৎ
মতিমান্ধৃতিমান্ধীমান্রহস্যবিনিগূহিতা
86.30
কুলীনঃ সত্যসংপন্নঃ শক্তোঽমাত্যঃ প্রশংসিতঃ
এতৈরেব গুণৈর্যুক্তস্তথা সেনাপতির্ভবেৎ
86.31
ব্যূহয়ন্ত্রায়ুধীয়ানাং তত্ত্বজ্ঞো বিক্রমান্বিতঃ
বর্ষশীতোষ্ণবাতানাং সহিষ্ণুঃ পররন্ধ্রবিৎ
86.32
বিশ্বাসয়েত্পরাংশ্চৈব বিশ্বসেন্ন তু কস্যচিৎ
পুত্রেষ্বপি হি রাজেন্দ্র বিশ্বাসো ন প্রশস্যতে
86.33
এতচ্ছাস্ত্রার্থতত্ত্বং তু তবাখ্যাতং ময়ানঘ
অবিশ্বাসো নরেন্দ্রাণাং গুহ্যং পরমমুচ্যতে