অধ্যায় 74

74.1

শুক্র উবাচ
যঃ পরেষাং নরো নিত্যমতিবাদাংস্তিতিক্ষতি
দেবয়ানি বিজানীহি তেন সর্বমিদং জিতম্

যঃ সমুত্পতিতং ক্রোধং নিগৃহ্ণাতি হয়ং যথা
স যন্তেত্যুচ্যতে সদ্ভির্ন যো রশ্মিষু লম্বতে

যঃ সমুত্পতিতং ক্রোধমক্রোধেন নিরস্যতি
দেবয়ানি বিজানীহি তেন সর্বমিদং জিতম্

যঃ সমুত্পতিতং ক্রোধং ক্ষময়েহ নিরস্যতি
যথোরগস্ত্বচং জীর্ণাং স বৈ পুরুষ উচ্যতে

যঃ সংধারয়তে মন্যুং যোঽতিবাদাংস্তিতিক্ষতি
যশ্চ তপ্তো ন তপতি দৃঢং সোঽর্থস্য ভাজনম্

যো যজেদপরিশ্রান্তো মাসি মাসি শতং সমাঃ
ন ক্রুধ্যেদ্যশ্চ সর্বস্য তয়োরক্রোধনোঽধিকঃ

যত্কুমারাঃ কুমার্যশ্চ বৈরং কুর্যুরচেতসঃ
ন তত্প্রাজ্ঞোঽনুকুর্বীত বিদুস্তে ন বলাবলম্

দেবয়ান্যুবাচ
বেদাহং তাত বালাপি ধর্মাণাং যদিহান্তরম্
অক্রোধে চাতিবাদে চ বেদ চাপি বলাবলম্

শিষ্যস্যাশিষ্যবৃত্তের্হি ন ক্ষন্তব্যং বুভূষতা
তস্মাত্সংকীর্ণবৃত্তেষু বাসো মম ন রোচতে

পুমাংসো যে হি নিন্দন্তি বৃত্তেনাভিজনেন চ
ন তেষু নিবসেত্প্রাজ্ঞঃ শ্রেয়োর্থী পাপবুদ্ধিষু

যে ত্বেনমভিজানন্তি বৃত্তেনাভিজনেন চ
তেষু সাধুষু বস্তব্যং স বাসঃ শ্রেষ্ঠ উচ্যতে

বাগ্দুরুক্তং মহাঘোরং দুহিতুর্বৃষপর্বণঃ
ন হ্যতো দুষ্করতরং মন্যে লোকেষ্বপি ত্রিষু
যঃ সপত্নশ্রিয়ং দীপ্তাং হীনশ্রীঃ পর্যুপাসতে