Utshovঅধ্যায় 88
88.1
যুধিষ্ঠির উবাচ
রাষ্ট্রগুপ্তিং চ মে রাজন্রাষ্ট্রস্যৈব চ সংগ্রহম্
সম্যগ্জিজ্ঞাসমানায় প্রব্রূহি ভরতর্ষভ
88.2
ভীষ্ম উবাচ
রাষ্ট্রগুপ্তিং চ তে সম্যগ্রাষ্ট্রস্যৈব চ সংগ্রহম্
হন্ত সর্বং প্রবক্ষ্যামি তত্ত্বমেকমনাঃ শৃণু
88.3
গ্রামস্যাধিপতিঃ কার্যো দশগ্রাম্যস্তথাপরঃ
দ্বিগুণায়াঃ শতস্যৈবং সহস্রস্য চ কারয়েৎ
88.4
গ্রামে যান্গ্রামদোষাংশ্চ গ্রামিকঃ পরিপালয়েৎ
তান্ব্রূয়াদ্দশপায়াসৌ স তু বিংশতিপায় বৈ
88.5
সোঽপি বিংশত্যধিপতির্বৃত্তং জানপদে জনে
গ্রামাণাং শতপালায় সর্বমেব নিবেদয়েৎ
88.6
যানি গ্রামীণভোজ্যানি গ্রামিকস্তান্যুপাশ্নুয়াৎ
দশপস্তেন ভর্তব্যস্তেনাপি দ্বিগুণাধিপঃ
88.7
গ্রামং গ্রামশতাধ্যক্ষো ভোক্তুমর্হতি সত্কৃতঃ
মহান্তং ভরতশ্রেষ্ঠ সুস্ফীতজনসংকুলম্
তত্র হ্যনেকমায়ত্তং রাজ্ঞো ভবতি ভারত
88.8
শাখানগরমর্হস্তু সহস্রপতিরুত্তমম্
ধান্যহৈরণ্যভোগেন ভোক্তুং রাষ্ট্রিয় উদ্যতঃ
88.9
তথা যদ্গ্রামকৃত্যং স্যাদ্গ্রামিকৃত্যং চ তে স্বয়ম্
ধর্মজ্ঞঃ সচিবঃ কশ্চিত্তত্প্রপশ্যেদতন্দ্রিতঃ
88.10
নগরে নগরে চ স্যাদেকঃ সর্বার্থচিন্তকঃ
উচ্চৈঃস্থানে ঘোররূপো নক্ষত্রাণামিব গ্রহঃ
ভবেত্স তান্পরিক্রামেত্সর্বানেব সদা স্বয়ম্
88.11
বিক্রয়ং ক্রয়মধ্বানং ভক্তং চ সপরিব্যয়ম্
যোগক্ষেমং চ সংপ্রেক্ষ্য বণিজঃ কারয়েত্করান্
88.12
উত্পত্তিং দানবৃত্তিং চ শিল্পং সংপ্রেক্ষ্য চাসকৃৎ
শিল্পপ্রতিকরানেব শিল্পিনঃ প্রতি কারয়েৎ
88.13
উচ্চাবচকরা ন্যায্যাঃ পূর্বরাজ্ঞাং যুধিষ্ঠির
যথা যথা ন হীয়েরংস্তথা কুর্যান্মহীপতিঃ
88.14
ফলং কর্ম চ সংপ্রেক্ষ্য ততঃ সর্বং প্রকল্পয়েৎ
ফলং কর্ম চ নির্হেতু ন কশ্চিত্সংপ্রবর্তয়েৎ
88.15
যথা রাজা চ কর্তা চ স্যাতাং কর্মণি ভাগিনৌ
সমবেক্ষ্য তথা রাজ্ঞা প্রণেয়াঃ সততং করাঃ
88.16
নোচ্ছিন্দ্যাদাত্মনো মূলং পরেষাং বাপি তৃষ্ণয়া
ঈহাদ্বারাণি সংরুধ্য রাজা সংপ্রীতিদর্শনঃ
88.17
প্রদ্বিষন্তি পরিখ্যাতং রাজানমতিখাদিনম্
প্রদ্বিষ্টস্য কুতঃ শ্রেয়ঃ সংপ্রিয়ো লভতে প্রিয়ম্
88.18
বত্সৌপম্যেন দোগ্ধব্যং রাষ্ট্রমক্ষীণবুদ্ধিনা
ভৃতো বত্সো জাতবলঃ পীডাং সহতি ভারত
