UtshovChapter 79
79.1
युधिष्ठिर उवाच
व्याख्याता क्षत्रधर्मेण वृत्तिरापत्सु भारत
कथंचिद्वैश्यधर्मेण जीवेद्वा ब्राह्मणो न वा
Yudhishthira uvacha
Vyakhyata kshatradharmena vrittirapatsu bharata
Kathanchidvaishyadharmena jivedva brahmano na va
79.2
भीष्म उवाच
अशक्तः क्षत्रधर्मेण वैश्यधर्मेण वर्तयेत्
कृषिगोरक्षमास्थाय व्यसने वृत्तिसंक्षये
Bhishma uvacha
Ashaktah kshatradharmena vaishyadharmena vartayet
Krishigorakshamasthaya vyasane vrittisankshaye
79.3
युधिष्ठिर उवाच
कानि पण्यानि विक्रीणन्स्वर्गलोकान्न हीयते
ब्राह्मणो वैश्यधर्मेण वर्तयन्भरतर्षभ
Yudhishthira uvacha
Kani panyani vikrinansvargalokanna hiyate
Brahmano vaishyadharmena vartayanbharatarshabha
79.4
भीष्म उवाच
सुरा लवणमित्येव तिलान्केसरिणः पशून्
ऋषभान्मधु मांसं च कृतान्नं च युधिष्ठिर
Bhishma uvacha
Sura lavanamityeva tilankesarinah pashun
Rishabhanmadhu mansam cha kritannam cha yudhishthira
79.5
सर्वास्ववस्थास्वेतानि ब्राह्मणः परिवर्जयेत्
एतेषां विक्रयात्तात ब्राह्मणो नरकं व्रजेत्
Sarvasvavasthasvetani brahmanah parivarjayet
Etesham vikrayattata brahmano narakam vrajet
79.6
अजोऽग्निर्वरुणो मेषः सूर्योऽश्वः पृथिवी विराट्
धेनुर्यज्ञश्च सोमश्च न विक्रेयाः कथंचन
Ajognirvaruno meshah suryoshvah prithivi virat
Dhenuryagyashcha somashcha na vikreyah kathanchana
79.7
पक्वेनामस्य निमयं न प्रशंसन्ति साधवः
निमयेत्पक्वमामेन भोजनार्थाय भारत
Pakvenamasya nimayam na prashansanti sadhavah
Nimayetpakvamamena bhojanarthaya bharata
79.8
वयं सिद्धमशिष्यामो भवान्साधयतामिदम्
एवं समीक्ष्य निमयन्नाधर्मोऽस्ति कदाचन
Vayam siddhamashishyamo bhavansadhayatamidam
Evam samikshya nimayannadharmosti kadachana
79.9
अत्र ते वर्तयिष्यामि यथा धर्मः पुरातनः
व्यवहारप्रवृत्तानां तन्निबोध युधिष्ठिर
Atra te vartayishyami yatha dharmah puratanah
Vyavaharapravrittanam tannibodha yudhishthira
79.10
भवतेऽहं ददानीदं भवानेतत्प्रयच्छतु
रुचिते वर्तते धर्मो न बलात्संप्रवर्तते
Bhavateham dadanidam bhavanetatprayachchhatu
Ruchite vartate dharmo na balatsampravartate
79.11
इत्येवं संप्रवर्तन्त व्यवहाराः पुरातनाः
ऋषीणामितरेषां च साधु चेदमसंशयम्
Ityevam sampravartanta vyavaharah puratanah
Rishinamitaresham cha sadhu chedamasanshayam
79.12
युधिष्ठिर उवाच
अथ तात यदा सर्वाः शस्त्रमाददते प्रजाः
व्युत्क्रामन्ति स्वधर्मेभ्यः क्षत्रस्य क्षीयते बलम्
Yudhishthira uvacha
Atha tata yada sarvah shastramadadate prajah
Vyutkramanti svadharmebhyah kshatrasya kshiyate balam
79.13
राजा त्राता न लोके स्यात्किं तदा स्यात्परायणम्
एतन्मे संशयं ब्रूहि विस्तरेण पितामह
Raja trata na loke syatkim tada syatparayanam
Etanme sanshayam bruhi vistarena pitamaha
79.14
भीष्म उवाच
दानेन तपसा यज्ञैरद्रोहेण दमेन च
ब्राह्मणप्रमुखा वर्णाः क्षेममिच्छेयुरात्मनः
Bhishma uvacha
Danena tapasa yagyairadrohena damena cha
Brahmanapramukha varnah kshemamichchheyuratmanah
79.15
तेषां ये वेदबलिनस्त उत्थाय समन्ततः
राज्ञो बलं वर्धयेयुर्महेन्द्रस्येव देवताः
Tesham ye vedabalinasta utthaya samantatah
