Utshovঅধ্যায় 73
73.1
বৈশংপায়ন উবাচ
কৃতবিদ্যে কচে প্রাপ্তে হৃষ্টরূপা দিবৌকসঃ
কচাদধীত্য তাং বিদ্যাং কৃতার্থা ভরতর্ষভ
73.2
সর্ব এব সমাগম্য শতক্রতুমথাব্রুবন্
কালস্তে বিক্রমস্যাদ্য জহি শত্রূন্পুরংদর
73.3
এবমুক্তস্তু সহিতৈস্ত্রিদশৈর্মঘবাংস্তদা
তথেত্যুক্ত্বোপচক্রাম সোঽপশ্যত বনে স্ত্রিয়ঃ
73.4
ক্রীডন্তীনাং তু কন্যানাং বনে চৈত্ররথোপমে
বায়ুভূতঃ স বস্ত্রাণি সর্বাণ্যেব ব্যমিশ্রয়ৎ
73.5
ততো জলাত্সমুত্তীর্য কন্যাস্তাঃ সহিতাস্তদা
বস্ত্রাণি জগৃহুস্তানি যথাসন্নান্যনেকশঃ
73.6
তত্র বাসো দেবয়ান্যাঃ শর্মিষ্ঠা জগৃহে তদা
ব্যতিমিশ্রমজানন্তী দুহিতা বৃষপর্বণঃ
73.7
ততস্তয়োর্মিথস্তত্র বিরোধঃ সমজায়ত
দেবয়ান্যাশ্চ রাজেন্দ্র শর্মিষ্ঠায়াশ্চ তত্কৃতে
73.8
দেবয়ান্যুবাচ
কস্মাদ্গৃহ্ণাসি মে বস্ত্রং শিষ্যা ভূত্বা মমাসুরি
সমুদাচারহীনায়া ন তে শ্রেয়ো ভবিষ্যতি
73.9
শর্মিষ্ঠোবাচ
আসীনং চ শয়ানং চ পিতা তে পিতরং মম
স্তৌতি বন্দতি চাভীক্ষ্ণং নীচৈঃ স্থিত্বা বিনীতবৎ
73.10
যাচতস্ত্বং হি দুহিতা স্তুবতঃ প্রতিগৃহ্ণতঃ
সুতাহং স্তূয়মানস্য দদতোঽপ্রতিগৃহ্ণতঃ
73.11
অনায়ুধা সায়ুধায়া রিক্তা ক্ষুভ্যসি ভিক্ষুকি
লপ্স্যসে প্রতিয়োদ্ধারং ন হি ত্বাং গণয়াম্যহম্
73.12
বৈশংপায়ন উবাচ
সমুচ্ছ্রয়ং দেবয়ানীং গতাং সক্তাং চ বাসসি
শর্মিষ্ঠা প্রাক্ষিপত্কূপে ততঃ স্বপুরমাব্রজৎ
73.13
হতেয়মিতি বিজ্ঞায় শর্মিষ্ঠা পাপনিশ্চয়া
অনবেক্ষ্য যয়ৌ বেশ্ম ক্রোধবেগপরায়ণা
73.14
অথ তং দেশমভ্যাগাদ্যয়াতির্নহুষাত্মজঃ
শ্রান্তয়ুগ্যঃ শ্রান্তহয়ো মৃগলিপ্সুঃ পিপাসিতঃ
73.15
স নাহুষঃ প্রেক্ষমাণ উদপানং গতোদকম্
দদর্শ কন্যাং তাং তত্র দীপ্তামগ্নিশিখামিব
73.16
তামপৃচ্ছত্স দৃষ্ট্বৈব কন্যামমরবর্ণিনীম্
সান্ত্বয়িত্বা নৃপশ্রেষ্ঠঃ সাম্না পরমবল্গুনা
73.17
কা ত্বং তাম্রনখী শ্যামা সুমৃষ্টমণিকুণ্ডলা
দীর্ঘং ধ্যায়সি চাত্যর্থং কস্মাচ্ছ্বসিষি চাতুরা
73.18
কথং চ পতিতাস্যস্মিন্কূপে বীরুত্তৃণাবৃতে
দুহিতা চৈব কস্য ত্বং বদ সর্বং সুমধ্যমে
73.19
দেবয়ান্যুবাচ
যোঽসৌ দেবৈর্হতান্দৈত্যানুত্থাপয়তি বিদ্যয়া