88.19
ন কর্ম কুরুতে বত্সো ভৃশং দুগ্ধো যুধিষ্ঠির
রাষ্ট্রমপ্যতিদুগ্ধং হি ন কর্ম কুরুতে মহৎ
88.20
যো রাষ্ট্রমনুগৃহ্ণাতি পরিগৃহ্য স্বয়ং নৃপঃ
সংজাতমুপজীবন্স লভতে সুমহত্ফলম্
88.21
আপদর্থং হি নিচয়ান্রাজান ইহ চিন্বতে
রাষ্ট্রং চ কোশভূতং স্যাত্কোশো বেশ্মগতস্তথা
88.22
পৌরজানপদান্সর্বান্সংশ্রিতোপাশ্রিতাংস্তথা
যথাশক্ত্যনুকম্পেত সর্বানভ্যন্তরানপি
88.23
বাহ্যং জনং ভেদয়িত্বা ভোক্তব্যো মধ্যমঃ সুখম্
এবং ন সংপ্রকুপ্যন্তে জনাঃ সুখিতদুঃখিতাঃ
88.24
প্রাগেব তু করাদানমনুভাষ্য পুনঃ পুনঃ
সংনিপত্য স্ববিষয়ে ভয়ং রাষ্ট্রে প্রদর্শয়েৎ
88.25
ইয়মাপত্সমুত্পন্না পরচক্রভয়ং মহৎ
অপি নান্তায় কল্পেত বেণোরিব ফলাগমঃ
88.26
অরয়ো মে সমুত্থায় বহুভির্দস্যুভিঃ সহ
ইদমাত্মবধায়ৈব রাষ্ট্রমিচ্ছন্তি বাধিতুম্
88.27
অস্যামাপদি ঘোরায়াং সংপ্রাপ্তে দারুণে ভয়ে
পরিত্রাণায় ভবতাং প্রার্থয়িষ্যে ধনানি বঃ
88.28
প্রতিদাস্যে চ ভবতাং সর্বং চাহং ভয়ক্ষয়ে
নারয়ঃ প্রতিদাস্যন্তি যদ্ধরেয়ুর্বলাদিতঃ
88.29
কলত্রমাদিতঃ কৃত্বা নশ্যেত্স্বং স্বয়মেব হি
অপি চেত্পুত্রদারার্থমর্থসংচয় ইষ্যতে
88.30
নন্দামি বঃ প্রভাবেন পুত্রাণামিব চোদয়ে
যথাশক্ত্যনুগৃহ্ণামি রাষ্ট্রস্যাপীডয়া চ বঃ
88.31
আপত্স্বেব চ বোঢব্যং ভবদ্ভিঃ সদ্গবৈরিব
ন বঃ প্রিয়তরং কার্যং ধনং কস্যাংচিদাপদি
88.32
ইতি বাচা মধুরয়া শ্লক্ষ্ণয়া সোপচারয়া
স্বরশ্মীনভ্যবসৃজেদ্যুগমাদায় কালবিৎ
88.33
প্রচারং ভৃত্যভরণং ব্যয়ং গোগ্রামতো ভয়ম্
যোগক্ষেমং চ সংপ্রেক্ষ্য গোমিনঃ কারয়েত্করান্
88.34
উপেক্ষিতা হি নশ্যেয়ুর্গোমিনোঽরণ্যবাসিনঃ
তস্মাত্তেষু বিশেষেণ মৃদুপূর্বং সমাচরেৎ
88.35
সান্ত্বনং রক্ষণং দানমবস্থা চাপ্যভীক্ষ্ণশঃ
গোমিনাং পার্থ কর্তব্যং সংবিভাগাঃ প্রিয়াণি চ
88.36
অজস্রমুপয়োক্তব্যং ফলং গোমিষু সর্বতঃ
প্রভাবয়তি রাষ্ট্রং চ ব্যবহারং কৃষিং তথা
88.37
তস্মাদ্গোমিষু যত্নেন প্রীতিং কুর্যাদ্বিচক্ষণঃ
দয়াবানপ্রমত্তশ্চ করান্সংপ্রণয়ন্মৃদূন্
88.38
সর্বত্র ক্ষেমচরণং সুলভং তাত গোমিভিঃ
ন হ্যতঃ সদৃশং কিংচিদ্ধনমস্তি যুধিষ্ঠির