UtshovChapter 85
85.1
भीष्म उवाच
अत्राप्युदाहरन्तीममितिहासं पुरातनम्
बृहस्पतेश्च संवादं शक्रस्य च युधिष्ठिर
Bhishma uvacha
Atrapyudaharantimamitihasam puratanam
Brihaspateshcha sanvadam shakrasya cha yudhishthira
85.2
शक्र उवाच
किं स्विदेकपदं ब्रह्मन्पुरुषः सम्यगाचरन्
प्रमाणं सर्वभूतानां यशश्चैवाप्नुयान्महत्
Shakra uvacha
Kim svidekapadam brahmanpurushah samyagacharan
Pramanam sarvabhutanam yashashchaivapnuyanmahat
85.3
बृहस्पतिरुवाच
सान्त्वमेकपदं शक्र पुरुषः सम्यगाचरन्
प्रमाणं सर्वभूतानां यशश्चैवाप्नुयान्महत्
Brihaspatiruvacha
Santvamekapadam shakra purushah samyagacharan
Pramanam sarvabhutanam yashashchaivapnuyanmahat
85.4
एतदेकपदं शक्र सर्वलोकसुखावहम्
आचरन्सर्वभूतेषु प्रियो भवति सर्वदा
Etadekapadam shakra sarvalokasukhavaham
Acharansarvabhuteshu priyo bhavati sarvada
85.5
यो हि नाभाषते किंचित्सततं भ्रुकुटीमुखः
द्वेष्यो भवति भूतानां स सान्त्वमिह नाचरन्
Yo hi nabhashate kinchitsatatam bhrukutimukhah
Dveshyo bhavati bhutanam sa santvamiha nacharan
85.6
यस्तु पूर्वमभिप्रेक्ष्य पूर्वमेवाभिभाषते
स्मितपूर्वाभिभाषी च तस्य लोकः प्रसीदति
Yastu purvamabhiprekshya purvamevabhibhashate
Smitapurvabhibhashi cha tasya lokah prasidati
85.7
दानमेव हि सर्वत्र सान्त्वेनानभिजल्पितम्
न प्रीणयति भूतानि निर्व्यञ्जनमिवाशनम्
Danameva hi sarvatra santvenanabhijalpitam
Na prinayati bhutani nirvyanjanamivashanam
85.8
अदाता ह्यपि भूतानां मधुरामीरयन्गिरम्
सर्वलोकमिमं शक्र सान्त्वेन कुरुते वशे
Adata hyapi bhutanam madhuramirayangiram
Sarvalokamimam shakra santvena kurute vashe
85.9
तस्मात्सान्त्वं प्रकर्तव्यं दण्डमाधित्सतामिह
फलं च जनयत्येवं न चास्योद्विजते जनः
Tasmatsantvam prakartavyam dandamadhitsatamiha
Phalam cha janayatyevam na chasyodvijate janah
85.10
सुकृतस्य हि सान्त्वस्य श्लक्ष्णस्य मधुरस्य च
सम्यगासेव्यमानस्य तुल्यं जातु न विद्यते
Sukritasya hi santvasya shlakshnasya madhurasya cha
Samyagasevyamanasya tulyam jatu na vidyate
85.11
भीष्म उवाच
इत्युक्तः कृतवान्सर्वं तथा शक्रः पुरोधसा
तथा त्वमपि कौन्तेय सम्यगेतत्समाचर
Bhishma uvacha
Ityuktah kritavansarvam tatha shakrah purodhasa
Tatha tvamapi kaunteya samyagetatsamachara