UtshovChapter 81
81.1
युधिष्ठिर उवाच
यदप्यल्पतरं कर्म तदप्येकेन दुष्करम्
पुरुषेणासहायेन किमु राज्यं पितामह
Yudhishthira uvacha
Yadapyalpataram karma tadapyekena dushkaram
Purushenasahayena kimu rajyam pitamaha
81.2
किंशीलः किंसमाचारो राज्ञोऽर्थसचिवो भवेत्
कीदृशे विश्वसेद्राजा कीदृशे नापि विश्वसेत्
Kinshilah kinsamacharo ragyorthasachivo bhavet
Kidrishe vishvasedraja kidrishe napi vishvaset
81.3
भीष्म उवाच
चतुर्विधानि मित्राणि राज्ञां राजन्भवन्त्युत
सहार्थो भजमानश्च सहजः कृत्रिमस्तथा
Bhishma uvacha
Chaturvidhani mitrani ragyam rajanbhavantyuta
Sahartho bhajamanashcha sahajah kritrimastatha
81.4
धर्मात्मा पञ्चमं मित्रं स तु नैकस्य न द्वयोः
यतो धर्मस्ततो वा स्यान्मध्यस्थो वा ततो भवेत्
Dharmatma panchamam mitram sa tu naikasya na dvayoh
Yato dharmastato va syanmadhyastho va tato bhavet
81.5
यस्तस्यार्थो न रोचेत न तं तस्य प्रकाशयेत्
धर्माधर्मेण राजानश्चरन्ति विजिगीषवः
Yastasyartho na rocheta na tam tasya prakashayet
Dharmadharmena rajanashcharanti vijigishavah
81.6
चतुर्णां मध्यमौ श्रेष्ठौ नित्यं शङ्क्यौ तथापरौ
सर्वे नित्यं शङ्कितव्याः प्रत्यक्षं कार्यमात्मनः
Chaturnam madhyamau shreshthau nityam shankyau tathaparau
Sarve nityam shankitavyah pratyaksham karyamatmanah
81.7
न हि राज्ञा प्रमादो वै कर्तव्यो मित्ररक्षणे
प्रमादिनं हि राजानं लोकाः परिभवन्त्युत
Na hi ragya pramado vai kartavyo mitrarakshane
Pramadinam hi rajanam lokah paribhavantyuta
81.8
असाधुः साधुतामेति साधुर्भवति दारुणः
अरिश्च मित्रं भवति मित्रं चापि प्रदुष्यति
Asadhuh sadhutameti sadhurbhavati darunah
Arishcha mitram bhavati mitram chapi pradushyati
81.9
अनित्यचित्तः पुरुषस्तस्मिन्को जातु विश्वसेत्
तस्मात्प्रधानं यत्कार्यं प्रत्यक्षं तत्समाचरेत्
Anityachittah purushastasminko jatu vishvaset
Tasmatpradhanam yatkaryam pratyaksham tatsamacharet
81.10
एकान्तेन हि विश्वासः कृत्स्नो धर्मार्थनाशकः
अविश्वासश्च सर्वत्र मृत्युना न विशिष्यते
Ekantena hi vishvasah kritsno dharmarthanashakah
Avishvasashcha sarvatra mrityuna na vishishyate
81.11
अकालमृत्युर्विश्वासो विश्वसन्हि विपद्यते
यस्मिन्करोति विश्वासमिच्छतस्तस्य जीवति
Akalamrityurvishvaso vishvasanhi vipadyate
Yasminkaroti vishvasamichchhatastasya jivati
81.12
तस्माद्विश्वसितव्यं च शङ्कितव्यं च केषुचित्
एषा नीतिगतिस्तात लक्ष्मीश्चैव सनातनी
Tasmadvishvasitavyam cha shankitavyam cha keshuchit
Esha nitigatistata lakshmishchaiva sanatani
81.13
यं मन्येत ममाभावादिममर्थागमः स्पृशेत्
नित्यं तस्माच्छङ्कितव्यममित्रं तं विदुर्बुधाः
Yam manyeta mamabhavadimamarthagamah sprishet
Nityam tasmachchhankitavyamamitram tam vidurbudhah
81.14
यस्य क्षेत्रादप्युदकं क्षेत्रमन्यस्य गच्छति
