UtshovChapter 86
86.1
युधिष्ठिर उवाच
कथं स्विदिह राजेन्द्र पालयन्पार्थिवः प्रजाः
प्रति धर्मं विशेषेण कीर्तिमाप्नोति शाश्वतीम्
Yudhishthira uvacha
Katham svidiha rajendra palayanparthivah prajah
Prati dharmam visheshena kirtimapnoti shashvatim
86.2
भीष्म उवाच
व्यवहारेण शुद्धेन प्रजापालनतत्परः
प्राप्य धर्मं च कीर्तिं च लोकावाप्नोत्युभौ शुचिः
Bhishma uvacha
Vyavaharena shuddhena prajapalanatatparah
Prapya dharmam cha kirtim cha lokavapnotyubhau shuchih
86.3
युधिष्ठिर उवाच
कीदृशं व्यवहारं तु कैश्च व्यवहरेन्नृपः
एतत्पृष्टो महाप्राज्ञ यथावद्वक्तुमर्हसि
Yudhishthira uvacha
Kidrisham vyavaharam tu kaishcha vyavaharennripah
Etatprishto mahapragya yathavadvaktumarhasi
86.4
ये चैते पूर्वकथिता गुणास्ते पुरुषं प्रति
नैकस्मिन्पुरुषे ह्येते विद्यन्त इति मे मतिः
Ye chaite purvakathita gunaste purusham prati
Naikasminpurushe hyete vidyanta iti me matih
86.5
भीष्म उवाच
एवमेतन्महाप्राज्ञ यथा वदसि बुद्धिमान्
दुर्लभः पुरुषः कश्चिदेभिर्गुणगुणैर्युतः
Bhishma uvacha
Evametanmahapragya yatha vadasi buddhiman
Durlabhah purushah kashchidebhirgunagunairyutah
86.6
किं तु संक्षेपतः शीलं प्रयत्ने नेह दुर्लभम्
वक्ष्यामि तु यथामात्यान्यादृशांश्च करिष्यसि
Kim tu sankshepatah shilam prayatne neha durlabham
Vakshyami tu yathamatyanyadrishanshcha karishyasi
86.7
चतुरो ब्राह्मणान्वैद्यान्प्रगल्भान्सात्त्विकाञ्शुचीन्
त्रींश्च शूद्रान्विनीतांश्च शुचीन्कर्मणि पूर्वके
Chaturo brahmananvaidyanpragalbhansattvikanshuchin
Trinshcha shudranvinitanshcha shuchinkarmani purvake
86.8
अष्टाभिश्च गुणैर्युक्तं सूतं पौराणिकं चरेत्
पञ्चाशद्वर्षवयसं प्रगल्भमनसूयकम्
Ashtabhishcha gunairyuktam sutam pauranikam charet
Panchashadvarshavayasam pragalbhamanasuyakam
86.9
मतिस्मृतिसमायुक्तं विनीतं समदर्शनम्
कार्ये विवदमानानां शक्तमर्थेष्वलोलुपम्
Matismritisamayuktam vinitam samadarshanam
Karye vivadamananam shaktamartheshvalolupam
86.10
विवर्जितानां व्यसनैः सुघोरैः सप्तभिर्भृशम्
अष्टानां मन्त्रिणां मध्ये मन्त्रं राजोपधारयेत्
Vivarjitanam vyasanaih sughoraih saptabhirbhrisham
Ashtanam mantrinam madhye mantram rajopadharayet
86.11
ततः संप्रेषयेद्राष्ट्रे राष्ट्रायाथ च दर्शयेत्
अनेन व्यवहारेण द्रष्टव्यास्ते प्रजाः सदा
Tatah sampreshayedrashtre rashtrayatha cha darshayet
Anena vyavaharena drashtavyaste prajah sada
86.12
न चापि गूढं कार्यं ते ग्राह्यं कार्योपघातकम्
कार्ये खलु विपन्ने त्वां सोऽधर्मस्तांश्च पीडयेत्
Na chapi gudham karyam te grahyam karyopaghatakam
Karye khalu vipanne tvam sodharmastanshcha pidayet
86.13
विद्रवेच्चैव राष्ट्रं ते श्येनात्पक्षिगणा इव
परिस्रवेच्च सततं नौर्विशीर्णेव सागरे
Vidravechchaiva rashtram te shyenatpakshigana iva
Parisravechcha satatam naurvishirneva sagare
86.14
प्रजाः पालयतोऽसम्यगधर्मेणेह भूपतेः
हार्दं भयं संभवति स्वर्गश्चास्य विरुध्यते
Prajah palayatosamyagadharmeneha bhupateh
Hardam bhayam sambhavati svargashchasya virudhyate
86.15
अथ योऽधर्मतः पाति राजामात्योऽथ वात्मजः
धर्मासने नियुक्तः सन्धर्ममूलं नरर्षभ
Atha yodharmatah pati rajamatyotha vatmajah
Dharmasane niyuktah sandharmamulam nararshabha
86.16
कार्येष्वधिकृताः सम्यगकुर्वन्तो नृपानुगाः
आत्मानं पुरतः कृत्वा यान्त्यधः सहपार्थिवाः
Karyeshvadhikritah samyagakurvanto nripanugah
