UtshovChapter 89
89.1
युधिष्ठिर उवाच
यदा राजा समर्थोऽपि कोशार्थी स्यान्महामते
कथं प्रवर्तेत तदा तन्मे ब्रूहि पितामह
Yudhishthira uvacha
Yada raja samarthopi kosharthi syanmahamate
Katham pravarteta tada tanme bruhi pitamaha
89.2
भीष्म उवाच
यथादेशं यथाकालमपि चैव यथाबलम्
अनुशिष्यात्प्रजा राजा धर्मार्थी तद्धिते रतः
Bhishma uvacha
Yathadesham yathakalamapi chaiva yathabalam
Anushishyatpraja raja dharmarthi taddhite ratah
89.3
यथा तासां च मन्येत श्रेय आत्मन एव च
तथा धर्म्याणि सर्वाणि राजा राष्ट्रे प्रवर्तयेत्
Yatha tasam cha manyeta shreya atmana eva cha
Tatha dharmyani sarvani raja rashtre pravartayet
89.4
मधुदोहं दुहेद्राष्ट्रं भ्रमरान्न विपातयेत्
वत्सापेक्षी दुहेच्चैव स्तनांश्च न विकुट्टयेत्
Madhudoham duhedrashtram bhramaranna vipatayet
Vatsapekshi duhechchaiva stananshcha na vikuttayet
89.5
जलौकावत्पिबेद्राष्ट्रं मृदुनैव नराधिप
व्याघ्रीव च हरेत्पुत्रमदष्ट्वा मा पतेदिति
Jalaukavatpibedrashtram mridunaiva naradhipa
Vyaghriva cha haretputramadashtva ma patediti
89.6
अल्पेनाल्पेन देयेन वर्धमानं प्रदापयेत्
ततो भूयस्ततो भूयः कामं वृद्धिं समाचरेत्
Alpenalpena deyena vardhamanam pradapayet
Tato bhuyastato bhuyah kamam vriddhim samacharet
89.7
दमयन्निव दम्यानां शश्वद्भारं प्रवर्धयेत्
मृदुपूर्वं प्रयत्नेन पाशानभ्यवहारयेत्
Damayanniva damyanam shashvadbharam pravardhayet
Mridupurvam prayatnena pashanabhyavaharayet
89.8
सकृत्पाशावकीर्णास्ते न भविष्यन्ति दुर्दमाः
उचितेनैव भोक्तव्यास्ते भविष्यन्ति यत्नतः
Sakritpashavakirnaste na bhavishyanti durdamah
Uchitenaiva bhoktavyaste bhavishyanti yatnatah
89.9
तस्मात्सर्वसमारम्भो दुर्लभः पुरुषव्रजः
यथामुख्यान्सान्त्वयित्वा भोक्तव्य इतरो जनः
Tasmatsarvasamarambho durlabhah purushavrajah
Yathamukhyansantvayitva bhoktavya itaro janah
89.10
ततस्तान्भेदयित्वाथ परस्परविवक्षितान्
भुञ्जीत सान्त्वयित्वैव यथासुखमयत्नतः
Tatastanbhedayitvatha parasparavivakshitan
Bhunjita santvayitvaiva yathasukhamayatnatah
89.11
न चास्थाने न चाकाले करानेभ्योऽनुपातयेत्
आनुपूर्व्येण सान्त्वेन यथाकालं यथाविधि
Na chasthane na chakale karanebhyonupatayet
Anupurvyena santvena yathakalam yathavidhi
89.12
उपायान्प्रब्रवीम्येतान्न मे माया विवक्षिता
अनुपायेन दमयन्प्रकोपयति वाजिनः
Upayanprabravimyetanna me maya vivakshita
Anupayena damayanprakopayati vajinah
89.13
पानागाराणि वेशाश्च वेशप्रापणिकास्तथा
कुशीलवाः सकितवा ये चान्ये केचिदीदृशाः
Panagarani veshashcha veshaprapanikastatha
Kushilavah sakitava ye chanye kechididrishah
89.14
नियम्याः सर्व एवैते ये राष्ट्रस्योपघातकाः
एते राष्ट्रे हि तिष्ठन्तो बाधन्ते भद्रिकाः प्रजाः
Niyamyah sarva evaite ye rashtrasyopaghatakah
Ete rashtre hi tishthanto badhante bhadrikah prajah
89.15
न केनचिद्याचितव्यः कश्चित्किंचिदनापदि
इति व्यवस्था भूतानां पुरस्तान्मनुना कृता
Na kenachidyachitavyah kashchitkinchidanapadi