তস্য শুক্রস্য কন্যাহং স মাং নূনং ন বুধ্যতে
73.20
এষ মে দক্ষিণো রাজন্পাণিস্তাম্রনখাঙ্গুলিঃ
সমুদ্ধর গৃহীত্বা মাং কুলীনস্ত্বং হি মে মতঃ
73.21
জানামি হি ত্বাং সংশান্তং বীর্যবন্তং যশস্বিনম্
তস্মান্মাং পতিতামস্মাত্কূপাদুদ্ধর্তুমর্হসি
73.22
বৈশংপায়ন উবাচ
তামথ ব্রাহ্মণীং স্ত্রীং চ বিজ্ঞায় নহুষাত্মজঃ
গৃহীত্বা দক্ষিণে পাণাবুজ্জহার ততোঽবটাৎ
73.23
উদ্ধৃত্য চৈনাং তরসা তস্মাত্কূপান্নরাধিপঃ
আমন্ত্রয়িত্বা সুশ্রোণীং যয়াতিঃ স্বপুরং যয়ৌ
73.24
দেবয়ান্যুবাচ
ত্বরিতং ঘূর্ণিকে গচ্ছ সর্বমাচক্ষ্ব মে পিতুঃ
নেদানীং হি প্রবক্ষ্যামি নগরং বৃষপর্বণঃ
73.25
বৈশংপায়ন উবাচ
সা তু বৈ ত্বরিতং গত্বা ঘূর্ণিকাসুরমন্দিরম্
দৃষ্ট্বা কাব্যমুবাচেদং সংভ্রমাবিষ্টচেতনা
73.26
আচক্ষে তে মহাপ্রাজ্ঞ দেবয়ানী বনে হতা
শর্মিষ্ঠয়া মহাভাগ দুহিত্রা বৃষপর্বণঃ
73.27
শ্রুত্বা দুহিতরং কাব্যস্তত্র শর্মিষ্ঠয়া হতাম্
ত্বরয়া নির্যয়ৌ দুঃখান্মার্গমাণঃ সুতাং বনে
73.28
দৃষ্ট্বা দুহিতরং কাব্যো দেবয়ানীং ততো বনে
বাহুভ্যাং সংপরিষ্বজ্য দুঃখিতো বাক্যমব্রবীৎ
73.29
আত্মদোষৈর্নিয়চ্ছন্তি সর্বে দুঃখসুখে জনাঃ
মন্যে দুশ্চরিতং তেঽস্তি যস্যেয়ং নিষ্কৃতিঃ কৃতা
73.30
দেবয়ান্যুবাচ
নিষ্কৃতির্মেঽস্তু বা মাস্তু শৃণুষ্বাবহিতো মম
শর্মিষ্ঠয়া যদুক্তাস্মি দুহিত্রা বৃষপর্বণঃ
সত্যং কিলৈতত্সা প্রাহ দৈত্যানামসি গায়নঃ
73.31
এবং হি মে কথয়তি শর্মিষ্ঠা বার্ষপর্বণী
বচনং তীক্ষ্ণপরুষং ক্রোধরক্তেক্ষণা ভৃশম্
73.32
স্তুবতো দুহিতা হি ত্বং যাচতঃ প্রতিগৃহ্ণতঃ
সুতাহং স্তূয়মানস্য দদতোঽপ্রতিগৃহ্ণতঃ
73.33
ইতি মামাহ শর্মিষ্ঠা দুহিতা বৃষপর্বণঃ
ক্রোধসংরক্তনয়না দর্পপূর্ণা পুনঃ পুনঃ
73.34
যদ্যহং স্তুবতস্তাত দুহিতা প্রতিগৃহ্ণতঃ
প্রসাদয়িষ্যে শর্মিষ্ঠামিত্যুক্তা হি সখী ময়া
73.35
শুক্র উবাচ
স্তুবতো দুহিতা ন ত্বং ভদ্রে ন প্রতিগৃহ্ণতঃ
অস্তোতুঃ স্তূয়মানস্য দুহিতা দেবয়ান্যসি
73.36
বৃষপর্বৈব তদ্বেদ শক্রো রাজা চ নাহুষঃ
অচিন্ত্যং ব্রহ্ম নির্দ্বন্দ্বমৈশ্বরং হি বলং মম