Utshovঅধ্যায় 87
87.1
যুধিষ্ঠির উবাচ
কথংবিধং পুরং রাজা স্বয়মাবস্তুমর্হতি
কৃতং বা কারয়িত্বা বা তন্মে ব্রূহি পিতামহ
87.2
ভীষ্ম উবাচ
যত্র কৌন্তেয় বস্তব্যং সপুত্রভ্রাতৃবন্ধুনা
ন্যায্যং তত্র পরিপ্রষ্টুং গুপ্তিং বৃত্তিং চ ভারত
87.3
তস্মাত্তে বর্তয়িষ্যামি দুর্গকর্ম বিশেষতঃ
শ্রুত্বা তথা বিধাতব্যমনুষ্ঠেয়ং চ যত্নতঃ
87.4
ষড্বিধং দুর্গমাস্থায় পুরাণ্যথ নিবেশয়েৎ
সর্বসংপত্প্রধানং যদ্বাহুল্যং বাপি সংভবেৎ
87.5
ধন্বদুর্গং মহীদুর্গং গিরিদুর্গং তথৈব চ
মনুষ্যদুর্গমব্দুর্গং বনদুর্গং চ তানি ষট্
87.6
যত্পুরং দুর্গসংপন্নং ধান্যায়ুধসমন্বিতম্
দৃঢপ্রাকারপরিখং হস্ত্যশ্বরথসংকুলম্
87.7
বিদ্বাংসঃ শিল্পিনো যত্র নিচয়াশ্চ সুসংচিতাঃ
ধার্মিকশ্চ জনো যত্র দাক্ষ্যমুত্তমমাস্থিতঃ
87.8
ঊর্জস্বিনরনাগাশ্বং চত্বরাপণশোভিতম্
প্রসিদ্ধব্যবহারং চ প্রশান্তমকুতোভয়ম্
87.9
সুপ্রভং সানুনাদং চ সুপ্রশস্তনিবেশনম্
শূরাঢ্যজনসংপন্নং ব্রহ্মঘোষানুনাদিতম্
87.10
সমাজোত্সবসংপন্নং সদাপূজিতদৈবতম্
বশ্যামাত্যবলো রাজা তত্পুরং স্বয়মাবসেৎ
87.11
তত্র কোশং বলং মিত্রং ব্যবহারং চ বর্ধয়েৎ
পুরে জনপদে চৈব সর্বদোষান্নিবর্তয়েৎ
87.12
ভাণ্ডাগারায়ুধাগারং প্রয়ত্নেনাভিবর্ধয়েৎ
নিচয়ান্বর্ধয়েত্সর্বাংস্তথা যন্ত্রগদাগদান্
87.13
কাষ্ঠলোহতুষাঙ্গারদারুশৃঙ্গাস্থিবৈণবান্
মজ্জাস্নেহবসাক্ষৌদ্রমৌষধগ্রামমেব চ
87.14
শণং সর্জরসং ধান্যমায়ুধানি শরাংস্তথা
চর্ম স্নায়ু তথা বেত্রং মুঞ্জবল্বজধন্বনান্
87.15
আশয়াশ্চোদপানাশ্চ প্রভূতসলিলা বরাঃ
নিরোদ্ধব্যাঃ সদা রাজ্ঞা ক্ষীরিণশ্চ মহীরুহাঃ
87.16
সত্কৃতাশ্চ প্রয়ত্নেন আচার্যর্ত্বিক্পুরোহিতাঃ
মহেষ্বাসাঃ স্থপতয়ঃ সাংবত্সরচিকিত্সকাঃ
87.17
প্রাজ্ঞা মেধাবিনো দান্তা দক্ষাঃ শূরা বহুশ্রুতাঃ
কুলীনাঃ সত্ত্বসংপন্না যুক্তাঃ সর্বেষু কর্মসু
87.18
পূজয়েদ্ধার্মিকান্রাজা নিগৃহ্ণীয়াদধার্মিকান্
নিয়ুঞ্জ্যাচ্চ প্রয়ত্নেন সর্ববর্ণান্স্বকর্মসু
87.19
বাহ্যমাভ্যন্তরং চৈব পৌরজানপদং জনম্
চারৈঃ সুবিদিতং কৃত্বা ততঃ কর্ম প্রয়োজয়েৎ
87.20
চারান্মন্ত্রং চ কোশং চ মন্ত্রং চৈব বিশেষতঃ
অনুতিষ্ঠেত্স্বয়ং রাজা সর্বং হ্যত্র প্রতিষ্ঠিতম্
87.21
উদাসীনারিমিত্রাণাং সর্বমেব চিকীর্ষিতম্
পুরে জনপদে চৈব জ্ঞাতব্যং চারচক্ষুষা
87.22
ততস্তথা বিধাতব্যং সর্বমেবাপ্রমাদতঃ
ভক্তান্পূজয়তা নিত্যং দ্বিষতশ্চ নিগৃহ্ণতা
87.23
যষ্টব্যং ক্রতুভির্নিত্যং দাতব্যং চাপ্যপীডয়া
প্রজানাং রক্ষণং কার্যং ন কার্যং কর্ম গর্হিতম্
87.24
কৃপণানাথবৃদ্ধানাং বিধবানাং চ যোষিতাম্
যোগক্ষেমং চ বৃত্তিং চ নিত্যমেব প্রকল্পয়েৎ
87.25
আশ্রমেষু যথাকালং চেলভাজনভোজনম্
সদৈবোপহরেদ্রাজা সত্কৃত্যানবমন্য চ
87.26
আত্মানং সর্বকার্যাণি তাপসে রাজ্যমেব চ
নিবেদয়েত্প্রয়ত্নেন তিষ্ঠেত্প্রহ্বশ্চ সর্বদা
87.27
সর্বার্থত্যাগিনং রাজা কুলে জাতং বহুশ্রুতম্
পূজয়েত্তাদৃশং দৃষ্ট্বা শয়নাসনভোজনৈঃ
87.28
তস্মিন্কুর্বীত বিশ্বাসং রাজা কস্যাংচিদাপদি
তাপসেষু হি বিশ্বাসমপি কুর্বন্তি দস্যবঃ
87.29
তস্মিন্নিধীনাদধীত প্রজ্ঞাং পর্যাদদীত চ
ন চাপ্যভীক্ষ্ণং সেবেত ভৃশং বা প্রতিপূজয়েৎ
87.30
অন্যঃ কার্যঃ স্বরাষ্ট্রেষু পররাষ্ট্রেষু চাপরঃ
অটবীষ্বপরঃ কার্যঃ সামন্তনগরেষু চ
87.31
তেষু সত্কারসংস্কারান্সংবিভাগাংশ্চ কারয়েৎ
পররাষ্ট্রাটবীস্থেষু যথা স্ববিষয়ে তথা
87.32
তে কস্যাংচিদবস্থায়াং শরণং শরণার্থিনে
রাজ্ঞে দদ্যুর্যথাকামং তাপসাঃ সংশিতব্রতাঃ
87.33
এষ তে লক্ষণোদ্দেশঃ সংক্ষেপেণ প্রকীর্তিতঃ
যাদৃশং নগরং রাজা স্বয়মাবস্তুমর্হতি