Utshovঅধ্যায় 91
91.1
ভীষ্ম উবাচ
যানঙ্গিরাঃ ক্ষত্রধর্মানুতথ্যো ব্রহ্মবিত্তমঃ
মান্ধাত্রে যৌবনাশ্বায় প্রীতিমানভ্যভাষত
91.2
স যথানুশশাসৈনমুতথ্যো ব্রহ্মবিত্তমঃ
তত্তে সর্বং প্রবক্ষ্যামি নিখিলেন যুধিষ্ঠির
91.3
উতথ্য উবাচ
ধর্মায় রাজা ভবতি ন কামকরণায় তু
মান্ধাতরেবং জানীহি রাজা লোকস্য রক্ষিতা
91.4
রাজা চরতি বৈ ধর্মং দেবত্বায়ৈব গচ্ছতি
ন চেদ্ধর্মং স চরতি নরকায়ৈব গচ্ছতি
91.5
ধর্মে তিষ্ঠন্তি ভূতানি ধর্মো রাজনি তিষ্ঠতি
তং রাজা সাধু যঃ শাস্তি স রাজা পৃথিবীপতিঃ
91.6
রাজা পরমধর্মাত্মা লক্ষ্মীবান্পাপ উচ্যতে
দেবাশ্চ গর্হাং গচ্ছন্তি ধর্মো নাস্তীতি চোচ্যতে
91.7
অধর্মে বর্তমানানামর্থসিদ্ধিঃ প্রদৃশ্যতে
তদেব মঙ্গলং সর্বং লোকঃ সমনুবর্ততে
91.8
উচ্ছিদ্যতে ধর্মবৃত্তমধর্মো বর্ততে মহান্
ভয়মাহুর্দিবারাত্রং যদা পাপো ন বার্যতে
91.9
ন বেদাননুবর্তন্তি ব্রতবন্তো দ্বিজাতয়ঃ
ন যজ্ঞাংস্তন্বতে বিপ্রা যদা পাপো ন বার্যতে
91.10
বধ্যানামিব সর্বেষাং মনো ভবতি বিহ্বলম্
মনুষ্যাণাং মহারাজ যদা পাপো ন বার্যতে
91.11
উভৌ লোকাবভিপ্রেক্ষ্য রাজানমৃষয়ঃ স্বয়ম্
অসৃজন্সুমহদ্ভূতময়ং ধর্মো ভবিষ্যতি
91.12
যস্মিন্ধর্মো বিরাজেত তং রাজানং প্রচক্ষতে
যস্মিন্বিলীয়তে ধর্মস্তং দেবা বৃষলং বিদুঃ
91.13
বৃষো হি ভগবান্ধর্মো যস্তস্য কুরুতে হ্যলম্
বৃষলং তং বিদুর্দেবাস্তস্মাদ্ধর্মং ন লোপয়েৎ
91.14
ধর্মে বর্ধতি বর্ধন্তি সর্বভূতানি সর্বদা
তস্মিন্হ্রসতি হীয়ন্তে তস্মাদ্ধর্মং প্রবর্ধয়েৎ
91.15
ধনাত্স্রবতি ধর্মো হি ধারণাদ্বেতি নিশ্চয়ঃ
অকার্যাণাং মনুষ্যেন্দ্র স সীমান্তকরঃ স্মৃতঃ
91.16
প্রভবার্থং হি ভূতানাং ধর্মঃ সৃষ্টঃ স্বয়ংভুবা
তস্মাত্প্রবর্ধয়েদ্ধর্মং প্রজানুগ্রহকারণাৎ
91.17
তস্মাদ্ধি রাজশার্দূল ধর্মঃ শ্রেষ্ঠ ইতি স্মৃতঃ
স রাজা যঃ প্রজাঃ শাস্তি সাধুকৃত্পুরুষর্ষভঃ
91.18
কামক্রোধাবনাদৃত্য ধর্মমেবানুপালয়েৎ
ধর্মঃ শ্রেয়স্করতমো রাজ্ঞাং ভরতসত্তম
91.19
ধর্মস্য ব্রাহ্মণা যোনিস্তস্মাত্তান্পূজয়েত্সদা
ব্রাহ্মণানাং চ মান্ধাতঃ কামান্কুর্যাদমত্সরী
