Utshovঅধ্যায় 76
76.1
বৈশংপায়ন উবাচ
অথ দীর্ঘস্য কালস্য দেবয়ানী নৃপোত্তম
বনং তদেব নির্যাতা ক্রীডার্থং বরবর্ণিনী
76.2
তেন দাসীসহস্রেণ সার্ধং শর্মিষ্ঠয়া তদা
তমেব দেশং সংপ্রাপ্তা যথাকামং চচার সা
তাভিঃ সখীভিঃ সহিতা সর্বাভির্মুদিতা ভৃশম্
76.3
ক্রীডন্ত্যোঽভিরতাঃ সর্বাঃ পিবন্ত্যো মধুমাধবীম্
খাদন্ত্যো বিবিধান্ভক্ষ্যান্বিদশন্ত্যঃ ফলানি চ
76.4
পুনশ্চ নাহুষো রাজা মৃগলিপ্সুর্যদৃচ্ছয়া
তমেব দেশং সংপ্রাপ্তো জলার্থী শ্রমকর্শিতঃ
76.5
দদৃশে দেবয়ানীং চ শর্মিষ্ঠাং তাশ্চ যোষিতঃ
পিবন্তীর্ললমানাশ্চ দিব্যাভরণভূষিতাঃ
76.6
উপবিষ্টাং চ দদৃশে দেবয়ানীং শুচিস্মিতাম্
রূপেণাপ্রতিমাং তাসাং স্ত্রীণাং মধ্যে বরাঙ্গনাম্
শর্মিষ্ঠয়া সেব্যমানাং পাদসংবাহনাদিভিঃ
76.7
যয়াতিরুবাচ
দ্বাভ্যাং কন্যাসহস্রাভ্যাং দ্বে কন্যে পরিবারিতে
গোত্রে চ নামনী চৈব দ্বয়োঃ পৃচ্ছামি বামহম্
76.8
দেবয়ান্যুবাচ
আখ্যাস্যাম্যহমাদত্স্ব বচনং মে নরাধিপ
শুক্রো নামাসুরগুরুঃ সুতাং জানীহি তস্য মাম্
76.9
ইয়ং চ মে সখী দাসী যত্রাহং তত্র গামিনী
দুহিতা দানবেন্দ্রস্য শর্মিষ্ঠা বৃষপর্বণঃ
76.10
যয়াতিরুবাচ
কথং নু তে সখী দাসী কন্যেয়ং বরবর্ণিনী
অসুরেন্দ্রসুতা সুভ্রু পরং কৌতূহলং হি মে
76.11
দেবয়ান্যুবাচ
সর্ব এব নরব্যাঘ্র বিধানমনুবর্ততে
বিধানবিহিতং মত্বা মা বিচিত্রাঃ কথাঃ কৃথাঃ
76.12
রাজবদ্রূপবেষৌ তে ব্রাহ্মীং বাচং বিভর্ষি চ
কিংনামা ত্বং কুতশ্চাসি কস্য পুত্রশ্চ শংস মে
76.13
যয়াতিরুবাচ
ব্রহ্মচর্যেণ কৃত্স্নো মে বেদঃ শ্রুতিপথং গতঃ
রাজাহং রাজপুত্রশ্চ যয়াতিরিতি বিশ্রুতঃ
76.14
দেবয়ান্যুবাচ
কেনাস্যর্থেন নৃপতে ইমং দেশমুপাগতঃ
জিঘৃক্ষুর্বারিজং কিংচিদথ বা মৃগলিপ্সয়া
76.15
যয়াতিরুবাচ
মৃগলিপ্সুরহং ভদ্রে পানীয়ার্থমুপাগতঃ
বহু চাপ্যনুয়ুক্তোঽস্মি তন্মানুজ্ঞাতুমর্হসি
76.16
দেবয়ান্যুবাচ
দ্বাভ্যাং কন্যাসহস্রাভ্যাং দাস্যা শর্মিষ্ঠয়া সহ
ত্বদধীনাস্মি ভদ্রং তে সখা ভর্তা চ মে ভব
76.17
যয়াতিরুবাচ
বিদ্ধ্যৌশনসি ভদ্রং তে ন ত্বামর্হোঽস্মি ভামিনি
অবিবাহ্যা হি রাজানো দেবয়ানি পিতুস্তব
76.18
দেবয়ান্যুবাচ