Iti vyavastha bhutanam purastanmanuna krita
89.16
सर्वे तथा न जीवेयुर्न कुर्युः कर्म चेदिह
सर्व एव त्रयो लोका न भवेयुरसंशयम्
Sarve tatha na jiveyurna kuryuh karma chediha
Sarva eva trayo loka na bhaveyurasanshayam
89.17
प्रभुर्नियमने राजा य एतान्न नियच्छति
भुङ्क्ते स तस्य पापस्य चतुर्भागमिति श्रुतिः
तथा कृतस्य धर्मस्य चतुर्भागमुपाश्नुते
Prabhurniyamane raja ya etanna niyachchhati
Bhunkte sa tasya papasya chaturbhagamiti shrutih
Tatha kritasya dharmasya chaturbhagamupashnute
89.18
स्थानान्येतानि संगम्य प्रसङ्गे भूतिनाशनः
कामप्रसक्तः पुरुषः किमकार्यं विवर्जयेत्
Sthananyetani sangamya prasange bhutinashanah
Kamaprasaktah purushah kimakaryam vivarjayet
89.19
आपद्येव तु याचेरन्येषां नास्ति परिग्रहः
दातव्यं धर्मतस्तेभ्यस्त्वनुक्रोशाद्दयार्थिना
Apadyeva tu yacheranyesham nasti parigrahah
Datavyam dharmatastebhyastvanukroshaddayarthina
89.20
मा ते राष्ट्रे याचनका मा ते भूयुश्च दस्यवः
इष्टादातार एवैते नैते भूतस्य भावकाः
Ma te rashtre yachanaka ma te bhuyushcha dasyavah
Ishtadatara evaite naite bhutasya bhavakah
89.21
ये भूतान्यनुगृह्णन्ति वर्धयन्ति च ये प्रजाः
ते ते राष्ट्रे प्रवर्तन्तां मा भूतानामभावकाः
Ye bhutanyanugrihnanti vardhayanti cha ye prajah
Te te rashtre pravartantam ma bhutanamabhavakah
89.22
दण्ड्यास्ते च महाराज धनादानप्रयोजनाः
प्रयोगं कारयेयुस्तान्यथा बलिकरांस्तथा
Dandyaste cha maharaja dhanadanaprayojanah
Prayogam karayeyustanyatha balikaranstatha
89.23
कृषिगोरक्ष्यवाणिज्यं यच्चान्यत्किंचिदीदृशम्
पुरुषैः कारयेत्कर्म बहुभिः सह कर्मिभिः
Krishigorakshyavanijyam yachchanyatkinchididrisham
Purushaih karayetkarma bahubhih saha karmibhih
89.24
नरश्चेत्कृषिगोरक्ष्यं वाणिज्यं चाप्यनुष्ठितः
संशयं लभते किंचित्तेन राजा विगर्ह्यते
Narashchetkrishigorakshyam vanijyam chapyanushthitah
Sanshayam labhate kinchittena raja vigarhyate
89.25
धनिनः पूजयेन्नित्यं यानाच्छादनभोजनैः
वक्तव्याश्चानुगृह्णीध्वं पूजाः सह मयेति ह
Dhaninah pujayennityam yanachchhadanabhojanaih
Vaktavyashchanugrihnidhvam pujah saha mayeti ha
89.26
अङ्गमेतन्महद्राज्ञां धनिनो नाम भारत
ककुदं सर्वभूतानां धनस्थो नात्र संशयः
Angametanmahadragyam dhanino nama bharata
Kakudam sarvabhutanam dhanastho natra sanshayah
89.27
प्राज्ञः शूरो धनस्थश्च स्वामी धार्मिक एव च
तपस्वी सत्यवादी च बुद्धिमांश्चाभिरक्षति
Pragyah shuro dhanasthashcha svami dharmika eva cha
Tapasvi satyavadi cha buddhimanshchabhirakshati
89.28
तस्मादेतेषु सर्वेषु प्रीतिमान्भव पार्थिव
सत्यमार्जवमक्रोधमानृशंस्यं च पालय
Tasmadeteshu sarveshu pritimanbhava parthiva
Satyamarjavamakrodhamanrishansyam cha palaya
89.29
एवं दण्डं च कोशं च मित्रं भूमिं च लप्स्यसे
सत्यार्जवपरो राजन्मित्रकोशसमन्वितः
Evam dandam cha kosham cha mitram bhumim cha lapsyase
Satyarjavaparo rajanmitrakoshasamanvitah