91.20
তেষাং হ্যকামকরণাদ্রাজ্ঞঃ সংজায়তে ভয়ম্
মিত্রাণি চ ন বর্ধন্তে তথামিত্রীভবন্ত্যপি
91.21
ব্রাহ্মণান্বৈ তদাসূয়াদ্যদা বৈরোচনো বলিঃ
অথাস্মাচ্ছ্রীরপাক্রামদ্যাস্মিন্নাসীত্প্রতাপিনী
91.22
ততস্তস্মাদপক্রম্য সাগচ্ছত্পাকশাসনম্
অথ সোঽন্বতপত্পশ্চাচ্ছ্রিয়ং দৃষ্ট্বা পুরংদরে
91.23
এতত্ফলমসূয়ায়া অভিমানস্য চাভিভো
তস্মাদ্বুধ্যস্ব মান্ধাতর্মা ত্বা জহ্যাত্প্রতাপিনী
91.24
দর্পো নাম শ্রিয়ঃ পুত্রো জজ্ঞেঽধর্মাদিতি শ্রুতিঃ
তেন দেবাসুরা রাজন্নীতাঃ সুবহুশো বশম্
91.25
রাজর্ষয়শ্চ বহবস্তস্মাদ্বুধ্যস্ব পার্থিব
রাজা ভবতি তং জিত্বা দাসস্তেন পরাজিতঃ
91.26
স যথা দর্পসহিতমধর্মং নানুসেবসে
তথা বর্তস্ব মান্ধাতশ্চিরং চেত্স্থাতুমিচ্ছসি
91.27
মত্তাত্প্রমত্তাত্পোগণ্ডাদুন্মত্তাচ্চ বিশেষতঃ
তদভ্যাসাদুপাবর্তাদহিতানাং চ সেবনাৎ
91.28
নিগৃহীতাদমাত্যাচ্চ স্ত্রীভ্যশ্চৈব বিশেষতঃ
পর্বতাদ্বিষমাদ্দুর্গাদ্ধস্তিনোঽশ্বাত্সরীসৃপাৎ
91.29
এতেভ্যো নিত্যয়ত্তঃ স্যান্নক্তংচর্যাং চ বর্জয়েৎ
অত্যায়ং চাতিমানং চ দম্ভং ক্রোধং চ বর্জয়েৎ
91.30
অবিজ্ঞাতাসু চ স্ত্রীষু ক্লীবাসু স্বৈরিণীষু চ
পরভার্যাসু কন্যাসু নাচরেন্মৈথুনং নৃপঃ
91.31
কুলেষু পাপরক্ষাংসি জায়ন্তে বর্ণসংকরাৎ
অপুমাংসোঽঙ্গহীনাশ্চ স্থূলজিহ্বা বিচেতসঃ
91.32
এতে চান্যে চ জায়ন্তে যদা রাজা প্রমাদ্যতি
তস্মাদ্রাজ্ঞা বিশেষেণ বর্তিতব্যং প্রজাহিতে
91.33
ক্ষত্রিয়স্য প্রমত্তস্য দোষঃ সংজায়তে মহান্
অধর্মাঃ সংপ্রবর্তন্তে প্রজাসংকরকারকাঃ
91.34
অশীতে বিদ্যতে শীতং শীতে শীতং ন বিদ্যতে
অবৃষ্টিরতিবৃষ্টিশ্চ ব্যাধিশ্চাবিশতি প্রজাঃ
91.35
নক্ষত্রাণ্যুপতিষ্ঠন্তি গ্রহা ঘোরাস্তথাপরে
উত্পাতাশ্চাত্র দৃশ্যন্তে বহবো রাজনাশনাঃ
91.36
অরক্ষিতাত্মা যো রাজা প্রজাশ্চাপি ন রক্ষতি
প্রজাশ্চ তস্য ক্ষীয়ন্তে তাশ্চ সোঽনু বিনশ্যতি
91.37
দ্বাবাদদাতে হ্যেকস্য দ্বয়োশ্চ বহবোঽপরে
কুমার্যঃ সংপ্রলুপ্যন্তে তদাহুর্নৃপদূষণম্
91.38
মমৈতদিতি নৈকস্য মনুষ্যেষ্ববতিষ্ঠতে
ত্যক্ত্বা ধর্মং যদা রাজা প্রমাদমনুতিষ্ঠতি