Ragyo balam vardhayeyurmahendrasyeva devatah
79.16
राज्ञो हि क्षीयमाणस्य ब्रह्मैवाहुः परायणम्
तस्माद्ब्रह्मबलेनैव समुत्थेयं विजानता
Ragyo hi kshiyamanasya brahmaivahuh parayanam
Tasmadbrahmabalenaiva samuttheyam vijanata
79.17
यदा तु विजयी राजा क्षेमं राष्ट्रेऽभिसंदधेत्
तदा वर्णा यथाधर्ममाविशेयुः स्वकर्मसु
Yada tu vijayi raja kshemam rashtrebhisandadhet
Tada varna yathadharmamavisheyuh svakarmasu
79.18
उन्मर्यादे प्रवृत्ते तु दस्युभिः संकरे कृते
सर्वे वर्णा न दुष्येयुः शस्त्रवन्तो युधिष्ठिर
Unmaryade pravritte tu dasyubhih sankare krite
Sarve varna na dushyeyuh shastravanto yudhishthira
79.19
युधिष्ठिर उवाच
अथ चेत्सर्वतः क्षत्रं प्रदुष्येद्ब्राह्मणान्प्रति
कस्तस्य ब्राह्मणस्त्राता को धर्मः किं परायणम्
Yudhishthira uvacha
Atha chetsarvatah kshatram pradushyedbrahmananprati
Kastasya brahmanastrata ko dharmah kim parayanam
79.20
भीष्म उवाच
तपसा ब्रह्मचर्येण शस्त्रेण च बलेन च
अमायया मायया च नियन्तव्यं तदा भवेत्
Bhishma uvacha
Tapasa brahmacharyena shastrena cha balena cha
Amayaya mayaya cha niyantavyam tada bhavet
79.21
क्षत्रस्याभिप्रवृद्धस्य ब्राह्मणेषु विशेषतः
ब्रह्मैव संनियन्तृ स्यात्क्षत्रं हि ब्रह्मसंभवम्
Kshatrasyabhipravriddhasya brahmaneshu visheshatah
Brahmaiva sanniyantri syatkshatram hi brahmasambhavam
79.22
अद्भ्योऽग्निर्ब्रह्मतः क्षत्रमश्मनो लोहमुत्थितम्
तेषां सर्वत्रगं तेजः स्वासु योनिषु शाम्यति
Adbhyognirbrahmatah kshatramashmano lohamutthitam
Tesham sarvatragam tejah svasu yonishu shamyati
79.23
यदा छिनत्त्ययोऽश्मानमग्निश्चापोऽभिपद्यते
क्षत्रं च ब्राह्मणं द्वेष्टि तदा शाम्यन्ति ते त्रयः
Yada chhinattyayoshmanamagnishchapobhipadyate
Kshatram cha brahmanam dveshti tada shamyanti te trayah
79.24
तस्माद्ब्रह्मणि शाम्यन्ति क्षत्रियाणां युधिष्ठिर
समुदीर्णान्यजेयानि तेजांसि च बलानि च
Tasmadbrahmani shamyanti kshatriyanam yudhishthira
Samudirnanyajeyani tejansi cha balani cha
79.25
ब्रह्मवीर्ये मृदूभूते क्षत्रवीर्ये च दुर्बले
दुष्टेषु सर्ववर्णेषु ब्राह्मणान्प्रति सर्वशः
Brahmavirye mridubhute kshatravirye cha durbale
Dushteshu sarvavarneshu brahmananprati sarvashah
79.26
ये तत्र युद्धं कुर्वन्ति त्यक्त्वा जीवितमात्मनः
ब्राह्मणान्परिरक्षन्तो धर्ममात्मानमेव च
Ye tatra yuddham kurvanti tyaktva jivitamatmanah
Brahmananparirakshanto dharmamatmanameva cha
79.27
मनस्विनो मन्युमन्तः पुण्यलोका भवन्ति ते
ब्राह्मणार्थं हि सर्वेषां शस्त्रग्रहणमिष्यते
Manasvino manyumantah punyaloka bhavanti te
Brahmanartham hi sarvesham shastragrahanamishyate
79.28
अति स्विष्टस्वधीतानां लोकानति तपस्विनाम्
अनाशकाग्न्योर्विशतां शूरा यान्ति परां गतिम्
एवमेवात्मनस्त्यागान्नान्यं धर्मं विदुर्जनाः
Ati svishtasvadhitanam lokanati tapasvinam
Anashakagnyorvishatam shura yanti param gatim
Evamevatmanastyagannanyam dharmam vidurjanah
79.29
तेभ्यो नमश्च भद्रं च ये शरीराणि जुह्वति
ब्रह्मद्विषो नियच्छन्तस्तेषां नोऽस्तु सलोकता
ब्रह्मलोकजितः स्वर्ग्यान्वीरांस्तान्मनुरब्रवीत्