न तत्रानिच्छतस्तस्य भिद्येरन्सर्वसेतवः
Yasya kshetradapyudakam kshetramanyasya gachchhati
Na tatranichchhatastasya bhidyeransarvasetavah
81.15
तथैवात्युदकाद्भीतस्तस्य भेदनमिच्छति
यमेवंलक्षणं विद्यात्तममित्रं विनिर्दिशेत्
Tathaivatyudakadbhitastasya bhedanamichchhati
Yamevanlakshanam vidyattamamitram vinirdishet
81.16
यः समृद्ध्या न तुष्येत क्षये दीनतरो भवेत्
एतदुत्तममित्रस्य निमित्तमभिचक्षते
Yah samriddhya na tushyeta kshaye dinataro bhavet
Etaduttamamitrasya nimittamabhichakshate
81.17
यं मन्येत ममाभावादस्याभावो भवेदिति
तस्मिन्कुर्वीत विश्वासं यथा पितरि वै तथा
Yam manyeta mamabhavadasyabhavo bhavediti
Tasminkurvita vishvasam yatha pitari vai tatha
81.18
तं शक्त्या वर्धमानश्च सर्वतः परिबृंहयेत्
नित्यं क्षताद्वारयति यो धर्मेष्वपि कर्मसु
Tam shaktya vardhamanashcha sarvatah paribrinhayet
Nityam kshatadvarayati yo dharmeshvapi karmasu
81.19
क्षताद्भीतं विजानीयादुत्तमं मित्रलक्षणम्
ये तस्य क्षतमिच्छन्ति ते तस्य रिपवः स्मृताः
Kshatadbhitam vijaniyaduttamam mitralakshanam
Ye tasya kshatamichchhanti te tasya ripavah smritah
81.20
व्यसनान्नित्यभीतोऽसौ समृद्ध्यामेव तृप्यते
यत्स्यादेवंविधं मित्रं तदात्मसममुच्यते
Vyasanannityabhitosau samriddhyameva tripyate
Yatsyadevanvidham mitram tadatmasamamuchyate
81.21
रूपवर्णस्वरोपेतस्तितिक्षुरनसूयकः
कुलीनः शीलसंपन्नः स ते स्यात्प्रत्यनन्तरः
Rupavarnasvaropetastitikshuranasuyakah
Kulinah shilasampannah sa te syatpratyanantarah
81.22
मेधावी स्मृतिमान्दक्षः प्रकृत्या चानृशंसवान्
यो मानितोऽमानितो वा न संदूष्येत्कदाचन
Medhavi smritimandakshah prakritya chanrishansavan
Yo manitomanito va na sandushyetkadachana
81.23
ऋत्विग्वा यदि वाचार्यः सखा वात्यन्तसंस्तुतः
गृहे वसेदमात्यस्ते यः स्यात्परमपूजितः
Ritvigva yadi vacharyah sakha vatyantasanstutah
Grihe vasedamatyaste yah syatparamapujitah
81.24
स ते विद्यात्परं मन्त्रं प्रकृतिं चार्थधर्मयोः
विश्वासस्ते भवेत्तत्र यथा पितरि वै तथा
Sa te vidyatparam mantram prakritim charthadharmayoh
Vishvasaste bhavettatra yatha pitari vai tatha
81.25
नैव द्वौ न त्रयः कार्या न मृष्येरन्परस्परम्
एकार्थादेव भूतानां भेदो भवति सर्वदा
Naiva dvau na trayah karya na mrishyeranparasparam
Ekarthadeva bhutanam bhedo bhavati sarvada
81.26
कीर्तिप्रधानो यश्च स्याद्यश्च स्यात्समये स्थितः
समर्थान्यश्च न द्वेष्टि समर्थान्कुरुते च यः
Kirtipradhano yashcha syadyashcha syatsamaye sthitah
Samarthanyashcha na dveshti samarthankurute cha yah
81.27
यो न कामाद्भयाल्लोभात्क्रोधाद्वा धर्ममुत्सृजेत्
दक्षः पर्याप्तवचनः स ते स्यात्प्रत्यनन्तरः
Yo na kamadbhayallobhatkrodhadva dharmamutsrijet
Dakshah paryaptavachanah sa te syatpratyanantarah