সংসৃষ্টং ব্রহ্মণা ক্ষত্রং ক্ষত্রং চ ব্রহ্মসংহিতম্
ঋষিশ্চ ঋষিপুত্রশ্চ নাহুষাঙ্গ বহস্ব মাম্
76.19
যয়াতিরুবাচ
একদেহোদ্ভবা বর্ণাশ্চত্বারোঽপি বরাঙ্গনে
পৃথগ্ধর্মাঃ পৃথক্শৌচাস্তেষাং তু ব্রাহ্মণো বরঃ
76.20
দেবয়ান্যুবাচ
পাণিধর্মো নাহুষায়ং ন পুম্ভিঃ সেবিতঃ পুরা
তং মে ত্বমগ্রহীরগ্রে বৃণোমি ত্বামহং ততঃ
76.21
কথং নু মে মনস্বিন্যাঃ পাণিমন্যঃ পুমান্স্পৃশেৎ
গৃহীতমৃষিপুত্রেণ স্বয়ং বাপ্যৃষিণা ত্বয়া
76.22
যয়াতিরুবাচ
ক্রুদ্ধাদাশীবিষাত্সর্পাজ্জ্বলনাত্সর্বতোমুখাৎ
দুরাধর্ষতরো বিপ্রঃ পুরুষেণ বিজানতা
76.23
দেবয়ান্যুবাচ
কথমাশীবিষাত্সর্পাজ্জ্বলনাত্সর্বতোমুখাৎ
দুরাধর্ষতরো বিপ্র ইত্যাত্থ পুরুষর্ষভ
76.24
যয়াতিরুবাচ
একমাশীবিষো হন্তি শস্ত্রেণৈকশ্চ বধ্যতে
হন্তি বিপ্রঃ সরাষ্ট্রাণি পুরাণ্যপি হি কোপিতঃ
76.25
দুরাধর্ষতরো বিপ্রস্তস্মাদ্ভীরু মতো মম
অতোঽদত্তাং চ পিত্রা ত্বাং ভদ্রে ন বিবহাম্যহম্
76.26
দেবয়ান্যুবাচ
দত্তাং বহস্ব পিত্রা মাং ত্বং হি রাজন্বৃতো ময়া
অয়াচতো ভয়ং নাস্তি দত্তাং চ প্রতিগৃহ্ণতঃ
76.27
বৈশংপায়ন উবাচ
ত্বরিতং দেবয়ান্যাথ প্রেষিতং পিতুরাত্মনঃ
শ্রুত্বৈব চ স রাজানং দর্শয়ামাস ভার্গবঃ
76.28
দৃষ্ট্বৈব চাগতং শুক্রং যয়াতিঃ পৃথিবীপতিঃ
ববন্দে ব্রাহ্মণং কাব্যং প্রাঞ্জলিঃ প্রণতঃ স্থিতঃ
76.29
দেবয়ান্যুবাচ
রাজায়ং নাহুষস্তাত দুর্গে মে পাণিমগ্রহীৎ
নমস্তে দেহি মামস্মৈ নান্যং লোকে পতিং বৃণে
76.30
শুক্র উবাচ
বৃতোঽনয়া পতির্বীর সুতয়া ত্বং মমেষ্টয়া
গৃহাণেমাং ময়া দত্তাং মহিষীং নহুষাত্মজ
76.31
যয়াতিরুবাচ
অধর্মো ন স্পৃশেদেবং মহান্মামিহ ভার্গব
বর্ণসংকরজো ব্রহ্মন্নিতি ত্বাং প্রবৃণোম্যহম্
76.32
শুক্র উবাচ
অধর্মাত্ত্বাং বিমুঞ্চামি বরয়স্ব যথেপ্ষিতম্
অস্মিন্বিবাহে মা গ্লাসীরহং পাপং নুদামি তে
76.33
বহস্ব ভার্যাং ধর্মেণ দেবয়ানীং সুমধ্যমাম্
অনয়া সহ সংপ্রীতিমতুলাং সমবাপ্স্যসি
76.34
ইয়ং চাপি কুমারী তে শর্মিষ্ঠা বার্ষপর্বণী
সংপূজ্যা সততং রাজন্মা চৈনাং শয়নে হ্বয়েঃ
76.35
বৈশংপায়ন উবাচ
এবমুক্তো যয়াতিস্তু শুক্রং কৃত্বা প্রদক্ষিণম্
জগাম স্বপুরং হৃষ্টো অনুজ্ঞাতো মহাত্মনা