Tebhyo namashcha bhadram cha ye sharirani juhvati
Brahmadvisho niyachchhantastesham nostu salokata
Brahmalokajitah svargyanviranstanmanurabravit
79.30
यथाश्वमेधावभृथे स्नाताः पूता भवन्त्युत
दुष्कृतः सुकृतश्चैव तथा शस्त्रहता रणे
Yathashvamedhavabhrithe snatah puta bhavantyuta
Dushkritah sukritashchaiva tatha shastrahata rane
79.31
भवत्यधर्मो धर्मो हि धर्माधर्मावुभावपि
कारणाद्देशकालस्य देशकालः स तादृशः
Bhavatyadharmo dharmo hi dharmadharmavubhavapi
Karanaddeshakalasya deshakalah sa tadrishah
79.32
मैत्राः क्रूराणि कुर्वन्तो जयन्ति स्वर्गमुत्तमम्
धर्म्याः पापानि कुर्वन्तो गच्छन्ति परमां गतिम्
Maitrah krurani kurvanto jayanti svargamuttamam
Dharmyah papani kurvanto gachchhanti paramam gatim
79.33
ब्राह्मणस्त्रिषु कालेषु शस्त्रं गृह्णन्न दुष्यति
आत्मत्राणे वर्णदोषे दुर्गस्य नियमेषु च
Brahmanastrishu kaleshu shastram grihnanna dushyati
Atmatrane varnadoshe durgasya niyameshu cha
79.34
युधिष्ठिर उवाच
अभ्युत्थिते दस्युबले क्षत्रार्थे वर्णसंकरे
संप्रमूढेषु वर्णेषु यद्यन्योऽभिभवेद्बली
Yudhishthira uvacha
Abhyutthite dasyubale kshatrarthe varnasankare
Sampramudheshu varneshu yadyanyobhibhavedbali
79.35
ब्राह्मणो यदि वा वैश्यः शूद्रो वा राजसत्तम
दस्युभ्योऽथ प्रजा रक्षेद्दण्डं धर्मेण धारयन्
Brahmano yadi va vaishyah shudro va rajasattama
Dasyubhyotha praja raksheddandam dharmena dharayan
79.36
कार्यं कुर्यान्न वा कुर्यात्संवार्यो वा भवेन्न वा
न स्म शस्त्रं ग्रहीतव्यमन्यत्र क्षत्रबन्धुतः
Karyam kuryanna va kuryatsanvaryo va bhavenna va
Na sma shastram grahitavyamanyatra kshatrabandhutah
79.37
भीष्म उवाच
अपारे यो भवेत्पारमप्लवे यः प्लवो भवेत्
शूद्रो वा यदि वाप्यन्यः सर्वथा मानमर्हति
Bhishma uvacha
Apare yo bhavetparamaplave yah plavo bhavet
Shudro va yadi vapyanyah sarvatha manamarhati
79.38
यमाश्रित्य नरा राजन्वर्तयेयुर्यथासुखम्
अनाथाः पाल्यमाना वै दस्युभिः परिपीडिताः
Yamashritya nara rajanvartayeyuryathasukham
Anathah palyamana vai dasyubhih paripiditah
79.39
तमेव पूजयेरंस्ते प्रीत्या स्वमिव बान्धवम्
महद्ध्यभीक्ष्णं कौरव्य कर्ता सन्मानमर्हति
Tameva pujayeranste pritya svamiva bandhavam
Mahaddhyabhikshnam kauravya karta sanmanamarhati
79.40
किमुक्ष्णावहता कृत्यं किं धेन्वा चाप्यदुग्धया
वन्ध्यया भार्यया कोऽर्थः कोऽर्थो राज्ञाप्यरक्षता
Kimukshnavahata krityam kim dhenva chapyadugdhaya
Vandhyaya bharyaya korthah kortho ragyapyarakshata
79.41
यथा दारुमयो हस्ती यथा चर्ममयो मृगः
यथा ह्यनेत्रः शकटः पथि क्षेत्रं यथोषरम्
Yatha darumayo hasti yatha charmamayo mrigah
Yatha hyanetrah shakatah pathi kshetram yathosharam
79.42
एवं ब्रह्मानधीयानं राजा यश्च न रक्षिता
न वर्षति च यो मेघः सर्व एते निरर्थकाः
Evam brahmanadhiyanam raja yashcha na rakshita
Na varshati cha yo meghah sarva ete nirarthakah
79.43
नित्यं यस्तु सतो रक्षेदसतश्च निबर्हयेत्
स एव राजा कर्तव्यस्तेन सर्वमिदं धृतम्
Nityam yastu sato rakshedasatashcha nibarhayet
Sa eva raja kartavyastena sarvamidam dhritam