81.28
शूरश्चार्यश्च विद्वांश्च प्रतिपत्तिविशारदः
कुलीनः शीलसंपन्नस्तितिक्षुरनसूयकः
Shurashcharyashcha vidvanshcha pratipattivisharadah
Kulinah shilasampannastitikshuranasuyakah
81.29
एते ह्यमात्याः कर्तव्याः सर्वकर्मस्ववस्थिताः
पूजिताः संविभक्ताश्च सुसहायाः स्वनुष्ठिताः
Ete hyamatyah kartavyah sarvakarmasvavasthitah
Pujitah sanvibhaktashcha susahayah svanushthitah
81.30
कृत्स्नमेते विनिक्षिप्ताः प्रतिरूपेषु कर्मसु
युक्ता महत्सु कार्येषु श्रेयांस्युत्पादयन्ति च
Kritsnamete vinikshiptah pratirupeshu karmasu
Yukta mahatsu karyeshu shreyansyutpadayanti cha
81.31
एते कर्माणि कुर्वन्ति स्पर्धमाना मिथः सदा
अनुतिष्ठन्ति चैवार्थानाचक्षाणाः परस्परम्
Ete karmani kurvanti spardhamana mithah sada
Anutishthanti chaivarthanachakshanah parasparam
81.32
ज्ञातिभ्यश्चैव बिभ्येथा मृत्योरिव यतः सदा
उपराजेव राजर्धिं ज्ञातिर्न सहते सदा
Gyatibhyashchaiva bibhyetha mrityoriva yatah sada
Uparajeva rajardhim gyatirna sahate sada
81.33
ऋजोर्मृदोर्वदान्यस्य ह्रीमतः सत्यवादिनः
नान्यो ज्ञातेर्महाबाहो विनाशमभिनन्दति
Rijormridorvadanyasya hrimatah satyavadinah
Nanyo gyatermahabaho vinashamabhinandati
81.34
अज्ञातिता नातिसुखा नावज्ञेयास्त्वतः परम्
अज्ञातिमन्तं पुरुषं परे परिभवन्त्युत
Agyatita natisukha navagyeyastvatah param
Agyatimantam purusham pare paribhavantyuta
81.35
निकृतस्य नरैरन्यैर्ज्ञातिरेव परायणम्
नान्यैर्निकारं सहते ज्ञातेर्ज्ञातिः कदाचन
Nikritasya narairanyairgyatireva parayanam
Nanyairnikaram sahate gyatergyatih kadachana
81.36
आत्मानमेव जानाति निकृतं बान्धवैरपि
तेषु सन्ति गुणाश्चैव नैर्गुण्यं तेषु लक्ष्यते
Atmanameva janati nikritam bandhavairapi
Teshu santi gunashchaiva nairgunyam teshu lakshyate
81.37
नाज्ञातिरनुगृह्णाति नाज्ञातिर्दिग्धमस्यति
उभयं ज्ञातिलोकेषु दृश्यते साध्वसाधु च
Nagyatiranugrihnati nagyatirdigdhamasyati
Ubhayam gyatilokeshu drishyate sadhvasadhu cha
81.38
तान्मानयेत्पूजयेच्च नित्यं वाचा च कर्मणा
कुर्याच्च प्रियमेतेभ्यो नाप्रियं किंचिदाचरेत्
Tanmanayetpujayechcha nityam vacha cha karmana
Kuryachcha priyametebhyo napriyam kinchidacharet
81.39
विश्वस्तवदविश्वस्तस्तेषु वर्तेत सर्वदा
न हि दोषो गुणो वेति निस्पृक्तस्तेषु दृश्यते
Vishvastavadavishvastasteshu varteta sarvada
Na hi dosho guno veti nispriktasteshu drishyate
81.40
तस्यैवं वर्तमानस्य पुरुषस्याप्रमादिनः
अमित्राः संप्रसीदन्ति तथा मित्रीभवन्त्यपि
Tasyaivam vartamanasya purushasyapramadinah
Amitrah samprasidanti tatha mitribhavantyapi
81.41
य एवं वर्तते नित्यं ज्ञातिसंबन्धिमण्डले
मित्रेष्वमित्रेष्वैश्वर्ये चिरं यशसि तिष्ठति
Ya evam vartate nityam gyatisambandhimandale
Mitreshvamitreshvaishvarye chiram yashasi tishthati