Utshovঅধ্যায় 75
75.1
বৈশংপায়ন উবাচ
ততঃ কাব্যো ভৃগুশ্রেষ্ঠঃ সমন্যুরুপগম্য হ
বৃষপর্বাণমাসীনমিত্যুবাচাবিচারয়ন্
75.2
নাধর্মশ্চরিতো রাজন্সদ্যঃ ফলতি গৌরিব
পুত্রেষু বা নপ্তৃষু বা ন চেদাত্মনি পশ্যতি
ফলত্যেব ধ্রুবং পাপং গুরুভুক্তমিবোদরে
75.3
যদঘাতয়থা বিপ্রং কচমাঙ্গিরসং তদা
অপাপশীলং ধর্মজ্ঞং শুশ্রূষুং মদ্গৃহে রতম্
75.4
বধাদনর্হতস্তস্য বধাচ্চ দুহিতুর্মম
বৃষপর্বন্নিবোধেদং ত্যক্ষ্যামি ত্বাং সবান্ধবম্
স্থাতুং ত্বদ্বিষয়ে রাজন্ন শক্ষ্যামি ত্বয়া সহ
75.5
অহো মামভিজানাসি দৈত্য মিথ্যাপ্রলাপিনম্
যথেমমাত্মনো দোষং ন নিয়চ্ছস্যুপেক্ষসে
75.6
বৃষপর্বোবাচ
নাধর্মং ন মৃষাবাদং ত্বয়ি জানামি ভার্গব
ত্বয়ি ধর্মশ্চ সত্যং চ তত্প্রসীদতু নো ভবান্
75.7
যদ্যস্মানপহায় ত্বমিতো গচ্ছসি ভার্গব
সমুদ্রং সংপ্রবেক্ষ্যামো নান্যদস্তি পরায়ণম্
75.8
শুক্র উবাচ
সমুদ্রং প্রবিশধ্বং বা দিশো বা দ্রবতাসুরাঃ
দুহিতুর্নাপ্রিয়ং সোঢুং শক্তোঽহং দয়িতা হি মে
75.9
প্রসাদ্যতাং দেবয়ানী জীবিতং হ্যত্র মে স্থিতম্
যোগক্ষেমকরস্তেঽহমিন্দ্রস্যেব বৃহস্পতিঃ
75.10
বৃষপর্বোবাচ
যত্কিংচিদসুরেন্দ্রাণাং বিদ্যতে বসু ভার্গব
ভুবি হস্তিগবাশ্বং বা তস্য ত্বং মম চেশ্বরঃ
75.11
শুক্র উবাচ
যত্কিংচিদস্তি দ্রবিণং দৈত্যেন্দ্রাণাং মহাসুর
তস্যেশ্বরোঽস্মি যদি তে দেবয়ানী প্রসাদ্যতাম্
75.12
দেবয়ান্যুবাচ
যদি ত্বমীশ্বরস্তাত রাজ্ঞো বিত্তস্য ভার্গব
নাভিজানামি তত্তেঽহং রাজা তু বদতু স্বয়ম্
75.13
বৃষপর্বোবাচ
যং কামমভিকামাসি দেবয়ানি শুচিস্মিতে
তত্তেঽহং সংপ্রদাস্যামি যদি চেদপি দুর্লভম্
75.14
দেবয়ান্যুবাচ
দাসীং কন্যাসহস্রেণ শর্মিষ্ঠামভিকাময়ে
অনু মাং তত্র গচ্ছেত্সা যত্র দাস্যতি মে পিতা
75.15
বৃষপর্বোবাচ
উত্তিষ্ঠ হে সংগ্রহীত্রি শর্মিষ্ঠাং শীঘ্রমানয়
যং চ কাময়তে কামং দেবয়ানী করোতু তম্
75.16
বৈশংপায়ন উবাচ
ততো ধাত্রী তত্র গত্বা শর্মিষ্ঠাং বাক্যমব্রবীৎ
উত্তিষ্ঠ ভদ্রে শর্মিষ্ঠে জ্ঞাতীনাং সুখমাবহ
75.17
ত্যজতি ব্রাহ্মণঃ শিষ্যান্দেবয়ান্যা প্রচোদিতঃ
সা যং কাময়তে কামং স কার্যোঽদ্য ত্বয়ানঘে
75.18
শর্মিষ্ঠোবাচ
সা যং কাময়তে কামং করবাণ্যহমদ্য তম্
মা ত্বেবাপগমচ্ছুক্রো দেবয়ানী চ মত্কৃতে
75.19
বৈশংপায়ন উবাচ
ততঃ কন্যাসহস্রেণ বৃতা শিবিকয়া তদা
পিতুর্নিয়োগাত্ত্বরিতা নিশ্চক্রাম পুরোত্তমাৎ
75.20
শর্মিষ্ঠোবাচ
অহং কন্যাসহস্রেণ দাসী তে পরিচারিকা
অনু ত্বাং তত্র যাস্যামি যত্র দাস্যতি তে পিতা
75.21
দেবয়ান্যুবাচ
স্তুবতো দুহিতা তেঽহং বন্দিনঃ প্রতিগৃহ্ণতঃ
স্তূয়মানস্য দুহিতা কথং দাসী ভবিষ্যসি
75.22
শর্মিষ্ঠোবাচ
যেন কেনচিদার্তানাং জ্ঞাতীনাং সুখমাবহেৎ
অতস্ত্বামনুয়াস্যামি যত্র দাস্যতি তে পিতা
75.23
বৈশংপায়ন উবাচ
প্রতিশ্রুতে দাসভাবে দুহিত্রা বৃষপর্বণঃ
দেবয়ানী নৃপশ্রেষ্ঠ পিতরং বাক্যমব্রবীৎ
75.24
প্রবিশামি পুরং তাত তুষ্টাস্মি দ্বিজসত্তম
অমোঘং তব বিজ্ঞানমস্তি বিদ্যাবলং চ তে
75.25
এবমুক্তো দুহিত্রা স দ্বিজশ্রেষ্ঠো মহায়শাঃ
প্রবিবেশ পুরং হৃষ্টঃ পূজিতঃ সর্বদানবৈঃ