Utshovঅধ্যায় 89
89.1
যুধিষ্ঠির উবাচ
যদা রাজা সমর্থোঽপি কোশার্থী স্যান্মহামতে
কথং প্রবর্তেত তদা তন্মে ব্রূহি পিতামহ
89.2
ভীষ্ম উবাচ
যথাদেশং যথাকালমপি চৈব যথাবলম্
অনুশিষ্যাত্প্রজা রাজা ধর্মার্থী তদ্ধিতে রতঃ
89.3
যথা তাসাং চ মন্যেত শ্রেয় আত্মন এব চ
তথা ধর্ম্যাণি সর্বাণি রাজা রাষ্ট্রে প্রবর্তয়েৎ
89.4
মধুদোহং দুহেদ্রাষ্ট্রং ভ্রমরান্ন বিপাতয়েৎ
বত্সাপেক্ষী দুহেচ্চৈব স্তনাংশ্চ ন বিকুট্টয়েৎ
89.5
জলৌকাবত্পিবেদ্রাষ্ট্রং মৃদুনৈব নরাধিপ
ব্যাঘ্রীব চ হরেত্পুত্রমদষ্ট্বা মা পতেদিতি
89.6
অল্পেনাল্পেন দেয়েন বর্ধমানং প্রদাপয়েৎ
ততো ভূয়স্ততো ভূয়ঃ কামং বৃদ্ধিং সমাচরেৎ
89.7
দময়ন্নিব দম্যানাং শশ্বদ্ভারং প্রবর্ধয়েৎ
মৃদুপূর্বং প্রয়ত্নেন পাশানভ্যবহারয়েৎ
89.8
সকৃত্পাশাবকীর্ণাস্তে ন ভবিষ্যন্তি দুর্দমাঃ
উচিতেনৈব ভোক্তব্যাস্তে ভবিষ্যন্তি যত্নতঃ
89.9
তস্মাত্সর্বসমারম্ভো দুর্লভঃ পুরুষব্রজঃ
যথামুখ্যান্সান্ত্বয়িত্বা ভোক্তব্য ইতরো জনঃ
89.10
ততস্তান্ভেদয়িত্বাথ পরস্পরবিবক্ষিতান্
ভুঞ্জীত সান্ত্বয়িত্বৈব যথাসুখময়ত্নতঃ
89.11
ন চাস্থানে ন চাকালে করানেভ্যোঽনুপাতয়েৎ
আনুপূর্ব্যেণ সান্ত্বেন যথাকালং যথাবিধি
89.12
উপায়ান্প্রব্রবীম্যেতান্ন মে মায়া বিবক্ষিতা
অনুপায়েন দময়ন্প্রকোপয়তি বাজিনঃ
89.13
পানাগারাণি বেশাশ্চ বেশপ্রাপণিকাস্তথা
কুশীলবাঃ সকিতবা যে চান্যে কেচিদীদৃশাঃ
89.14
নিয়ম্যাঃ সর্ব এবৈতে যে রাষ্ট্রস্যোপঘাতকাঃ
এতে রাষ্ট্রে হি তিষ্ঠন্তো বাধন্তে ভদ্রিকাঃ প্রজাঃ
89.15
ন কেনচিদ্যাচিতব্যঃ কশ্চিত্কিংচিদনাপদি
ইতি ব্যবস্থা ভূতানাং পুরস্তান্মনুনা কৃতা
89.16
সর্বে তথা ন জীবেয়ুর্ন কুর্যুঃ কর্ম চেদিহ
সর্ব এব ত্রয়ো লোকা ন ভবেয়ুরসংশয়ম্
89.17
প্রভুর্নিয়মনে রাজা য এতান্ন নিয়চ্ছতি
ভুঙ্ক্তে স তস্য পাপস্য চতুর্ভাগমিতি শ্রুতিঃ
তথা কৃতস্য ধর্মস্য চতুর্ভাগমুপাশ্নুতে
89.18
স্থানান্যেতানি সংগম্য প্রসঙ্গে ভূতিনাশনঃ
কামপ্রসক্তঃ পুরুষঃ কিমকার্যং বিবর্জয়েৎ
89.19
আপদ্যেব তু যাচেরন্যেষাং নাস্তি পরিগ্রহঃ
দাতব্যং ধর্মতস্তেভ্যস্ত্বনুক্রোশাদ্দয়ার্থিনা
89.20
মা তে রাষ্ট্রে যাচনকা মা তে ভূয়ুশ্চ দস্যবঃ
ইষ্টাদাতার এবৈতে নৈতে ভূতস্য ভাবকাঃ
89.21
যে ভূতান্যনুগৃহ্ণন্তি বর্ধয়ন্তি চ যে প্রজাঃ
তে তে রাষ্ট্রে প্রবর্তন্তাং মা ভূতানামভাবকাঃ
89.22
দণ্ড্যাস্তে চ মহারাজ ধনাদানপ্রয়োজনাঃ
প্রয়োগং কারয়েয়ুস্তান্যথা বলিকরাংস্তথা
89.23
কৃষিগোরক্ষ্যবাণিজ্যং যচ্চান্যত্কিংচিদীদৃশম্
পুরুষৈঃ কারয়েত্কর্ম বহুভিঃ সহ কর্মিভিঃ
89.24
নরশ্চেত্কৃষিগোরক্ষ্যং বাণিজ্যং চাপ্যনুষ্ঠিতঃ
সংশয়ং লভতে কিংচিত্তেন রাজা বিগর্হ্যতে
89.25
ধনিনঃ পূজয়েন্নিত্যং যানাচ্ছাদনভোজনৈঃ
বক্তব্যাশ্চানুগৃহ্ণীধ্বং পূজাঃ সহ ময়েতি হ
89.26
অঙ্গমেতন্মহদ্রাজ্ঞাং ধনিনো নাম ভারত
ককুদং সর্বভূতানাং ধনস্থো নাত্র সংশয়ঃ
89.27
প্রাজ্ঞঃ শূরো ধনস্থশ্চ স্বামী ধার্মিক এব চ
তপস্বী সত্যবাদী চ বুদ্ধিমাংশ্চাভিরক্ষতি
89.28
তস্মাদেতেষু সর্বেষু প্রীতিমান্ভব পার্থিব
সত্যমার্জবমক্রোধমানৃশংস্যং চ পালয়
89.29
এবং দণ্ডং চ কোশং চ মিত্রং ভূমিং চ লপ্স্যসে
সত্যার্জবপরো রাজন্মিত্রকোশসমন্বিতঃ