Atmanam puratah kritva yantyadhah sahaparthivah
86.17
बलात्कृतानां बलिभिः कृपणं बहु जल्पताम्
नाथो वै भूमिपो नित्यमनाथानां नृणां भवेत्
Balatkritanam balibhih kripanam bahu jalpatam
Natho vai bhumipo nityamanathanam nrinam bhavet
86.18
ततः साक्षिबलं साधु द्वैधे वादकृतं भवेत्
असाक्षिकमनाथं वा परीक्ष्यं तद्विशेषतः
Tatah sakshibalam sadhu dvaidhe vadakritam bhavet
Asakshikamanatham va parikshyam tadvisheshatah
86.19
अपराधानुरूपं च दण्डं पापेषु पातयेत्
उद्वेजयेद्धनैरृद्धान्दरिद्रान्वधबन्धनैः
Aparadhanurupam cha dandam papeshu patayet
Udvejayeddhanairriddhandaridranvadhabandhanaih
86.20
विनयैरपि दुर्वृत्तान्प्रहारैरपि पार्थिवः
सान्त्वेनोपप्रदानेन शिष्टांश्च परिपालयेत्
Vinayairapi durvrittanpraharairapi parthivah
Santvenopapradanena shishtanshcha paripalayet
86.21
राज्ञो वधं चिकीर्षेद्यस्तस्य चित्रो वधो भवेत्
आजीवकस्य स्तेनस्य वर्णसंकरकस्य च
Ragyo vadham chikirshedyastasya chitro vadho bhavet
Ajivakasya stenasya varnasankarakasya cha
86.22
सम्यक्प्रणयतो दण्डं भूमिपस्य विशां पते
युक्तस्य वा नास्त्यधर्मो धर्म एवेह शाश्वतः
Samyakpranayato dandam bhumipasya visham pate
Yuktasya va nastyadharmo dharma eveha shashvatah
86.23
कामकारेण दण्डं तु यः कुर्यादविचक्षणः
स इहाकीर्तिसंयुक्तो मृतो नरकमाप्नुयात्
Kamakarena dandam tu yah kuryadavichakshanah
Sa ihakirtisanyukto mrito narakamapnuyat
86.24
न परस्य श्रवादेव परेषां दण्डमर्पयेत्
आगमानुगमं कृत्वा बध्नीयान्मोक्षयेत वा
Na parasya shravadeva paresham dandamarpayet
Agamanugamam kritva badhniyanmokshayeta va
86.25
न तु हन्यान्नृपो जातु दूतं कस्यांचिदापदि
दूतस्य हन्ता निरयमाविशेत्सचिवैः सह
Na tu hanyannripo jatu dutam kasyanchidapadi
Dutasya hanta nirayamavishetsachivaih saha
86.26
यथोक्तवादिनं दूतं क्षत्रधर्मरतो नृपः
यो हन्यात्पितरस्तस्य भ्रूणहत्यामवाप्नुयुः
Yathoktavadinam dutam kshatradharmarato nripah
Yo hanyatpitarastasya bhrunahatyamavapnuyuh
86.27
कुलीनः शीलसंपन्नो वाग्मी दक्षः प्रियंवदः
यथोक्तवादी स्मृतिमान्दूतः स्यात्सप्तभिर्गुणैः
Kulinah shilasampanno vagmi dakshah priyanvadah
Yathoktavadi smritimandutah syatsaptabhirgunaih
86.28
एतैरेव गुणैर्युक्तः प्रतीहारोऽस्य रक्षिता
शिरोरक्षश्च भवति गुणैरेतैः समन्वितः
Etaireva gunairyuktah pratiharosya rakshita
Shirorakshashcha bhavati gunairetaih samanvitah
86.29
धर्मार्थशास्त्रतत्त्वज्ञः संधिविग्रहको भवेत्
मतिमान्धृतिमान्धीमान्रहस्यविनिगूहिता
Dharmarthashastratattvagyah sandhivigrahako bhavet
Matimandhritimandhimanrahasyaviniguhita
86.30
कुलीनः सत्यसंपन्नः शक्तोऽमात्यः प्रशंसितः
एतैरेव गुणैर्युक्तस्तथा सेनापतिर्भवेत्
Kulinah satyasampannah shaktomatyah prashansitah
Etaireva gunairyuktastatha senapatirbhavet
86.31
व्यूहयन्त्रायुधीयानां तत्त्वज्ञो विक्रमान्वितः
वर्षशीतोष्णवातानां सहिष्णुः पररन्ध्रवित्
Vyuhayantrayudhiyanam tattvagyo vikramanvitah
Varshashitoshnavatanam sahishnuh pararandhravit
86.32
विश्वासयेत्परांश्चैव विश्वसेन्न तु कस्यचित्
पुत्रेष्वपि हि राजेन्द्र विश्वासो न प्रशस्यते
Vishvasayetparanshchaiva vishvasenna tu kasyachit
Putreshvapi hi rajendra vishvaso na prashasyate
86.33
एतच्छास्त्रार्थतत्त्वं तु तवाख्यातं मयानघ
अविश्वासो नरेन्द्राणां गुह्यं परममुच्यते
Etachchhastrarthatattvam tu tavakhyatam mayanagha
Avishvaso narendranam guhyam paramamuchyate