Utshovঅধ্যায় 90
90.1
ভীষ্ম উবাচ
বনস্পতীন্ভক্ষ্যফলান্ন ছিন্দ্যুর্বিষয়ে তব
ব্রাহ্মণানাং মূলফলং ধর্ম্যমাহুর্মনীষিণঃ
90.2
ব্রাহ্মণেভ্যোঽতিরিক্তং চ ভুঞ্জীরন্নিতরে জনাঃ
ন ব্রাহ্মণোপরোধেন হরেদন্যঃ কথংচন
90.3
বিপ্রশ্চেত্ত্যাগমাতিষ্ঠেদাখ্যায়াবৃত্তিকর্শিতঃ
পরিকল্প্যাস্য বৃত্তিঃ স্যাত্সদারস্য নরাধিপ
90.4
স চেন্নোপনিবর্তেত বাচ্যো ব্রাহ্মণসংসদি
কস্মিন্নিদানীং মর্যাদাময়ং লোকঃ করিষ্যতি
90.5
অসংশয়ং নিবর্তেত ন চেদ্বক্ষ্যত্যতঃ পরম্
পূর্বং পরোক্ষং কর্তব্যমেতত্কৌন্তেয় শাসনম্
90.6
আহুরেতজ্জনা ব্রহ্মন্ন চৈতচ্ছ্রদ্দধাম্যহম্
নিমন্ত্র্যশ্চ ভবেদ্ভোগৈরবৃত্ত্যা চেত্তদাচরেৎ
90.7
কৃষিগোরক্ষ্যবাণিজ্যং লোকানামিহ জীবনম্
ঊর্ধ্বং চৈব ত্রয়ী বিদ্যা সা ভূতান্ভাবয়ত্যুত
90.8
তস্যাং প্রয়তমানায়াং যে স্যুস্তত্পরিপন্থিনঃ
দস্যবস্তদ্বধায়েহ ব্রহ্মা ক্ষত্রমথাসৃজৎ
90.9
শত্রূঞ্জহি প্রজা রক্ষ যজস্ব ক্রতুভির্নৃপ
যুধ্যস্ব সমরে বীরো ভূত্বা কৌরবনন্দন
90.10
সংরক্ষ্যান্পালয়েদ্রাজা যঃ স রাজার্যকৃত্তমঃ
যে কেচিত্তান্ন রক্ষন্তি তৈরর্থো নাস্তি কশ্চন
90.11
সদৈব রাজ্ঞা বোদ্ধব্যং সর্বলোকাদ্যুধিষ্ঠির
তস্মাদ্ধেতোর্হি ভুঞ্জীত মনুষ্যানেব মানবঃ
90.12
অন্তরেভ্যঃ পরান্রক্ষন্পরেভ্যঃ পুনরন্তরান্
পরান্পরেভ্যঃ স্বান্স্বেভ্যঃ সর্বান্পালয় নিত্যদা
90.13
আত্মানং সর্বতো রক্ষন্রাজা রক্ষেত মেদিনীম্
আত্মমূলমিদং সর্বমাহুর্হি বিদুষো জনাঃ
90.14
কিং ছিদ্রং কোঽনুষঙ্গো মে কিং বাস্ত্যবিনিপাতিতম্
কুতো মামাস্রবেদ্দোষ ইতি নিত্যং বিচিন্তয়েৎ
90.15
গুপ্তৈশ্চারৈরনুমতৈঃ পৃথিবীমনুচারয়েৎ
সুনীতং যদি মে বৃত্তং প্রশংসন্তি ন বা পুনঃ
কচ্চিদ্রোচেজ্জনপদে কচ্চিদ্রাষ্ট্রে চ মে যশঃ
90.16
ধর্মজ্ঞানাং ধৃতিমতাং সংগ্রামেষ্বপলায়িনাম্
রাষ্ট্রং চ যেঽনুজীবন্তি যে চ রাজ্ঞোঽনুজীবিনঃ
90.17
অমাত্যানাং চ সর্বেষাং মধ্যস্থানাং চ সর্বশঃ
যে চ ত্বাভিপ্রশংসেয়ুর্নিন্দেয়ুরথ বা পুনঃ
সর্বান্সুপরিণীতাংস্তান্কারয়েত যুধিষ্ঠির
90.18
একান্তেন হি সর্বেষাং ন শক্যং তাত রোচিতুম্
মিত্রামিত্রমথো মধ্যং সর্বভূতেষু ভারত
90.19
তুল্যবাহুবলানাং চ গুণৈরপি নিষেবিনাম্
কথং স্যাদধিকঃ কশ্চিত্স তু ভুঞ্জীত মানবান্
90.20
যে চরা হ্যচরানদ্যুরদংষ্ট্রান্দংষ্ট্রিণস্তথা
আশীবিষা ইব ক্রুদ্ধা ভুজগা ভুজগানিব
90.21
এতেভ্যশ্চাপ্রমত্তঃ স্যাত্সদা যত্তো যুধিষ্ঠির
ভারুণ্ডসদৃশা হ্যেতে নিপতন্তি প্রমাদ্যতঃ
90.22
কচ্চিত্তে বণিজো রাষ্ট্রে নোদ্বিজন্তে করার্দিতাঃ
ক্রীণন্তো বহু বাল্পেন কান্তারকৃতনিশ্রমাঃ
90.23
কচ্চিত্কৃষিকরা রাষ্ট্রং ন জহত্যতিপীডিতাঃ
যে বহন্তি ধুরং রাজ্ঞাং সংভরন্তীতরানপি
90.24
ইতো দত্তেন জীবন্তি দেবাঃ পিতৃগণাস্তথা
মনুষ্যোরগরক্ষাংসি বয়াংসি পশবস্তথা
90.25
এষা তে রাষ্ট্রবৃত্তিশ্চ রাষ্ট্রগুপ্তিশ্চ ভারত
এতমেবার্থমাশ্রিত্য ভূয়ো বক্ষ্যামি পাণ্ডব